إيه اللى المفروض يحصل الفتره الجايه :)

[To Be Is To Do]

أولا كده : مبروك لكل الناس اللى ربنا كرمها بمجموع كويس وهى دلوقتى مطمنه انها ان شاء الله فى الكليه اللى نفسها فيها
وبالنسبه للناس اللى خانها الحظ صدقونى ربنا له حكمه فى كده أكيد انتوا زعلانين بس قدام حتعرفوا ان ربنا قدرلكم الخير

ثانيا : الخطوه الجايه هى التنسيق وسحب الورق من المدرسه
التنسيق : اللى بيحصل فيه انه بيتقسم على 3 مراحل كل مرحله بيقولوا فيها انها لغايه مجموع كذا يعنى كل واحد حيعرف اذا كان مرحله اولى او تانيه او تالته
بعد كده حيحددوا لكل مرحله عدد ايام معين لتديم التنسيق فيهم والتنسيق عباره عن ان ف كل محافظه كذا كليه بتقوم بعمليه التنسيق دى انت بتروح الكليه اللى ينفع تعمل تنسيقك فيها هناك حتقعد على كومبيوتر خاص بيك تبدأ تحط بيانات اسمك ورقم جلوسك ومحافظتك والشعبه وما الى ذلك يعنى وتبدأ تختار الكليات اللى انت عايزها هى تبتبقى مكتوبه جاهزه مجرد انت بتختارها عاده التنسيق بيبقى مرتبي الكليات دى حسب بعدها وقربها من محافظتك تسهيلا عليك خلاص اخترت كل الرغبات انت كده عملت التنسيق تقريبا بيدوك ورق يثبت انك عملت تنسيقك وبتنتظر مش فاكر قد ايه حوالى اسبوع ممكن او اقل من كده وتظهر نتيجه التنسييق وتعرف انت قبلت فى كليه ايه وتبدأ المرحله اللى بعدها وهكذا ... على فكره ينفع تدخل على موقع التنسيق من بيتك وتقدم عادى جدا بس أضمنلك تروح الكليه تعمله
طب اللى جايب الحد الادنى لكليه بس مش فى محافظته فيه حاجه اسمها تحويل الكترونى ( على النت بدون اى فلوس ) ودى بتظهر بعد نتيجه التنسيق ما تظهر بتدخل على الموقه بتاع التحويل تكتب جالك كليه ايه وانت عايز تحول لنفس الكليه بس فى محافظتك بتنتظر برده فتره قصيره وتظهر نتيجه التحويل ونسبه كبيره جدا من التحويلات بتتقبل على اساس انك بيبقى فالك درجتين تلاته اربعه مثلاا على الكليه فى محافظتك والتحويل ده بدافع ( تقليل الاغتراب ) ، فيه تحويل ورقى وده بفلوس للناس اللى ناقصها كتير على مجموع الكليه فى محافظتها وبيتقبل برده ان شاء الله

سحب الورق فى المدرسه : المفروض كل واحد يروح مدرسته ياخد شهاده الثانويه العامه وتسحب ورقك منها تقريبا عبارهع عن شهاده الاعداديه واصل الميلاد ( كومبيوتر ) ده اللى متذكره يعنى المهم تروح تسحب ملفك من مدرستك ومش حتعمل بيه اى حاجه خالص غير بعد ما تظهر نتيجه التنسيق ويتقالك تروح تقدم فى الكليه اللى قبلت فيها وساعتها حتنزل ورقه فيها الحاجات اللى طالباها الكليه وهى الصور وطوابع وشويه ورق تانى هما حيقولولكم عليه

ثالثا : التظلمات :_ فيه ناس كتير اوى بتتظلم كل سنه فيه منهم بياخد حقه بعد التظم ودول نسبه بسيطه اوى وفيه منهم مش بياخدوا حقهم ودول الاغلبيه
التظلم :_ بتروح البنك تدفع 100 جنيه حتاخد وصل منه تروح المدرسه اللى بيتعمل فيها التظلم وتديهم الوصل وتملى استماره باسمك ورقم جلوسك والاداره وامدرسه والماده ويدوك معاد غالبا بعد اسبوعين .. اللى بيحصل بيصولوا ورقه الاجابه وتروح تشوفها ويدوك ورقه تكتب فيها ملاحظاتك وتطلب نموذج الاجابه الرسمى وتراجع ورقتك وتكتب انت مظروم فايه ؟ وبعد الاسبويعن تروح تسأل يا زادت يا فضلت زى ما هى مش بتنقص حتى لو تستحق انك تنقص
4 حالات بتاخد فيهم درجات : المرايه انك تكون واخد مثلا فى السؤال فى الورقه 5 وفى المرايه كاتبلك مثلا 3 سهوا يعنى ،، تكون كاتب زى النموذج بالظبط وعاملك على السؤال غلط ،، غلط فى التجميع ،، سؤال مش متصحح او جزئيه من سؤال
غير الحالات دى تقريبا نادرا ما حد بياخد درجات
لو اخدت درجات بترجعلك ال 100 ج لو مخدتش درجات استعوض ربنا فيها
ممنوع تاخد مدرس معاك وانت بتتظلم الا اذا كان والدك او والدتك مدرسين لان اللى ينفع يدخل معاك التظلم اقارب درجه اولى فقط ( والد والده اخ اخت )

لو حد محتاج يستفسر عن اى حاجه انا تحت امره الفتره الجايه