يستاهل اديه على دماغه اضربه كهربه!

[محمد.فوكس]

سلام عليكم...
طبعا اكيد رأي كتير من الناس اللي واخدين نغمة تعطيل بسكلتة الانتاج هيقولو ان المعتصمين بتوع مجلس الوزراء يستاهل اللي بيحصلهم و الشاب اللي خرج متخرشم بعد ما الشرطة العسكرية قامت معاه بالواجب يستاهل و الشرطة العسكرية تعمل اكتر من كده كمان.
و البنات الي بيتشدوا من شعرهم يستاهلو , و بالمناسبة مش عارف ايه حكاية الشرطة العسكرية في شد البنات من شعرهم؟
اللي عايز اقوله لو هنقول على اي حد احنا مختلفين معاه يستاهل التعذيب و الضرب و الكهربا يبقى نقول على القانون السلام.
اومال القانون معمول ليه..مش القضاء معمول عشان ممكن المتهم يطلع بري...طب اقل واجب كنا خلصنا على مبارك من غير محاكمة خصوصا ان محدش فينا عنده شك 1% انه عمل جرايم يستاهل الشنق عليها.
اي واحد بيقول يستاهل و اديلو كمان بكرة هيحصل معاه او مع قريبه و ميقولش انا مش بعمل حاجة غلط لان اللي اتعذب و اللي استشهد برضه معملش حاجة غلط.
و على فكرة من ضمن الشهداء الشيخ الشهيد عماد عفت و هو تقريبا مدير مكتب مفتي الديار و امين لجنة الفتوى الكتابية بدار الافتاء.
سلام عليكم...