كرهت نفسى واهلى والناس

[يوسف 1995]

السلام عليكم ورحمة الله وبركاته
انا جديد هنا فى المنتدى الجميل ده وحبيت اكتب مشكلتى واشوف الردود

انا الحمد لله انسان طموح ومتفوق فى دراستى.بس للاسف ربنا رزقنى بأب متسلط جداااا وام بتخاف عليا بطريقة مرضية
على العموم المشكلة انهم دايما شايفين هما الصح وبس وغيرهم لا
********
بداية المشكلة
انى فى المرحلة الاعدادية حطونى فى مدرسة زبالة وحقيرة جدااااا لا فيها تعليم ولا تفوق ولا طلاب كويسين ولا اى حاجة ولا فيها اى حاجة تشجع الواحد انه يذاكر كل اللى فى المدرسة تحت الصفر.
وبم ان المرحلة دى مهمه جدااا انها بتهيأ الواحد للثانوى فأنا الحمد لله دخلت ثانوى منها متحطم وكاره كل حاجة وكاره المذاكرة والكتب لان عدم وجود تحفيز فى المدرسة وطبعا مكنش فيه دروس .كان سبب انى مطلعش من اوائل محافظة اسيوط مع انى الحمد لله مش عايز اتكلم عن نفسى بدال متقولوا مغرور ولا حاجة.
**********

ده مش كده وبس.دنا لما اناقشهم ياخدوا كلامى نظام ودن من طين وودن من عجين وبيصل الحد للاهانة (انت فاكر نفسك مين .فلان فيها وفلان طلع منها و...........)
المهم دخلت ثانوى وانا متعقد جداااا.وطبعا شايف زمايلى داخلين مدارس فيها شغل واهتمام ومسابقات واهاليهم مهتمين بيهم (علميا) ودى الحاجة الوحيدة اللى تنقصنى.
على العموم دخلت مدرسة ثانوى وقلت خلاص اشد حيلى فى ثانوى ( انا طالع الاول من1 ابتدائى ل3 اعدادى)
لقيت المدرسة كلها مقلوبة عليا بم ان بابا ناظر المدرسة وبشتم وبسمع كلام تلاقيح وان بابا عطانى الامتحانات وكوسة و..........................................منتوا عارفين المصريين
ومكنش عاجبنى نظام ان المدرسة كلها مراقبانى 24ساعة لو كحيت يبقى مصيبه وبلوة وازاى ده يحصل مينفعش




قلتلهم عايز انقل مدرسة تانية.نفسيتى مش مرتاحة فى المدرسة دى ومش بذاكر
وكان الرد...(انت فاكر نفسك مفيش منك...انت متكبر على ايه...مدرسة بيطلع منها دكاترة ومهندسين و........................................)

وعدت سنه اولى من غير ما افتج كتاب وفشلت ونفسيتى ادمرت ودخلت سنه تانية نفسيتى بايظة على الاااخر وفشلت اكتر واكتر خلاص مبقتش طايق سيرة التعليم.
ودخلت 3 وانا حاليا فى قمه البوظان والفشل والاكتئاب
وانا بيجيلى شعور انى عايز انتحر بعد ما زمايلى بقوا فووووووق وانا فى سابع ارض وناس كتير كنت امسحهم باستيكة خلاص بقوا يبصولى من فوق لتحت على اساس انى مش مستواهم
بقيت اكره الناس كلهااااا وبكره نفسى


المشكلة فى مين.......فيا ولا فيهم.........هل انا فعلا كنت بزود فى المواضيع ولا من حقى انى اعمل الحاجة اللى انا شايفها كويسة ليا لانى عارف مصلحتى كويس وانا اللى بمر بمواقف هما مش عارفينها وانا مش بحب اتكلم كتير فى مشكلاتى
والمصيبة بيكلمونى على انهم مش عارفين انهم السبب فى انى اجيب مجموع وحش جدا فى المرحلة الاولى.وانا صابر على ااخرى لانى ممكن انفجر.بيعاملونى وكأنى عبيط متخلف مش عارف حاجة...اهو اى حاجة وخلاص المهم انهم الناصحين واللى عارفين كل حاجة



يارييت تدعولى بالهداية ومستنى الرد