ونلتقى فى المعتقل...

[راجى طاعة الرحمن]

السلام عليكم ورحمة الله وبركاته...

طبعاً انتخابات الرئاسة جاية كمان أسبوعين وكل الناس دلوقتى بقوا سياسيين ومحللين...

بس اللى أنا اندهشت منه ومكنتش عامله حساب قوى....إن الناس تفضل أحمد شفيق وعمرو موسى لمنصب الرئاسة

استنوا.... من قبل ماتضربونى بالجزمأوضح لكم عرفت منين


طبعاً عارفين مناظرة دريم وأون تى فى الخميس اللى فات...

قريت الإستطلاعات لقيت الناس ذات الطبقات السفلى واللى يعتبره هم الأكثرية فى البلد كلهم بيحبذوا عمرو موسى على الدكتور أبوالفتوح....قلت الإستطلاعات دى مش موثوق فيها...وقلت الناس يستحيل يدوا حد من الفلول...

جيت اليوم اللى بعديه سمعت برنامج فى التليفزيون كان المذيع بيجمع آراء الناس واختياراتهم فى الرئاسة...لقيت نفس النتيجة السابقة بل انضم لهم أحمد شفيق وغلبهم هما الاتنين...وغير كدة فى ناس اتصلت بالبرنامج ولو النتائج كانت من الناس دى بس لبقى أحمد شفيق رئيس وعمرو موسى نائب والباقى خد صابونة

تخيلوا بقى إذا مسك أحمد شفيق رئيس وعمرو موسى نائب؟إيه اللى هايحصل

متهيأ لى كل واحد فينا هايلبس البدلة الزرقا ومش بعيد الحمرا وناخد مخزون مؤبد من العيش والحلاوة وبطانية ونلتقى فى المعتقل

الحاجة الوحيدة اللى فشلت الثورة إنها تغيرها هى إنها تغير تفكير الناس من التفكير الدائم فى الأكل والشرب واختيار مين يوكلهم إلى إنهم يفكروا فى مصلحة البلد...

وبأرجع أقول....

لو إحنا شعب اتغير فعلاً ربنا هايرزقنا برئيس يصوننا ويصون بلدنا وأعراضنا...

ولو إحنا شعب مااتغيرش(ودة الواضح بالنسبة لى)ربنا هايجيب لنا واحد أسوأ من مبارك لأن ربنا عطانا الفرصة نغير من نفسنا وإحنا مااتغيرناش...

شكراً لكم على حسن قرائتكم