حوار جريء مع سيادته

[الدائمة الحزن]

احم احم
انا هعمل نفسي مذيعه
اظبط في شكلي
شعري
وأتاكد ان مكياجي مظبوط
المخرج بقه دلوقتي هيقول
هوااااا
و ادخل انا واقول
اعزائي اعضاء منتدي الثانويه
__ بدلا من اعزائي المشاهدين __ هو احنا اصلا منعرفش ليه بنبقي اعزائهم مع انهم عمرهم ما عرفونا__ ماعلينا __
اهلا بكم في منتدانا (( برنامجنا ))
اتمني ان تسعدوا معنا وبنا
معانا النهارده موضوع الساعه
ومعنا شخصيه هامه ستساعدنا في الوصول الي اسباب الزياده في .....

الاسعـــــــــــــــــــــــــــــــــــــــــــــ ـــــــــــــــــــــــــــــــــــــــــــــ ــــــار

الاسعار هو موضوع الساعه في مصر
مواضيع كثيره __ برامج كثيره __ اتكلمت في هذه المشكله ولكنهم لم يصلوا لحل
معنا اليوم السيد الوزير(( اي واحد منهم كلهم بيحبونا ويخافوا علي مصالحنا ,امال .. دول فوق راسنا ماهم رافعينها ))

اهلا بسيادتك يا فندم

سيادته : اهلا بيكي

سؤالي الاول لسيادتك

سيادته : تفضلي

ماهي اسباب هذه الزيادة المفاجأه والمستمره في اسعار السلع وبخاصة السلع التموينيه
انتوا عايزين تجوعوا الناس؟

سيادته : طبعا طبعا
سيدنا محمد صلي الله عليه وسلم قال(( صوموا تصحوا )) صدق الرسول الكريم
احنا عايزين الشعب في صحه جيده طبعا
و هو احنا هنصدق مين اكتر من النبي عليه الصلاه والسلام

طيب يا فندم عند حضرتك دم ؟
قصدي عند حضرتك حق يا فندم
لكن سيادتكم_ الحكام يعني_ مش بتصوموا ليه ؟

سيادته: احنا اصلنا لازم نتغذي كويس علشان نقدر نحط الخطط اللازمه لتقدم الوطن
ونقدر كمان نحقق مصالح الشعب
وزي ماسيادتك شايفه احنا اقتصادنا في تقدم مستمر من ساعة لما الناس جاعت
بقت بتشتغل كويس لان صحتهم بقت احسن

المذيعه :اهااااااا فعلا
طيب يا فندم
نسأل حضرتك سؤال كمان

سيادته: اتفضلي _ يتمتم ( خلصينا )_

كم من السنوات ستستمرون في تجويع الشعب , اقصد في تحسين صحتهم عن طريق الجوع ؟

سيادته:لحد لما الاغنيا يخلصوا فلوسهم
علشان يبقي الشعب كله زي بعضه
ف نحن نؤمن بالمساواه بين افراد شعبنا

خلاص يا فندم اخر سؤال لحضرتك _ هتنقط _
لو الناس طفشت وسابتهلكم مخضره او حتي صحرا هيكون ايه رد الفعل ؟

سيادته : يا سلام .. ياريت
وهو المطلوب
احنا عايزين نخف الزحمه علشان الحوادث وانتي بقه عارفه ازمة المرور والمشاكل اللي بتحصل من وراها
وكمان هما بره لما هيطفشوا هياخدوا مرتبات احسن وهيعيشوا احسن
هيتغذوا ومش هيصوموا تاني
دعوه لسكان مصر
اطفشوا منها

المذيعه : يعني سيادتك يا فندم غيرت رايك وفجأه قلت انهم ياكلوا مع انهم صحتهم مش هتيجي علي الاكل

سيادته : لا ما هما لما هياكلوا بره
مش هيشتغلوا كويس وهيبوظوا اقتصاد الاخرين وبالتالي مصر هتكون افضل فليفعلوا شيئا لمصر
فليشعروا بالانتماء لبلدهم مصر ويفعلوا شيئا من أجله

المذيعة : لاتعليق
انتهي حوارنا
ولكن اذا كانت هناك تساؤلات فليرسلها الاعضاء _ المشاهدين, اذا ما طفشوش طبعا _ وسيجيب سيادته
شكرا لتحملكم هذا الضغط و عفوا للذين ماتوا بحسرتهم
الي اللقاء _اذا احببتم_




يا جماعه يا اعضاء المنتدي دلوقتي انا العضوه زميلتكم مش المذيعه
عايزه اقولكم ان دي اول حاجه اكتبها بايدي
عايزه توجيه مش نقد
وطبعا ارائكم اذا كنت انفع اكتب او لا مستنياها