حوار بيني وبين مقاطع للإعادة "مش هيطلع

[مسيو إيهاب]

السلام عليكم، صباح الورد يابوحميد.ـ

ــ وعليكم السلام، صباح الورد ياطيب.ـ

ـ شفت اللي حصل؟! شفت الناس عملت إيه؟!ـ

ــ الله المستعان

ـ أنا مش هطلع في الإعادة!ـ

ــ لا، بالله عليك، ماينفعش ما تطلعش!ـ
تخيـّل لو كل واحد قال نفس كلامك = هانسيبها لشفيق مخضّره!ـ
احنا دلوقت في محنة، وعرفنا مين معانا ومين ضدنا؛ يبقى اللي جي أسهل -إن شاء الله-.ـ

ـ أنا خرجت في الجولة الأولى، وعطيت صوتي للدكتور عبدالمنعم أبوالفتوح.ـ

ــ طيب، ممتاز..مارحناش بعيد! صوتك في جولة الإعادة -إن شاء الله- يكون للدكتور محمد مرسي.ـ

ـ أي واحد هيطلع مش هيطلع للإخوان، هيطلع كرهًا في شفيق!ـ

ــ وهو المطلوب إثباته، مش مهم أخرج حبـًا في الإخوان، لكن مهم جدًا أخرج كرهًا في شفيق، ماعادتش معركة الإخوان لوحدهم!ـ
الإخوان نعرف نحاسبهم اما يغلطوا، نعرف ناخد وندي معاهم، إنما شفيق مش هنعرف ناخد منه حاجه، لا حق ولا باطل!ـ
في الأول وفي الآخر ماننكرش إن الإخوان بيفكروا لمصلحة البلد؛ حتى لو بان انها مصالحهم، إنما شفيق جوز عمة مرات جمال مبارك وتلميذ ابوه وخدامه.ـ
بلاش نستسلم

ـ مش استسلام والله! أنا عارف كل الكلام ده.ـ

ــ طيب، يبقى نسيبهاله؟!ـ

ـ بس الإخوان مشكلتهم انهم بيلمّعوا غيرهم امّا ينتقدوه وينقضوه، ثقة الناس فيهم قلت كتير.ـ

ــ يعني دلوقتي ندي شفيق أصواتنا ولا نسيبها لشفيق بعدم خروجنا؟!ـ
نقعد للإخوان على كوم الشماتة؟! ولا نشوف مصلحة مصر الحالية فين؟!ـ

ـ ياسيدي أنا لا أكره أن تكون مصر إسلامية. ولا أكره إني أعيش في بلدي وسط ولادي في أمان.ـ

ــ ياسيدي الفاضل أنا لا أتكلم عن مصر الإسلامية، أنا أتكلم عن رجوع مصر لأحضان الفلول أتباع مبارك!!ـ
مع شفيق هنرجع تاني لأيام مبارك. بل بالعكس؛ هتبقى ألعن من أيام مبارك! هيبتدي شغل تصفية الحسابات وإقصاء الخصوم والانتقام!ـ
وبالمناسبة..شفيق قال: لن أطبق الشريعة الإسلامية!ـ

ـ طيب دلوقت شفيق بيقول هخلي واحد من الإخوان على رأس الحكومة. هايخلي رئيس وزراء إخواني.ـ

ــ كداب في أصل وشه!ـ
بأمارة إيه؟!ـ
بأمارة البونبوني اللي كان بيبعته للثوار في التحرير يوم موقعة الجمل؟!! ولا بأمارة ما قال: لن أطبق الشريعة الإسلامية؟!! ويزعم أنّه من نسل النبي صلى الله عليه وسلم!!ـ
كذب وخاب وخسر!ـ

ـ أنا مش مقتنع لا بشفيق ولا بالإخوان! عشان كده مش خارج في الإعادة.ـ

ــ أنا وابن عمي ع الغريب..ـ
قل لي انت مين أرحم؟ اللي بيني وبينه خلافات سياسية -كلها بتصب في صالح الوطن-، ولا اللي بيني وبينه دم ونهب؟!! بالعقل كده.. أحط إيدي في إيد اللي قتل إخواتي وسرقني وسرقهم ازاي؟!!ـ

ـ أوبا.. لا بقى، مش عاوزين نلعب ع النقطة دي! الناس كلها بتقول الإخوان هيلعبوا ع النقطة دي.ـ

