هل توافق على تأجيل الدراسة بعد يوم 22 /2

[د.عبدالرحمن المنياوي]

الدراسة .. هل تعلمون معنى هذه الكلمة ؟؟

الدراسة: يعني الراجل اللي بيروح يشرب الشاي ويستنى الجرس يضرب عشان ياخده الكوباية معاه من أوضة فيها مدرسين لأوضه فيها طلبة .. والاسم معلم ..

الدراسة: يعني الولد والبنت الصغيريين اللي بيصحوا قرفانين الصبح من كتر السهر عشان يشوفوا عُقَد المدرسين اللي بتطلع في وشهم ..

الدراسة: يعني طالب أو طالبة الثانوي اللي لو راحوا أصلا المدرسة بيبقوا رايحين كمالة عدد .. عشان نسبة غيابهم .. هو بيفكر في اللي واخده في الدرس .. ومدرسه بيفكر ازاي يجيبه عنده الدرس ..

عشان كده المعلم والطالب مش عاوزين دراسة وبيكون موعدها ثقيل على قلبه .. لأنهم ببساطة كل منهم يعي فساد المنظومة ويرى في نفسه ضحية لهذا الفساد ..

تعالى بقى أقولك مين اللي بيستفيد من المنظومة دي ..

الوزير ومستشاروه: ودول عالم عايشين ملوك في قلعة منفصلة معندهمش فكرة عن المعلمين .. وأتحدى أي واحد منهم من اول الوزير إلى أقل مستشار إنه يكون عارف مفردات مرتب معلم مساعد .. وهيعرفوا ليه ؟؟ ماهم لاهم معلمين ولا عايشين في مدارس .. ومادام الجيب ماليان ماتسألش عن الغلبان ..

موظفو ديوان الوزارة: ودول ناس تقدر تسميهم طبقة الإقطاعيين في المنظومة دي .. هم واخدين حقهم تالت ومتلت ونازل عليهم البدلات والمكافآت اللي المعلم بيسمع عنها فقط التلفيزيون ..

موظفو الوحدات الخاصة: ودي وحدات تابعة للوزارة زي الأكاديمية وةالجودة والتطوير المناهج وحاجات كتير زي كده .. ودول عبارة عن معلمين أمهاتهم داعية لهم وتم انتشالهم من قعر الحلة ليذهبوا لأماكن غامضة محدش عنده فكرة عن تعاملاتهم المادية ولا المعنوية غيرهم هم فقط .. حاجة كده زي المنطقة 55 في أمريكا بتاعت التجارب الفضائية والنووية .. غامضة بس تحس انهم احسن منك ..

وكل دول طبعاً مش بتفرق معاهم الدراسة عودتها أم لا .. فهم مستفيدون طوال الوقت ..

يبقى تيجي الدراسة انهاردة تيجي بعد شهر .. النتيجة واحدة .. لا يوجد تعليم .. ولا يوجد متعلمين ..