يا ترى حلحق طب ؟ ( شعور باليأس ) !

[بريق النجاح]

السلام عليكم ورحمة الله وبركاته

انا حاليا دفعة 3 ثانوي الشعبة : علمي علوم ..

انا حاسة بالضيااااااااااااع من جميع الجهات انا مفيش في حياتي حافز نهائيا أهلي مش مهتمين بيا ذاكر او لأ كل ال بيعملوه فلوس الدرس ممكن لو بابا شفني يقولي شدي حيلك وخلاص على كدة
لو شافني قاعدة ع التلفزيون او اللاب 200 ساعة ولا بيقول حاجة ! وكذلك اخواتي
انا بشوف ناس تانيه اهاليهم منعت عنهم التلفزيون والموبايل ..إلخ عشان تجبرهم على المذاكرة
انا كل ده كان قلقني بس اخدت عهد ع نفسي من البداية اني انا ال حنفع نفسي ومش حستنى حاجة من حد وانا حكون قدها باذن الله وحثبتلهم العكس وانهم ميستهونوش بقدراتي
بس ال Motivation مهم والله يا جماعة؟ حتى الصحاب محدش بيسأل عليا كله بيكدب وبيقول انه مش بيذاكر
عشان ميخدش عين وانا بغبائي ( بس والله بحسن نية مني ) كنت بشجع ناس واساعدهم وانا زي مابيقولوا محتاجة ال يشجعني .
المهم اني اخدت السنة جد اوووي أولها مكنش في مادة بنقص فيها الا نص درجة وده نادر في امتحانات الدروس .
بعدين داخلة على شهرين اهو مش طايقة كتااااب تعبانة من كل حاجة الظروف هي الظروف لأ وكمان مفيش تشجيع؟
انا حاسة اني ممكن اكون اخدت عين بجد مش بطيق ابص ف كتاب .. الدروس مبقتش اروحها
بضيع ب معنى الكلمة .. والله العظيم انا الحمدلله شاطرة وواثقة ف قدراتي
بس خلاص الشيطان سيطر ع افكاري اني مش هلحق حاجة ف على ايه العناء ...
بسمع من تجارب ناس قبلي كانوا زي بادينها جد اووي وجم ف الاخر ف الفترة دي ريحوا هدوا كل اللي بنوه
انا بضيع .. مفيش وقت .. حاجات بالهبل اتكومت عليه ...قولولي اتصرف ازاي ...
انا كان نفسي احقق رغبة امي الله يرحمها اني ادخل طب .. معقولة حتى دي حفشل فيها!!
انا اسفة على الاطالة بس فعلا مش لاقية حد اتكلم معاه .. اعتبروها فضفضة : )