ملتقى طلاب الصف الثالث الثانوى (علمى علوم) 2014

[Abdallah Omar]

المشاركة الأصلية كتبت بواسطة lally adel

الكيميا فعلا الجزء اللى مطلوب منكو سهل جدااااا و ممتع و كله تشغيل دماغ .. فهتبقى ان شاء الله مريحة بالنسبة ليكو ..
تذاكرها ازاى بقى .. شوف يا سيدى ..
انت مثلا النهاردة اخدت درس الكيميا بتاعك .. هتروح تمسك الجزء اللى انت هتذاكره ده .. تتاكد الاول ان اامصدر اللى انت هتذاكر منه مطاااابق لكتاب المدرسه .. و تمسك بقى الجزء ده تفصصه حتة حتة ..و معاك ورقه و قلم .. تقرا الفقرة دى مثلا او الجزئيه دى و تطلع كل المعلومات اللى فيها ف الورق بتاعك ده .. يعنى مثلا انت قريت كام سطر كده .. تقول ااه .. ممكن يجيب سؤال على الجزئيه دى بيقول علل كذا كذا كذا .. و تكتبه ف الورق .. ف هتبقى الاجابه كذا كذا كذا و تكتب الاجابه دى تحت السؤال كده .. و تقوم قاريهم تانى على بعضهم السؤال بالاجابه ..و اهم حاجة انك تكون فاهم اللى بتكتبه ده .. و كذلك التعريفات .. تكتبها كل بايدك ف الورق ده ..و تجمع مثلا القوانين بتاعة المسائل كلها ورا بعض .. بحيث انها تبقى كلها قدام عينيك .. و تحاول تعمل اشكل او اشارات تفكرك بالقانون عشان يثبت ف دماغك .. و تحل الامثله المحلولة بنفسك .. يعنى تقرا المثال و تخبي اجابته و تحاول تحله بنفسك باستخدام القوانين دى و بعدين تراجع اجابتك و تتاكد انها صح ..
كده خلصت المذاكرة ندخل بقى ف المهم .. اللى هو الحل .. لو ذاكرت و محلتش يبقى و لااااااا اكنك عملت حاجة .. تمسك التمرين من اوله لاخره تحله .. بما فيه اسئله العلل كلها ان شالله تكون 100 سؤال .. حتى لو فى اكتر من سؤال ليهم نفس الاجابه .. اكتب الاجابه ف كل مرة من اول و جديد .. خد بالك الحاجات دى تتحل تحريري عشان فى ناس بتحلها شفوى .. لا لازم بالكتابة .. و تمسك بقى كل الاسئله حتى لو كانت معاقه او غبية برضه حاول فيها .. و بص ف ملحق الاجابات مش عيب .. بس لو مثلا انت راجعت اسئلة الاختياري من الملحق بعد ما حلتها كلها و لقيت عندك كام واحده غاط تعمل ايه .. تحط علامة ع السؤال الغلط دة و تعديه .. لحد ما تخلص مراجعه اجابات الاختياري كله .. تمسك بقى الاسئلة اللى انت حليتها غلط دى و تقرا سؤال سؤال تانى و تشوف .. هل انت مثلا قريت السؤال اول مرة غلط .. او عينك خدعتك ..تقوم مصلحه على طول و تتاكد انك صلحته للاجابة الصح .. طب لا شايف ان الاجابة اللى انت عاملها دى هى الصح و مش شايف فيها حاجة غلط .. تشوف بقى من الملحق ايه الاجابه اللى هو مجاوبها و تفتح كتاب الشرح ع الجزئية اللى فيها السؤال دة و تدور على الاجابه .. لقيتها و اقتنعت انها فعلا صح و انك غلط .. يبقى اديك اتعلمت نقطة مهمة مكنتش واخد بالك منها .. مالقتهاش و مش مقتنع بالاجابة اللى ف الملحق دى تنقل السؤال ف ورقه و تروح توديه للمستر و تفهم منه ليه السؤال متجاوب كده .. اووووووعى تطنش اى اسئله من النوع ده ..
بمجرد ما تخلص التمرين كله هتلاقي نفسك ايديك اتكسرت من الكتابه طبعااا بس معلش .. هتلاقى ف الاخر ان الجزء اللى انت ذاكرته انت كتبته بايدك يجى ستيييين مرة .. و دة هيساعدك ع الحفظ و تثبيت المعلومة ..و بس كده

كتب الكيميا اللى انا جربتها .. الامتحان " لا يعلى عليه طبعا" .. و مندليف " شغال يعنى مش وحش ".. و الوسام " كبر دماغك من الشرح اللى فيه عشان ساعات بيزود حاجات من عنده .. ادخل على الاسئله على طول

اسفه ع الاطاله

شكرااااااااااااااااا جزيلاااااااااااااا حضرتك أنا متبعك دايما وربنا يخليكى لينا

طيب حضرتك فى الفيزياء بيبقى فى أفكار جديدة وأنا مش عارف أيه الكتاب اللى فيه الأفكار دى لو حضرتك ممكن تفيدينى وشكرااااااااااااااااا