-حضرتك هتشارك فى الانتخابات؟

[any name]

-طبعا هشارك, دى اهم انتخابات فى تاريخنا و هيتوقف عليها مصير البلد لعشرات السنين
-طيب أقدر اعرف قررت هتصوت لمين, و لا مستنى تشوف برامج المرشحين و بعدين تختار؟
-لا برامج ايه و بتاع ايه, السيسى المنقذ طبعا, محدش ينفع غيره أصلا
-بس فى مخاوف من انتخاب السيسى تتعلق بالتطور الديمقراطى و الحريات, الموضوع ده مش قالقك؟
-مش فاهم حضرتك تقصدى ايه
-يعنى فى مخاوف من احتمالات عودة الدولة الأمنية و اغلاق المجال السياسى و تحجيم المعارضة و تقييد حرية التعبير و التضييق على مؤسسات المجتمع المدنى و حقوق الانسان
-لا الكلام ده يهمكوا انتوا يا مثقفين, لكن انا مايكولش معايا بنكلة, انا مواطن عادى, مشاكلى و احتياجاتى مختلفة تماما, الأمن, الحد الادنى للاجور, الكهربا, البوتجاز, التعليم, الصحة, هى دى الأولويات العاجلة اللى ماتنفعش تتأجل و اللى هنتخب على اساسها, لما تتحقق نبقى ندور ساعتها ع الحريات و حقوق الانسان و الكلام ده
-طيب ما بتفكرش تنتخب حمدين؟
-لا حمدين ايه, حمدين مينفعش خالص
-ليه لأ, ده بيقول ان البرنامج بتاعه بيقدم حلول لكل المشاكل دى
-حمدين؟ قولى يا باسط. انتى بتصدقى؟ اللى خلا السيسى نفسه بجلالة قدره لا هيعرف يحلها و لا ييجى جنبها أصلا و هتتطين زيادة و هتتطربق فوق دماغنا كلنا, يبقى حمدين هو اللى هيعرف؟