الى الامام .. ثورة .. ثورة (مجرد رأي )

[احمد أبو الخير]

انت مدرس صح ؟
اوكي
هل مرتبك يقدر يفتح بيت ؟
ان كانت اجابتك ايوه , لو سمحت قولنا ازاي عايش بمرتبك عشان نتعلم منك الله يجزيك خير
اما لو كانت اجابتك لا , لو سمحت قولنا بتشتغل ايه تاني عشان تكفي بيتك وعندي ليك سؤال تاني ... مستعد ؟
اوكي
لما وظيفتك مش بتفتح بيت يبقا ايه لازمتها ؟ اوعى تقولي دي مهنة سامية وانها مهنة الانبياء لاننا عارفين الكلام ده كويس عارفين انها مهنة سامية .. بس احنا عاوزين ناكل عيش عشان ربنا يقوينا على مهنتنا السامية دي لاننا مش هنأكل عيالنا شعارات ولا نعشهيم مهنه ساميه ولا هنسكنهم في بيت شعر وبعدين يا جماعة الراجل صاحب العمارة بياخد 500 جنيه ايجار

شكلك نسيت السؤال .. اعيد كمان مره
لما وظيفتك مش بتفتح بيت يبقا ايه لازمتها ؟

اقسم بالله نفسي اعرف ايه السبب في ان مرتب المدرس احقر مرتب في الدوله ؟؟؟ مع انه بسم الله ماشاء الله تعليم عالي وابن ناس برضو

كمان حد يعرفني ويفهمني .. ليه كل مسئول في الدولة لما يجي يتكلم عن تطوير التعليم يتكلم عن تطوير المناهج والثانوية العامة والجوده ونبني مدارس ومش عارف ايه ولا يجرأ انه يتكلم في حقيقة مرتب المدرس , ولما ربنا يكرمه ويتكلم تكون جملة تايهه وسط كلامه والسلام

اتمنى ان كل واحد يخلص في عمله بنفس القدر اتمنى ان كل واحد ياخد حقه لان دا ظلم للمعلم والمعلم اللي يسكت عن الظلم يستاهل انه يتظلم اكتر واكتر

بس يعني انا برضو مش عارف وفي نفس الوقت مش فاهم : ازاي عيل واخد دبلوم وعنده 23 سنه مرتبه اضعاف مرتبي مع اني وبلا قخر مؤهل عالي وخبرة جامدة وعندي 35 سنه

يا جماعة انا والله هتجن .. الدنيا بتمشي بضهرها ولا ايه .. ايه العك اللي احنا فيه ده والعك ده مالوش انتهى ولا ايه

من الاسباب اللي هتخليني اتجن : ازاي مرتب المعلم اقل من مرتب عامل بوفيه في شركة محترمه وعاوزينه يشتغل ؟؟؟ ويقولك يا عم مهنتكم لا تقدر بمال .. دي مهنة الانبياء .. طيب ماهو المعلم عندو اولاد هيأكلهم طوب يعني

بس انا لقيت حل ... لاااااااااا حلووووووووووول

1- انك تعمل ثورة ودا حقك وسيبك من اللي يقولك مصلحة البلد (((ان لم يكن بلد محترم ويكرمني فلا عشنا ولا عاشت البلد)))
2- اشتغل مدرس وبعد الضهر اشتغل في أي محل ولو مالقيتش اشتغل في الفاعل
3- اشتغل مدرس وبعد الضهر اشتغل سواق تاكسي
انا بتكلم عن المدرسين اللي حظهم زفت ومش بيدو دروس , بس في ملاحظة لان الجهل كتر في بلدنا ((( نسبة المدرسين اللي بيدو دروس خصوصيه اقل من 10%))) يعني انا بتكلم عن 90% من المدرسين الغلابه اللي ساكنين في نجوع وكفور وصعيد وقرى وحالتهم مايعلم بيها الا ربنا

يا ترى عرفت هتصرف زكاتك فين السنه دي ؟؟؟

دا مجرد رأي .. اللي عاوز يشاركني فيه يتفضل