هو احنا مش هنخلص منه بأى؟؟؟؟!!!!!

[C A N D Y]

57 مليون جنيه تمن حملة واحدة لغرض واحد
57 مليون جنيه دفعوا لتبرئة اسم رجل من الاتهام , و لكسب حب الناس رغم ان الكتير بيكرهوه
57 مليون جنيه دفعهم رجل واحد..مما يجعلنا نتسائل هو عنده كام فى البنوك؟؟؟!!!

المبلغ الكبير دا دفعه احمد عز عشان يبرأ اسمه من كل الاتهامات اللى ضده ..و ما اكترها

من اول تدمير الحياة السياسية فى مصر لحد تدمير الحياة الاقتصادية و بالتالى تدمير الحياة الاجتماعية

هو ليس الا المشهور احمد عز (لأ انا مش بتكلم عن احمد عز الجميل بتاع السينما اللى المفروض يغير اسمه..انا بتكلم عن التانى الوحش)

الرجل التانى فى الحزب الوطنى بعد جمال مبارك

فى اخر خمس سنين اصبح عز من اكثر الرجال تأثيرا فى مصر فهو يقود الحراس الجدد اللى طردوا القدام من الحزب الوطنى و هو اللى بيتحكم فى البرلمان من خلال نظرة واحدة لاعضاء الحزب اللى مش انا لواحدى بقول عليهم "خراف"

اه خراف..مشفتوش جلسة مناقشة قانون الاحتكار لما اعضاء الحزب رفضوا التعديلات و رفعوا ايديهم ..بنظرة واحدة منه كانت اياديهم كلها تحت فى ثانية واحدة

المشكلة مش انه سياسى
المشكلة انه رجل اعمال بيستفيد من نفوذه السياسى
فقد كان رجلا ناجحا و كان يملك حديد عز و Gemma Ceramics بس بشكل ما بدأ جشعه ينفجر عندما انضم للحزب الوطنى و بدأ يكتشف الثروة اللى ممكن يجنيها من نفوذه السياسى

و للناس اللى مش عارفين عز
فهو اول منتج للحديد فى مصر
فقد اشترى مصنع الدقهلية للحديد من الحكومة بسعر اقل من قيمته الفعلية و بعدين بدأ لعبه ....للاحتكار
مش احتكار بالظبت يعنى عشان فى لاعبين كتير فى السوق المصرى
بس طبعا عز كان طول عمره هدفه انه يبقى اللاعب الوحيد

من غير تفاصيل زيادة عشان انا زهقت من سيرته
خلق عز احد اسوأ الحالات الاقتصادية فى مصر خلال اخر عشر سنين
ازمة الحديد
فقد كان السبب فى ارتفاع سعر الحديد بشكل جنونى مما صعب الامر على الكثير
اكيد طبعا رفع المقاولين اسعارهم
و اشمعنة الاسمنت سعره ميزدش
طبعا دا جاء فى نفس الوقت بتاع الموجة الجديدة للاسعار اللى بتزيد
يعنى خلى الدنيا دمار


عز كان بيهاجم كتيييير فى الجرانين المعارضة و المستقلة
و على الرغم من صلته بمبارك و ابنه
و زواجه من شاهيناز النجار
الصحف مكانتش بتفضى من نقد لاذع له كاساس يومى
و لم يهتم عز فقد كان اهدأ من الصمت
مما جعل الناس يثيرون عليه
فقد كان اكثر غرورا من ان يرد على احد
مما زاد الناس كرها له

و لكى يقلل من كره الناس له قام ببث حملة علاقات عامة لتبرأة اسمه من كل الاتهامات ضده من الاعلانات الى الاصدارات الصحفية الى اللقاءات فى الشهور الاخيرة
خفض اسعار الحديد فى السوق
و لسة الناس مش مقتنعين(طب عايزين الراجل يعمللكوا ايه يعنى مش كفاية انه سايبكم تعيشو)

قال انه هيتبرع بالحديد لمشروع اسكان الشباب
و رفضوا عرضه
و فضلوا ان بيوتهم المستقبلية تتبنى بنظام
bearing wall
بأى فى كره اكتر من كدة

بعد كدة عمل لقاءات فى جرانين زى المصرى اليوم
و بردو معرفش يضحك ع الناس

اما بأى حواره الرهيب مع منى الشاذلى خلى الناس تكرهه اكتر من اى حاجة تانية
كفاية المكالمات اللى الناس فيها كانوا على وشك انهم يشتموه

و فى الاخر يدفع 57 مليون جنيه عشان الحملة بتاعته
بس الفلوس دى راحت ع الارض
لان الناس لسة بيكرهوه و لسة مش طايقينه

و انا اعتقد انه وصل لمرحلة انه مش فاهم اصلا هم ليه الناس كارهينه
وصل لنقطة انه افتكر انه ممكن يخدع الناس بالاعلانات و اللقاءات
مش مصدق ان مهما كان الشعب المصرى سلبى عمره ما يكون غبى او مغفل
الشعب المصرى طول عمره من اذكى الشعوب

و تفكيره دا ما هو الا انتحار سياسى

و انا عندى احساس ان احمد عز هيتحرق قريب
لانه بقى مستهلك
فهو طلع لسماء السياسة بسرعة قد تكسر عنقه فى اى لحظة

و انا مش عندى امل ان مصر تتصلح قبل ما احمد عز يسيبها
لان الفساد الحقيقى الجامد اوى مبتداش الا لما هو ظهر


مجرد وجهة نظر