حكاية صورة قديمة نادرة

[المريسي]

زفة العروسة سنة 1896م
كانت العروسة بتقعد جوه مكان اسمه ( هودج ) وهو زي الغرفة معمولة من الخشب ولها شبابيك عليها ستاير، وطبعاً بيكون الهودج مزخرف من بره وجوه، وكل أسرة حسب إمكانياتها
بتقعد العروسة جوه الهودج هي وأمها أو أختها أو صاحبتها وبيتحط بين جملين، جمل قدام وجمل ورا زي مانتوا شايفين في الصورة، وكل جمل عليه زينة وأجراس بحيث يعمل صوت وهي ماشي، وبيكونوا ماشيين في الأول
وراهم فيه جمال تانية وعليها ( هوادج ) فيها أقارب العروسة الستات، وبعدين وراهم جمال شايلة صندوق فيه كل حاجات العروسة، اللي بنسميه الوقتي ( الجهاز ) وبيكون فيه ذهبها وعفشها وملابسها وأدوات الزينة ... إلخ، وبيفضلوا ماشيين من بيت العروسة لغاية بيت زوجها

الهودج معمول أصلاً عشان يحتفلوا بالعروسة وتمشي وسط الناس في اليوم ده من غير ما تكون باينة للناس كلها
الصورة متصورة عند الحد الشرقي للقاهرة الفاطمية، يعني عند جبل المقطم، والمباني اللي شايفينها لسه موجودة زي ما هي