سيما أونطة !

[أسيل رزق]

السلام عليكم ورحمة الله وبركاته

المقال ده كان فى جريدة الاخبار وعجبنى فقلت أعرضه عليكم ونتناقش فيه سوا

سيما أونطة !

لما أنت تروح السينما برجليك .. وتقف فى طابور طويل .. وتخوض معركة كبيرة علشان تقطع التذاكر وتشوف الشباب والبنات هيموتوا نفسهم يا عينى علشان يدخلوا فيلم تامر حسنى .. أكيد هيزيد فضولك وتحمد ربنا إنك فزت بتذكرة وتمنى نفسك انك اخيراً هتشوف طلعته البهية وإنت قاعد آخر انسجام فى التكييف !

وفجأة تكتشف انك شربت أكبر مقلب فى حياتك .. الفيلم بدأ وانتهى وانت بتسأل ببلاهة هو فين الفيلم ؟ معقولة هو ده الفيلم ؟ أكيد لسه هيبدأ ما هو مش معقول يكون الفيديو كليب اللى شفته هو الفيلم .. ومش ممكن يكون الحوار الهابط ده هو الفيلم ؟ طب اذا كان ده الفيلم فين الموضوع ؟؟!! . وايه بقا مشهد التواليت اللى كل المخرجين المصريين عليه الايام دى .. ومش معقولة يكون الأخ تامى فاهم ان التمثيل فتح زراير القميص واستعراض عضلاته عمال على بطال واذا كان هو فاكر كده .. طب فين المخرج وفين المؤلف .. آه ده تامر كمان كتب قصة الفيلم .. وكتب الاغانى ولحنها ويمكن يكون هو اللى أخرجه كمان .. ده ايه العبقرية دى كلها .. اسم النبى حارسك وصاينك .. بصراحة اللى بيحبوا تامر - وهن كتير - لازم ينصحوه يبطل حكاية التأليف دى .. واذا كان مصمم على التمثيل يبقى يدرسه الاول .. الحكاية مش فهلوة وبعدين بقى يقدم فن حقيقى للشباب المهووس بيه بدل ما يقدم لهم النماذج السطحية والتافهة والمريضة .. والايرادات التى حققها الفيلم مش مقياس لنجاح تامر لان النجاح مشوار طويل هو لسه مقطعش أول خطوة فيه .. الا اذا كان ده آخر فيلم هيمثله ..

الكاتبة : إنتصار دردير

أنا بقا مش عايزة اتناقش فى تمثيل تامر حسنى ولا تأليفه ده مش هيفيدنا فى حاجة

أنا بس نفسى افهم ليه الشباب دلوقتى بياخد مثله الاعلى واحد زى الاخ تامر ده وامثاله

ولما نسالهم ليه هما مثلكم الاعلى يقولوا لا الرسول هو مثلنا الاعلى

على ما أظن ان الرسول مكنش بيعلق بوستر تامر حسنى فى اوضته ولا بيتفرج على افلامه التافهة ولا بيحط صورة ليه على الايميل ولا بيتسابق مع اصحابه مين اللى ينزل شريطه الاول ولا إيه؟؟

واللى يقولك تامر إنسان متواضع جداا

بسم الله ما شاء الله هيدخل الجنة هوا بتواضعه بجد تامر واللى زيه دول ناس مكافحة كفاح فظيع

ربنا يعينهم كمان وكمان .. قولوا آآآآآآآآآآآمين