تكمله(فكرت تدخل قصر البارون؟انا دخلته)

[C A N D Y]

اولا ميرسى جدا يا زيزى( ياللا عشان التنوع:D ) ع المجهود الرهيب ..الموضوع اكتر من رائع انا عارفة ان ردى جاء متاخر شوية شويتين عشرة كدة بس انا قلت اسال الاول عن قصر البارون و بعدين اقرأ الحلقات كلها مرة واحدة و ارد ..و عجبتنى الحلقات التانية كتير ..خاصة الرابعة رهييييبة ..بجد كانت قصص ممتعة كتير ميرسى جدا و على فكرة الفكرة طلعت فى راسى جدا و ناوية اروح( متخافيش قصدى اروح الصبح مع الزوار) ..و على فكرة فى ناس قرايبى راحوه بليل بردو و عادى يعنى مش جرالهم حاجة و هو دا اللى مخلينى مستغربة لان الكلام عن القصر دا كله متضارب..بس ميرسى بجد ع القصص كنت هقوللك مستنية الباقى بس انا اتكلمت مع شموخ و لو بتحبينا انتى بلاش تكملى و يا جماعة كل اللى يهمه زوزو يقوللها مش تكمل عشان حرام هى تعبت بجد ..المهم انتى يا زوزو و بجد انتى مش ليكى دعوة بأى حاجة و هم كلهم بيهزروا يعنى هو حد كان عمل ولا حتى هيعمل حاجة بجد .. ترجعيلنا بالسلامة يا قمر

الاخ Dark Zone

اولا قصتك لخبتتلى الدنيا فى بعضها و جيت اقرأ قصة سيندريلا افتكرت محمد هو اللى مات و الدنيا باظت:D

دلوقتى انا قدامى حاجتين ..ان انا اصدقك او مش اصدقك و اكيد لازم تعذرنى فى دى لانى مهما صدقت حاجة من ع النت اكيد هيبقى فى نسبة من الشك ..ناو انا هتكلم من منطلق ان انا مصدقة كل كلمة انت قلتها..بس مش شرط انى اصدق تفسيرك للاحداث

عايزة اقولك ان انا حاسة بيك لان ان انت تفقد صديق عزيز عليك احساس وحش كتير و مش هيحس بيك الا حد فقد انسان عزيز و انا لسة السنة اللى فاتت فاقدة حد عزيز كتير عليا والله احساس وحش كتير لا اتمنى لاحد ان يحسه و كمان الانسان دا توفى من هبوط مفاجئ فى ضغط الدم يعنى فجأة كدة من غير مقدمات بس على الاقل عارفين اسباب اما صديقك فتوفى فى ظروف غامضة و ممكن انت تكون حاسس انك عليك ولو حتى جزء صغير من اللوم عشان كدا انا عارفة مدى الحزن اللى انت حاسه و اللى اكيد مفيش حد تانى حاسه ولا حتى انا

بس يا ريت الحزن دا مش يخليك تتصرف غلط و تعمل حاجات من غير ما تعرف عواقبها
اولا انت غلطت لما لقيت صاحبك فى الحالة دى و رحت سألت شيخ او حتى منجم
الله تعالى قال و اسألوا اهل الذكرى
انا هقوللك اللى انا شايفاه صح و ممكن انت تسأل دوكتر
هو تامر كان اكتر واحد فيكو خايف
و دخل القصر و شاف او تهيأ حاجات الله اعلم
و رجع بيته شاف حاجات تانى
وصل خوفه لدرجة الرعب
و اصيب بحالة نفسية خليته فى حالة لا وعى بدليل انه راح القصر تانى لواحده
و حالته النفسية ساءت مما دفعه الى الانتحار
و الجملة ممكن او اكيد هو اللى كتبها لان بردو فى علم النفس الواحد لو مؤمن بفكرة و مسيطرة عليه ممكن يعمل بنفسه حاجات و يصدق ان غيره هو اللى عملها
لو كنت سألت دوكتر كان قاللك كدة
لان مس الجان و الحاجات دى انا مش مصدقاها خالص
و عشان كدة عمرى ما بخاف
لان مفيش حد يملك انه يؤذينى غير الله تعالى
مفيش جن هيخلى حد ينتحر

و بردو انت مصمم تغلط تانى
اللى بيروحوا لمنجمين دول سورى والله بس لازم اقولها (كفرة)
انت حزنك خلاك مش عارف تفكر كويس
استعيذ بالله و ارجع تانى عشان مصيرك ميكونش زيه لا قدر الله يعنى بس انت فى الطريق الى كدة
انا مش بقول جن يقتلك
انا بقول تتملكك الافكار الغريبة و تصاب بمثل حالته بردو لا قدر الله

مهما عملت فمقدار ما يعلمه كل اليشر عن الجن لا يتعدى 10% من اللى يعرفوه عننا

و صدقنى انت رايح لناس غلط و ماشى فى طريق غلط يا ريت ترجع منه قبل ما تندم

حاول تنسى الموضوع
ركز انا قلت تنسى الموضوع مش تنسى صاحبك
اشغل نفسك بحاجة تانية او ارجع ايتالى
متخليش اوهام تسيطر عليك
و اقدم اعتذارى مسبقا على اى حاجة ممكن تكون ازعجتك من كلامى
فى رعاية الرحمن