اسف للاطاله .. بس حبيت افضفض من تعبى !! حكايتى ..!

[Analyzer.Mn3m55]

يا جمااااعه بداية كده انا اسف انى هطول عليكم بس بجد انا تعبان و فاض بيا و حبيت افضفض يعنى شوية فا هزعجكم شوية ب حكاااايتى دى :
انا من صغرى و انا متعلق اوى بالبرمجه و الكمبيوتر و الحاجات دى .. قبل ما ادخل 2 ثانوى كنت مجهز فى دماغى انى ادخل حاسبات مش لانى بكره الهندسه لا بالعكس لان الحاسبات فيها طموحى و كنت حاسس انى هنفع نفسى و البلد دى كنت هقدر اعليها ..

المهم اتعلمت بنفسى و لوحدى لغات البيسيك و السى شارب والجافا و بقيت كويس جداا فى معظم اللغات دى .. بعرف اعمل برامج و عملت الات حاسبه كتير اللى هى احد المطاليب اللى بيطلبوها من اولى حاسبات فى الكلية يعنى انا عديت مرحله اولى حاسبات و انا لسه مدخلتش تانيه ثانوى مش غرور والله بس انا سعيد انى عندى الموهبه دى و كان نفسى انميها بالكلية و انفع البلد دى بحاجة تشرفنا كمسلمين ..

المهم ارادت الظروف انى اجيب فى تانيه 85 و تالته شديت حيلى جداا و جبت 94 مع انى بدات افقد الامل واحلامى تنهار .. جبت فى المجموع الكلى 89.15 % و بدأت احلامى خلاص تنهاار بجد خلاص فقدت الامل فى الحاجات اللى اتعلمتها و بدات اجهز نفسى لكلية ادبيه و دى هتكون اسوأ فعله فى حياتى انى ادخل كلية ادبيه بس بدعى من ربنا انه يدينى كلية علميه اى كلية علميه فى اى مكان اقاليمى .. و ان شاء الله هقدر اثبت نفسى فيه .. انا املى فى ربنا كبيييير جدااا و حاسس ان ربنا هيكرمنى عشان اخلصت النيه ليييه وحده .. السؤال دلوقتى . هى الثانوية بقت حفظ و غش ..ّ!!

انا اعرف ناس جايبين مجموع الحاسبات و زياده و بيسألونى الكلية دى بيدرسوا فيها ايه !! قالك انا مجموعى كبير يبقى ادخل احسن الكلية الناس بتتكلم عنها و خلاص ! و انا اللى بعرف اعمله وموهبتى يترموا فى الزباله عشان بلد بتاخد ب اللى يجيب درجات اعلى و يحفظ اكتر و يغش اكتر .. ( مع خالص احترامى لكل المجتهدين و اللى هيدخلوا كليات يستحقوها .. ) قدمت قدرات فنون تطبيقية و جميلة و نجحت فيهم كلهم .. يعنى انا مؤهل انى ادرس المواد دى .. ذنبى ايه انى نقصت فى العربى كتير او الكيمياء مثلا .. المواد دى ايه دخلها بالفنون اللى نفسى ادخلها .. مدخلش فنون اللى اخدت فيها لائق عشان نقصت فى النحو او الادب فى العربى !!! ايه التعليم ده .. انا اختى كانت فى المانيا بتقولى الجامعات هناك اللى يتخرج من الثانوى يقدر يدرس اللى هو عاوزه الحياة الماديه هناك مرتفعه و كل واحد بيدخل الكلية اللى عاوزها .. انا كنت حاسس باحباط شدييييد جداا بجد بس قولت الخيره فيما اختاره الله محدش عارف الخير فين و الشغل و المستقبل ده رزق مكتوب للانسان من زمان .. و ممكن اكون متميز فى اى مكان تانى مش شرط الناس كلها تبقى مهندسين و مبرمجين .. (اعملوا فكل ميسر لما خلق له) ..
طلب اخير يا جماعه من كل اللى هيكمل قراءة الموضوع ده لنهايته يدعيلى بالهداية و الصلاح و ربنا يناولنى الكلية اللى نفسى فيها انا و كل اللى تعب بجد .. و اسف طووووولت عليكم يا جماعه بس كنت عاوز افضفض و لو مكنت اتكلمت كنت طقيييييت ههههههه ربنا يبارك ويكرم الجميع ان شاء الله