هام لادارة المنتدى واعضائه الدخول للاهمية

[haha2012]

اين روح المحبة فى هذا المنتدى ماذا حدث لادارة المنتدى من الملحوظ ان الغلط بقى عادى والمنتدى بقى كله تعصب وماشى فى سكة واحدة ومفيش اى مراعاة لشعور الغير وكان الادارة عاجبها كدة

فلان ينشر اخبار عن اسلمة مسيحين ويقول انقذهم من النار ومعرفش ايه الهدف من الموضوع دا وفى منتدى تعليمى هل الاخوة المسلمين مستنين الخبر ده طيب ممكن الاخوة المسيحين يجيبوا مواضيع وبكدة ميبقاش منتدى

فلان جايب صورة قسيس وراهبة وحاطط صورة ميكى عليهم ايه الاستهبال ده انت راضى عن اللى بتعمله ساويرس خسر ناس بسبب عمله ليه انت تخسر اصدقاء ليك من المنتدى


فلان وعلان حملة ضد ساويرس وكان مصر مفيهاش غيره لانه طبعا مسيحى وفيه ناس ياما ولسة متحاسبتش ومحدش بيتكلم عليها

الغالبية فرحان بالاحزاب السلفية وغيره من الاحزاب للعلم بلدنا طول ما فيها فكر دينى متحيز مش ممكن تعمر ابدا
بلدنا عايزة احزاب شعبية ليه الناس بتاخد الدين سبيل فى احزابها افهموها يا بشر ليه ميكونش فى حزب للفقير اللى هما تقريبا كل الشعب مش كل واحد قال يا رب نصدقه ومبلحمش لاى حاجة علشان محدش يفهم غلط
ليه ظهر حكاية الاسلمة والتنصير فى بلدنا محنا عايشين من زمان وسرنا هادى من ايام الجدود ايه اللى جد علينا
اظاهر كدة بلدنا بدأت تهون علينا وممكن البلد تتقلب علشان ولد وبنت غير متزنين (يا خسارة)


ليه مفيش مواضيع عن بلدنا عن علاقات راجل مسلم يساعد اخوه المسيحى او العكس فين الايام دى راحت فين
ليه بطلنا نتكلم على مصر ليه مفيش مواضيع عن نهضة بلدنا ليه بنركز مع اشخاص واى واحد يغلط نسيب كل حاجة ونركز معاه

اطلب من ادارة المنتدى كثير من الجدية فى التعامل مع المواضيع ويا ريت المواضيع اللى تثير فتنة بين الاعضاء يتم حذفها لانه لا تتناسب مع سمات هذا المنتدى الا اذا كان المنتدى مقتنع بهذه الافكار

انا اعرف كثيرين فى هذا المنتدى ومنهم المحترمين طبعا لكن بذلك المنتدى سيخسر اعضاء جيدين بسبب تدنى لغة الحوار