سخرة ... مسخرة

[sadq]

وقع يا أستاذ
على إيه يافاندم
تحضر قبل اللجنة بساعة
حاضر يافندم
اليوم بثلاثة يا أستااذ ومافيش اعتذارات ولا تأخير ولو وأبوك اتوفى قلنا قبليها بثلاثة أيام
ماشى يا فاندم
الساعة 8 صباحا
وقع على لجنتك يا أستاذ
حاضر يا فاندم ، مين معايا ملاحظ
مفيش يا أستاذ انت لوحدك عندنا عجز ، وعلى فكرة اللجنة (دوبل) يعنى لجنتين واحدة أولى إعدادى ب(32طالب ) والثانية ( 22 طالب) ثانية إعدادى يالله ورينا همتك رص الدكك وقعد الطلاب ووزع الورق وراجع البيانات واكتب الغياب واضبط لجنتك الدوبل وأى خطأ هتتحمله لوحدك وممنوع أى تجاوزات وشهل شوية ، معلش يومين وهيعدو.
على رأيك يومين وهيعدو وبعدين هو مين يعنى هيمنع الغش المهم نظبت الأوراق ونرتبها.
الحمد لله اللجنتين خلصوا أخيرا
على فين يا أستاذ عندك تصحيح لغة عربية
ازاى ده كدة يبقى أوفر ده أنا استويت .. طيب ساعة نفطر ولا نشرب
ممنوع الخروج يا أستاذ التصحيح دلوقتى حالا والباب مقفل بالقفل.
الساعة 4
أظن كفاية كدة صححنا ظرفين ممكن نستأذن
لا طبعا مش ممكن احنا لازم نخلص المادة كلها 450 كراسة ونسلمهم، وبكره شرحه عربى أولى وبعده دين أولى وثانية.
الساعة 6 واحدة مدرسة حامل فى الثامن تستأذن
ممنوع يا أستاذة موعدنا الساعة 9 وأى حد هيخرج من المدرسة قبل كدة هيتحول للتحقيق
معلش مش قادرة
اتمشى شوية فى الطرقة يا أستاذة ده هيفيدك وبعد كدة ارجعى خلصى سؤال التعبير والإملاء بتوعك
الساعة 7 مدرس صايم عاوز يفطر
ممنوع يا أستاذ
طيب شربة مياه
مفيش ماية فى المدرسة يا أستاذ كلها ساعتين وتروح، معلش يا جماعة دى طوارئ وظروف خاصة ويجب نتحملها ولا انتوا مش بتوع شغل وعاوزين تقبضوا وخلاص.

فى اليوم التالى مدير المدرسة يحقق مع المدرسة لأنها خرجت قبل الساعة الثامنة


هذا ما حدث بالفعل بمدرسة على مبارك الإعدادية بنين .. قولولى احنا فين وما رأيكم؟