نظرة ف ماتش بتروجيت

[Golden Eagle]

بسم الله الرحمن الرحيم
طبعا ً شفنا ماتش الأهلي و بتروجيت
و بغض النظر عن غلطة شريف ( أخطاء فردية بتحصل مش هاندقق فيها )
لكن في حاجة عايزة تنوه لطريقة الأهلي الجديدة
الأهلي بقي بيلعب 4-2-3-1
الـ 4 اللي ورا فاهمين المطلوب منهم ( 3 بيدافعوا و الجناح اللي ناحيته الهجمة بيزيد شوية لقدام )
الـ 2 اللي ف النص فاهمين المطلوب منهم إيه ( بيغطي علي الجناح اللي بيهاجم من ناحيته )
الـ 3 اللي تحت راس الحربة فاهيمن المطلوب منهم ( اختراقات و صناعة لعب و هجوم كاسح ع الجون )

المشكلة بقي ف الـ 1 ( متعب )
زمان لما كان متعب جنبه فلافيو كان متعب بيتحرك صح جدا ً
يعني لما تيجي كورة تتلعب بالعرض متعب ياحرك لبرا مثلا ً و فلافيو يكمل ع الجون و متعب يكون واخد معاه كام مدافع يراقبه
يعني تحركات متعب بتريح اللي جنبه علشان كدا كان ف فترة م الفترات فلافيو متألق ف التهديف و متعب مش بيهدف و مع ذلك جوزيه بينزل الاتنين
ماشي
الكلام دا ما ينفعش بقي خلاص
لأن متعب مش بيلعب جنبه مهاجم تاني
يعني كورة زي كورة عبد الله السعيد اللي لعبها بالعرض و تريكة مالحقهاش
المفروض و البديهي إن متعب يكمل لجوا ناحية الجون و الـ 3 اللي وراه منهم واحد بيرفع الكورة و الـ 2 التانيين ع حدود الـ 18 أو جواها بجزأ بسيط يعني بدل ما تريكة ييجي من نص الملعب لآخر الدنيا و متعب يتحرك لبرا
و التحرك دا حصل ف كورة وليد سليمان اللي ضيعها عبد الله السعيد
وليد اخترق م الشمال
متعب راح ناحية الجون و اخد معاه جوز مدافعين و فضي جزأ م الـ 18
عبد الله السعيد إتحرك ف الجزأ الفاضي دا و اخد الكورة كويس ( طبعا ً ضيعها بس مش مهم )
المطلوب من متعب إنه يفهم إنه مهاجم وحيد لازم يبقي هجام صدغ قاطع طريق
يروح ع الجون ع طول علشان يفضي مساحة للـ 3 اللي وراه و يبقي كدا اللي بيلعب بالعرض ممكن يلعب لبرا أو لمتعب

واحد تاني فيه مشكلة هو فتحي
ف ماتش الحرس يعتبر ما كانش ليه اي دور هجومي بس كان معذور لأن كان معاه عيد عبد الملك
لكن ماتش بتروجيت كان معاه مين ؟؟؟
اظن اسلام الشاطر كان بيميل ع سيد معوض
مش فاكر إن فتحي لعب اي كورة بالعرض خالص

ما علينا
طريقة جديدة + لاعيبة جديدة + بركات مصاب + بحب جوزيه و مش هاطلعه غلطان