ــ أنا -لحد دلوقتي- ماسمعتهاش من حد من الإخوان!ـ
بس سمعتها من إسلاميين ويساريين واشتراكيين وليبراليين كتير!ـ
مؤيدي أبو الفتوح والعوا وصباحي وخالد علي، وناس من مؤيدي عمرو موسى!ـ
وياسيدي تعال نحسبها بالعقل:ـ
مع الإخوان تضمن ترجع بلدك ولّا مع شفيق؟!ـ
مع الإخوان تضمن محدش يخبط عليك الفجر ولّا مع شفيق؟!ـ
مع الإخوان هنعيش في قانون الطوارئ ولّا مع شفيق؟!ـ
مع الإخوان مصير ابنك ممكن يكون زي مصير خالد سعيد وسيد بلال ولّا مع شفيق؟!ـ
مع كل الفصائل الثورية المحترمة ولّا مع شفيق اللي قال للأسف الثورة نجحت؟!ـ
مع روح وعزيمة الثورة ولّا مع اللي قال الثورة انتهت؟!ـ
تعرف خالد سعيد -رحمه الله-؟! ده لا كان إخوان ولا سلفي ولا له في السياسة ولا الكلام ده، ترضى ابنك -ربنا يحميه- يبقى زيه؟!ـ
تعرف سيد بلال -رحمه الله-؟! كان من البيت للجامع ومن الجامع للبيت، ترضى ابنك -ربنا يحميه- يحصل له اللي حصل له؟!ـ
الاتنين -رحمهما الله- في الآخر اتاخدوا غدر يا ولداه، واتلفقت لهم قضايا بعد موتهم! واتشوّهت صورتهم -أحياءً وأمواتا-!ـ
وغيرهم كتير!ـ

ـ على العموم المقاطعة دي موجة غضب بس، إنما مفيش حد عاقل هيرشح فلول!ـ

ــ أنا عارف والله ياطيب، بس الساكت هنا زيه زي اللي انتخب شفيق بالظبط!ـ
ولنا في من قبلنا عبرة!ـ
ربنا -سبحانه وتعالى- غضب على الذين اعتدوا في السبت من بني اسرائيل، وسخطهم قردة وخنازير، ومش كده وبس..لأ، سخط معاهم اللي شافوا وسكتوا وماأنكروش ومانصحوش! ومانجّاش برحمته إلّا اللي نصحوا وأنكروا.ـ
الإمام أحمد بن حنبل -رحمه الله- كان السجان بتاعه بيسأله: هل أنا من أعوان الظلمة؟
فقال له: أعوان الظلمة دول هم اللي بيخيطوا للظلمة ملابسهم، اللي بيحضروا للظلمة أكلهم، اللي بيجهزوا للظلمة مواكبهم. إنما انت؛ من الظلمة أنفسهم!ـ

ــ لو مارحناش يبقى كأننا بنقول لشفيق: خدها بالتزكية!!ـ
صدقني الوقت ده مش وقت تصفية حسابات! ولا وقت شماتة وفرجة! ولا وقت يصح فيه إني أعتب أصلًا!ـ
فاكر اما كنت سألتني قبل الجولة الأولى في الانتخابات: أخبار الانتخابات عندك إيه؟
قلت لك: معظم الناس اللي حواليا هنا ماسجّلتش في السفارة، ومش شاغلين بالهم.ـ
قلت لي انت: "ده الوقت الوحيد اللي لازم تقول فيه رأيك!".ـ
دلوقتي الوقت ده هو الأولى من أي وقت تاني!ـ

ــــــــــــــــــــــــــــــــــــ

انتهى الحوار.ـ
ولا يعنيني فيه -بالضرورة- إقناع الطرف الآخر.ـ
لكنّ ما يعنيني = بيان الحجة كاملة!ـ
بعدها.. على المحاور أن يترك فرصة -ولو محدودة- لمن حاوره لكي يراجع نفسه!ـ

وأنقل في النهاية كلامًا رائعًا للمهندس عبدالمنعم الشحات:ـ
ـ"جربنا الفلول..ـ
جربناهم... ففوجئنا بدول إفريقية تريد أن تمنع عنا مياه النيل، ووزراء خارجيتنا مشغولون بالرئيس وحرمه ونجله!ـ
جربناهم... فأصبحت خطوط الطيران الأجنبية العاملة في مصر أرخص وأفضل من نظيرتها المصرية!ـ
جربناهم... فلم نعد نزرع القطن الطويل التيلة، ولا القمح، واستبدلنا بهما "الكنتالوب" و"الفراولة"، وغيرهما مِن الفاكهة التي ما إن فرِحنا بها حتى عرفنا أنها تنمو بالمبيدات المسرطنة، والحكومة راضية ومتواطئة مع الوزير المسئول، حتى غضب عليه الوريث، فخرج من الوزارة معززًا مكرمًا، بينما حوكم "صبيانه"!ـ
جربناهم... فوجدنا أن مصر على أيديهم قد تقزمت، وأن المصري يُهان في بلده وفي خارجها!ـ
أعطيناهم العيش فأكلوه كله، بل ونهشوا لحمنا، ومصمصوا عظامنا! ولولا ذلك ما قامت الثورة؛ فهل نعود لنجربهم ثانية؟!ـ
إن هؤلاء شركاء في الجريمة: إما بالفعل أو بالسكوت والرضا، وجرائمهم في الشرع كالخمر التي لعن فيها عشرة!ـ
القاعدة المناسبة هنا هي قاعدة: "لا يلدغ المؤمن مِن جحر مرتين"، وهي فضلاً عن كونها قاعدة نبوية؛ فهي في ذات الوقت منطبقة تمام الانطباق على وضع هؤلاء".ـ ا.هـ؛

فيا كل متردد.. اغتنم الفرصة. ولا تضيّعها.ـ
كتبه/ أحمد رمزي أبو مريم

http://www.elmokhalestv.com/index/details/id/28106