احنا نازلين يوم 25 يناير نستكمل مطالب الثورة و نسقط مرسي

[علوة حامد]

ألو...أيوة يا لينا

احنا نازلين يوم 25 يناير نستكمل مطالب الثورة و نسقط مرسي

أي نعم معانا فلول و ناس عمرها ما عرفت يعني ايه ثورة...بس برضه هانستكمل الثورة

مرسي معملش أي حاجة...أينعم هو طير حكم عسكري و خد صلاحيات رئيس و طير النائب العام و دستورية مبارك...بس برضه ماعملش حاجة

و بعدين الثورة قالت حرية و لازم نطالب بيها...أينعم القنوات و الجرايد و الأحزاب نازلين شتيمة في الريس و ماحدش بيقربلهم و كل حزب بيعمل اللي هو عايزه...انما برضه ديكتاتور

ماتنسيش كمان انه باع القضية الفلسطينية و صاحب الاسرائيليين و بعت جواب لبيريز قاله :صديقي العزيز....أينعم احنا أصلا بايعين أم القضية الفلسطينية و كل شوية نقوله فكك من فلسطين و حماس و الجو ده...و أينعم كمان هو كان الراعي الرسمي لعملية عامود السحاب اللي حماس فحتت فيها اسرائيل...انما برضه عيب يقول لبيريز في الجواب صديقي العزيز

وبعدين فين شيل الزبالة و فين العيش...أينعم هو مامعاهوش محليات و لسة بيطهر في أجهزة الدولة و كل ما يعمل تطهير ننط و نقوله أخونة...و أينعم جاب وزير تموين ظبط قصة رغيف العيش و هايوصل لحد البيوت بعد كدة...انما برضه اعلامنا بيقولنا انه هايحدد 3 ترغفة بس واحنا لازم نصدق اعلامنا مش نصدق حكومة مرسي

و بعدين احنا انتخبنا مرسي مش المرشد...أينعم احنا أصلا قاطعنا الانتخابات ساعتها...و أينعم اللي انتخب مرسي انتخب الاخوان مش عشان ميت في دباديب مرسي....انما برضه يسقط حكم المرشد

سلميلي على أمي يا لينا