الو الو مين معايا !!

[وردة امل]

السلام عليكم ورحمه الله وبركاته


كل سنة وانتو طيبين

ورمضان كريم ع كل الموجودين ومش الموجودين


بما أن بقالى كتير مكتبتش مواضيع لأنى مشغولة دايما
انتوا عارفين بئا المسؤليات كتير ربنا يكون فى عوننا ..

بس حبيت أشارك بموضوع تقريبا دلوقتى بقى منتشر جامد جدا وبقى شئ عادى ف اى وقت ..

وهى المعاكسات ..

بس المرة ديه عن معكاسات التلفون ..
وكمان الكلام ف موضوع المعاكسات مش بيخلص لأنه بقى حاجة أساسية ف الحياة ..

المهم ندخل ف صلب الموضوع

الشئ الأساسى اللى بيخلى الظاهرة ديه تحصل الفراغ ..
تحس أن البنئ آدمين دى فااااضية .. عالم ف الطراوة
والطريقة سهلة كل اللى عليك أنك تجيب الموبايل و تكون عامل عرض الدقايق المجانية سعادتك ..
وتضرب أرقام ف بعض وأنت وحظك
يطلعلك شيماء .. سعاد .. هريدى .. حسانين .. شرين .. عباس لو مين مش مشكلة مهو رصيد مجانى
تحت شعار ابو بلاش كتر منه

بس الحاجة الغريبة ف الموضوع ده أن الموضوع مبقاش مقتصر ع أن الولد هو اللى بيعاكس ..
لا البنات كمان بقى عندها فراغ ودخلت ف الحكاية
ونص الناس اللى بتعمل كدا بتبقى من المناطق الأستوائية اللى مش ع الخريطة
زى الـ نجوع من مراكز وأحيانا بتبقى بنات رايقة مدلعة وتربية فلة شمعة منورة
وبيبقى بالنسبالهم شئ عادى زبادى كرمب زبادى

موضوع معاكسات الموبيل دى زادت اوى وخاصة بعد عرض الدقايق المجانية اللى بيكسبوها
ف غطا ازازة كوكاكولا

..

المعاكسات ليها أنواع كتييرة أوى ..


يعنى مثلآ تلاقى رقم غريب أتصل بيك وترد عليه وتقعد تقول ألو ألو وتتكلم ..
لحد ماتحس نفسك ف ستار ميكر .. سمعنى صوتك
وياااه لو كان رخم يقعد يتصل ويكرر فيك الحركة ديه كل شوية
ماهو فاضى بئا وابو بلاش كتير منه


وفيه بقى اللى يرن ويفصل ولما تتصل بيه يقعد يكنسل عليك ..
يكنسل يكنسل وشوية وتلاقيه يرن ويفصل تتصل بيه تانى يكنسل يكنسل
وكأنك بتلعبوا حلق حوش
بتبقى نفسك تشوفه ولا تعرفه مين بس ..
بتحس أنك لو شفته قدامك هتسيب علامة ف وشه


وفيه بقى اللى يتصل بيك ويعيشك معاك فيلم هندى ..
تلاقى واحد أتصل بيك أيوه يابنى أنت فين .. مجتش ليه ..
أنت لسه ملبستش .. بتبقى عاوز تقوله أنت مين ياعم
بس بتبقى مش ملاحق ما من كتر ماهو بيتكلم ..
وبعد ما بيخلص رغى بتقوله جمله واحدة لا النمرة غلط ..
يقولك لا يراجل تقوله أه .. يقولك مش تقول ..
ع أساس أنه أداك فرصة تتكلم


وفيه بقى اللى يتصل بيك يكون عاوز يعمل أشتغالة عليك ..
يقولك أنا لقيت مقبرة دهب وأنا عارفك راجل تمام وأمين وهتساعدنا أننا نوصل الأمانة ديه بخير
وهما قالولى أتصل بيك ياباشا أنت راجل مش فلول وبتااع كدا..
بتلاقى كلام كتير وتعظيم سلام وبتحس نفسك أنك عظيم ف البلد دى


وفيه بقى اللى يتصل بيك ويقولك الرقم دا رن عليا ..
وأصلا أنت طبعا أستحالة تتصل برقم تلقائى ولو حصلت بتعتذر بأنك قاصد رقم غلط ..
بس النوع دا يحلفلك ويقنعك أنك أنت أتصلت بيه .. لدرحة أنك ممكن خليك تشك ف نفسك
مع أن ممكن يكون مش معاك رصيد من الأساس

..

الكلام كتير أوى ف الموضوع دا ..
بس الموضوع من كتر مابيحصل قلت اتكلم معاكم فيه
بس بيبقى رخامة وانا بحب أوى جو الرخامة ده
بتحس نفسك عايش ف فيلم وبتأخد دور بطولة


وردة امل