سمك .. لبن .. تمر هندي ..!

[نقاء الروح]

السلام عليكم ورحمة الله وبركاته

معروف عن الشعب المصري حبه الشديد لممارسة شيء يسمى " الفتي فكل شيء ، اعرفه او لاء المهم افتي وخلاص ..! "

ولأن دلوقتي السياسة بقت شغلانة من لا شغل له
ماتفتحش قناة الا وتلاقي كم واحد ظريفين كدا قاعدين
وبيتناقشوا فحال البلد ..!
ومش مهم على فكرة انت فاتح قناة تخصصها ايه
لأن دا مش مهم ، المهم انهم يتكلموا وخلاص
والكل عمال يفتي اشمعنى هما يعني ؟؟؟؟!

مثلاً يعني دلوقتي كل ماييجي بابا يفتح قناة من القنوات ال بيُقال انها " رياضية "
الاقي " فلان " او " فلان " او حتى " فلان "
مابحبش اجيب فسيرة حد
قاعدين قعدة حلوة كدا وال بيتكلموا فسياسة البلد
وكلو كلام مش عارفة اصنفه تحت اي مسمى
الا انه كلام فاضي لا مؤاخذة يعني ..

فالبداية استغربت قولت ياربي هو ايه ال حصل
مش دول كانوا زمان بيقولوا جوزيه نزّل وحسن شحاتة بدّل و غالي اتطرد و 4 ، 4 ، 2 و كورنر و اوف سايد
ايه ال قلب حالهم كدا ؟؟؟!

اكتشفت بعديها ان الدوري وقف
معنى كدا ان لا فيه 4 ، 4 ، 2 ولا حتى 5 ، 3 ، 2
فمش معقولة يعني يفضلوا من غير شغل
فيعملوا ايه ؟؟؟

اكيد يتكلموا فالسياسة ..

دي حاجة

الحاجة التانية وال غيظاني اوي
اني كل مافتح قناة الاقيهم بيتكلموا فالسياسة
مافيش جديد انا عارفة
بس انا بصراحة مستغربة
هي السياسة دي مش بتخلص خالص
او يعني هو مافيش حاجة غيرها نتكلم فيها حالياً مثلاً ..

اقولكم على حاجة هتفهموا اناقصدي ايه

من يومين كدا على قناة الحياة كانت لبنى عسل
مستضيفة شباب زي الورد كدا
من مختلف التخصصات ، ال لحقت اشوفهم بصراحة وركزت معاهم
واحد مهندس مش اكتشف لكن قادر على تصنيع الطيارات ال بتطير من غير طيار
بدل خيبتنا التقيلة فستيراد كل حاجة
فكان حواره جميل اوي بيتلخص فاننا حتى لمابنستورد بتبقى الحاجة مش اخر موديل الى جانب انها بيبقى فيها عيوب تجبرك انك تفضل اسير للمصدر بتاعها
لأنك ببساطة مش عارف تركيبها ايه وماشية ازاي ..
فهو توصل لكيفية التصنيع بتاعتها ..
حلو مش كدا ؟

التاني كان الدكتور امين محمود صبري
لو حد عارفه او سمع عنه
مؤسس علم الديناتولوجي
كان بيدي نبذة عن العلم دا وكيفية الاستفادة منه
وازاي انه بواسطته قدر ان يلخص منهج الفيزيا ث ع في 10 صفحات
دا اهم حاجة

المهم يعني اكيد هتقولوا طيب ايه المشكلة
انا اقولكو المشكلة

تعرفوا الوقت ال اتكلم فيه الشباب دا اد ايه ؟؟؟
او سؤال تاني / اي برنامج توك شو من بتوع الاخبار والكلام ال مالهوش لازمة بياخد اد ايه ؟

مش عاوزة اقولكو ان حتى الشباب ماحدش منهم قدر يعبر عن فكرته بالشكل ال يقدر يوصلها للمشاهد
وال ايه وقتنا خلص ..!
فانا قولت يعني عندهم وقت للرغي الفاضي
ومش عندنا وقت اننا نشوف الشباب دا وال هما امل البلد دي

بصراحة مش عارفة احنا بنفكر ازاي او امتى ربنا هيمنّ علينا ونعمل حاجة صح

يعني بدل ما كلنا عمّالين نفتي وخلاص وبنضيع وقتنا ووقت الناس
ليه مش ندور ونكتشف المواهب دي
ليه مش كل واحد يركز فتخصصه ويسكت عن الحاجة ال مش بتاعته
ليهات كتير بصراحة

بس انا تعبت من الكتابة

اتمنى اسمع رأيكو