الفرقة الثالثة ... علامات على الطريق

[عاشق البلانكو الابيض]

علم الأحياء الدقيقة و علم الطفيليات

Microbiology & Parasitology

يعني ايه ؟؟

الميكروبيولوجيا : ده العلم اللي بيدرس كافة أشكال الحياة للكائنات الميكروسكوبية .. بداية من البكتريا و مرورا بالفيروسات و الفطريات و الديدان و غيرها

و يتناول بالدراسة دورة حياتها و تصنيفاتها و طرق الاصابة بها و الأمراض التي تتسبب بها و طرق الوقاية منها .... الخ .. يعني من الآخر كل حاجة عن الكائنات الدقيقة

طيب ايه الفرق بينه و بين الطفيليات ؟؟

الحقيقة أن علم الطفيليات Parasitology جزء من علم الميكربيولوجي .. و لكنه جزء كبير و مهم و له خصوصية الى حد ما .. علشان كده فصلوه دراسيا عن الميكروبيولوجي الا أنه يظل جزءا منها في الكتب و المراجع العالمية

في المادتين دول أنت بتدرس بالتفصيل العدوى Infection و التي تم اجمال النظرة المرضية لها و تأثيرها المرضي على الأعضاء في علم الأمراض Pathology

بتدرس الأمراض من وجهة نظر اكلينيكية .. يعني بتشوف ايه في العيان (أعراض Symptoms و علامات Signs ) ..

و بيتم التركيز عليها و على التشخيص Diagnosis و الوقاية Prevention & Immunization أكتر من التركيز على الباثولوجي أو العلاج

و كنتيجة لاهتمام العلم ده بالوقاية Prevention & Immunization بيلحق بيه دراسة لعلم المناعة Immunology

علشان كده تلاقي القسم اسمه Microbiology & Immunology Department