مشهد متكرر

[LoOoLy El Treikawya]

بسم الله الرحمن الرحيم

السلام عليكم ورحمة الله وبركاته

بداية انا بجد مش عارفة اقول ايه فى اللى بيحصل دلوقتى دة فى مصر

لكن كل اللى حسيته انه مشهد متكرر ليوم 28 يناير والبلطجة اللى حصلت بعده

انا طول عمرى كنت ضد اى وقيعة بين المجلس العسكرى والشعب حرصا على مصلحة مصر لدرجة كتبت دة فى توقيعى صراحة ويمكن كتير من حضراتكو عارف دا

لكن انا دلووقتى بقولها ان المجلس العسكرى والمشير مسئول أولا وأخيرا عن كل اللى بيحصل دا

لأن بالعقل كدة

المليونية بتاعت الجمعة كان معلن عنها قبلها بكتييير وكان معلن عن طلباتها واسمها ((جمعة المطلب الواحد ))

والاغلبية كانوا معاها من فئات مختلفة

المجلس كان يقدر يمنع المليونية دى بتنفيذ طلبات الشعب لكن انا مش عارفة يعنى هو مستنى لما الدنيا تتخرب عشان يعمل اجتماعات وانتظروا البيان وشغل مبارك الفكسان دا

بس كان حسنى اشطر

مطالبنا معروفة عاوزين اسراع فى القرارات

جدول زمنى لكل حاجة عشان نحس ان فيه اجراءات بتحصل

9 شهور محصلش حاجة

الاسراع فى محاكمة رموز النظام السابق واى بلطجى يريد الخراب بمصر عشان البلد تهدى

الغاء وثيقة السلمي اللى كشفتهم بجد

ولو هم على حق وصح واحنا غلط يبقى ليه ميطلعش المشير يوضحلنا ويكون فيه شفافية فى التعامل

لو هو صح لى ميقطعش لسان كل واحد عاوز يعمل وقيعة بيننا وبينه لما يكون هو واضح معانا

لكن اللى بيحصل دلوقتى ان مظاهرة سلمية اتعملت مفيهاش اى مشاكل فجأة تتحول لبلطجة وتهديد الامن العام ودة كان نفس السلاح اللى لجأ ليه المخلوع


انا مش عارفة الناس دى بتفكر ازاى

ومش لاقية مبرر فى الحقيقة ومبقتش عارفة ادافع عنهم اكتر من كدة لان انا بجد حاسة بنار جوايا من اللى بيحصل دا

حتى اسلوبهم فى فض التظاهرات اسلوب كر وفر وحاجات مش مقنعة

يعنى ايه يعنى الشرطة والجيش تفضها بالقوة وفى خمس دقايق يختفى كل الامن عشان التظاهرات ترجع تانى متلحقش تتفض

يعنى ايه يوصل عدد المصابين لالف مصاب

ايه الجديد اللى حصل

انا بجد مش فاهمة حاجة بس كل اللى انا فهماه اننا عمرنا ما هنفرط فى حقنا لأن احنا مصر

الشعب هو مصر وهندافع عن حقنا وثورتنا لآخر نقطة فى دمنا

ومحدش يفتكر انه هيعرف يسرق ثورتنا

والانتخابات هتتعمل ومش هيحكمنا العسكر لان دى ارادة الشعب

ومصر فى طريقها لتكون دولة اسلامية اذا كان اللى بيحصل دا وسيلة البعض عشان يحاربوا الاسلاميين ويأجلو الانتخابات



حتى لو اللى فى الميدان غلطانين فالمجلس هو اللى سمح للغلط دة انه يحصل من الأول

وآدينا منتظرين البيان


رب إجعل هذا بلدا آمنا وارزق اهله من الثمرات

يااا رب مصر يااا رب مصر التى ذكرتها فى قرآنك الكريم خير جنود الارض ياا رب

اللهم عليك بمن اراد بمصر شرا

أنا واثقة ان مستقبل شعبنا احسن مهما زادت المحاولات على قتل الثورة ومهما حاولوا اغفال المصريين ثانية

لأن فلسطين منتظرة وطال انتظارها

وأتمنى أسمع آراءكو

السلام عليكم ورحمة الله وبركاته