اين نحن من هؤلاء !!

[Mr. Ali 1]

موضوعك موضوع متشعب يا فرح وهختلف معاكي في معظمه .
التعاون بين الناس شيء جميل جداً ومفيد من كل الوجوه . لكن هو ايه التعاون دا ؟ شكله ايه ؟
التعاون مع بعض في الفرح , المواساة في الأحزان , التعاون في الكوراث ( ولكن بحدود معينة )
أحد جيرانك في ضائقة مالية مثلاً , شيء جميل انك تساعده وتفرج عنه ضائقته . واحدة بتربي في أيتام , انك تساعدها شيء رائع جداً .
لكن أن يتحول الأمر إلي مطالبة الشعب بأن يتعاون مع بعضه في حل مشكلات البعض ( البعض دول مش عدد قليل ) والتي يجب أن تتولي الدولة حل هذه المشاكل بنفسها , فهذا هو الخطأ والخلط بين الأمرين ( التعاون , ودور الدولة وواجبها تجاه المواطنين )
في النظام الحاكم السابق , كان دمي بيتحرق وأنا بشوف اعلانات التسول من المواطنين عيني عينك بدعوي العلاج , التكافل , ..... وكنت ضد هذا الأمر ومازلت ضده ( الاعلانات رجعت تاني ) ماذا اكتشف الشعب المصري بعد ذلك ؟ المسئولين نهبوا وسرقوا المليارات من دم الشعب المصري البسيط , وكانوا بيطالبوا الفرد العادي انه ( يتبرع ولو بجنيه , اتبرع باللي تقدر عليه ) احنا نتبرع بالجنيه لأن الدولة فقيرة ومعدمة والميزانية لا تسمح أبداً ,وهما يسرقوا المليارات !!
مساكن العشوائيات , علاج المواطنين , التعليم , القضاء علي البطالة من أهم واجبات الدولة تجاه المواطنين ولابد من تأدية دورها كما ينبغي . ومينفعش اننا نحل محل الدولة في قيامها بهذا الدور ( بلاش نكرر نفس السيناريو مرة أخري )
يعني ايه موظف في الدولة بياخد أكتر من مليون جنيه شهرياً , وواحد ييجي يقولي اتبرع بجنيه علشان تعالج المرضي الفقراء أو تساعد في بناء منزل لأحد مواطني العشوائيات لأن الدولة فقيرة ؟؟!! هي الدولة فقيرة مع الفقراء وبس ؟؟؟ لكن معاها انها تدفع مليون وأكتر لموظفين في الحكومة ؟!! هو دا المنطق ؟؟ بكد احنا بنساعد الدولة انها تستمر في نفس السياسة السابقة وهي استهبال واستكراد الشعب المصري !!
عايز أقول كلام أكتر بكتير يا فرح ( الواحد معبي ) بس كفاية كدا عليكي .
شكراً علي هذا الموضوع يا فرح .
تقبلي مروري .