يوميات التحويل في المنصورة

[ningooooo]

بسم الله الرحمن الرحيم

صحيت النهاردة من النوم الساعة 8.30 و نزلت من البيت تقريبا الساعة 9 و ركبت تاكسي لمدينة الطالبات بشارع جيهان وو جدت تجمع أمام المدينة عند أحد المكتبات فاستفسرت و وجدتهم يبيعون ورق طلب التحويل بخمسين قرش فاشتريتها و ملأت البيانات
و بدأت رحلة العذاب و بعد استفسار و جدت ان الخطوات تبدأ باخذ بركة توقيع شخص كده في شباك و بعد كده تروح تدفع الفلوس
فروحت الشباك بتاعي و لقيت طابور طوييييييييل قلت هحترم نفسي و اقف في الطابور و كان بها و بعد فترة من الزمن بتاع ساعة كده أو أكتر وجدت نفسي في الامام في زمام المعركة و كانت اللحظة الحاسمة حينما وجدت نفسي امام الشباك مباشرة فإذا بفرد يأخذ من الورق و يتفحصه و قام الحمد لله بالتوقيع علي الورق

و عاوز اقولكم بعض السلبيات في الاول كان الرجالة و اخدين الشباك تقريبا كله و مكنش في غير واحده بس اللي قدام الشباك و لكنهم لم يستسلموا فوجدناهم استطاعوا تحرير مكانهم و السيطرة عليه و منعوا اي تدخل ذكوري بل وكانوا احيانا تكون لهم الأغلبية عند الشباك و كنت عاوز اقولكم ان تقريبا سبب هذه الزحمة في الغالب أولياء الامور و بعض الطلاب الذين يرفضون الوقوف في الطابور و يقتحمون المكان من الجنب

و نكمل بقه اوعو تكونوا زهقتوا احنا لسه مدفعناش الفلوس و بعدين لقيت تجمع لناس قدام شباك سداد مصاريف التحويل فوقفت شوية كده بتاع ربع ساعة و اكتشفت ان البيه الموظف مش موجود و مشي و برضه مستسلمتش و روحت علي الشباك اللي بعده و بعد زق من الناس مش مني و زحمة جامده جدا تمكنت من الوصول لمنتصف الطابور و تقريبا كده مكنش حد من اللي قدام الشباك بيمشو بعدين البيه قلنا خلاص النهاردة هقفل و طبعا ده بعد ما فطر الناس بسبب السباب و الشتائم

و كان في إغماءات و ناس قلعت هدومها و الجو حر جدا و الواحد مش عارف يتنفس فقررت أخيرا أني أروح البيت و اجيلهم تاني بكرة الأربعاء بعد عذاب دام فوق الساعتين و انتظرونا مع اليوميات بكرة بإذن الله