أيها الثانويون

[Dr.Mohamed Sabry]

اولى ابتدائي
تانية ابتدائي
تالتة ابتدائي
رابعة ابتدائي
خامسة ابتدائي
ستة ابتدائي
أولى إعدادي
تانية إعدادي
تالتة إعادي
أولى ثانوي
تانية ثانوي
تالتة ثانوي ......
** أنت متخيل أنت قطعت شوط أد ايه ؟؟ متخيل بقالك كام سنة في الطريق ؟؟ كام سنة في مشوارك ؟؟؟ أنت ماشي ع التراك وحواليك أب وأم وأهل بقالهم سنين يشجعوا فيك ... خلاص .. خلاص اهو قربت
تقطع شريط نهاية المرحلة دي .. المرحلة اللي بتتبني بقالها أكتر من ١٥ سنة .. افتكر كل سنة .. كل سنة دراسية بكل اللي اتعلمته فيها .. كل أفراحها وأحزانها .. كل مواقفها .. كل درس اتعلمته .. كل واجب عملته .. افتكر أيام ابتدائي وإعدادي وثانوي .. أفتكر الكراسات والكشاكيل اللي فضيت وجبت غيرها .. افتكر كل سهرة سهرتها .. كل عصاية اتضربتها .. كل موقف حلو أو وحش حصلك ... افتكر السنين دي كلها وافتكر كويس إن وراك جمهور .. جمهور واقف يشجع لغاية ما صوته اتنبح .. جمهور دفع دم قلبه عشان يحضر الماتش بتاعك .. عشان يحضر التحدي بتاعك .. عشان يشوفك على خط النهاية واقف بترفع ايدك وبتقول لهم : أنا عملتها .. عملت اللي كنتم بتسهروا الليالي بسببي عشانه .. حققت حلمي وحلمكم ... افرحوا افرحوا افرحوا .. أنا هنا جاي أفرحكم .. أنا هنا سبب سعادتكم .. أنا هنا الأمل الجديد اللي اتولد جواكم .. أنا هنا اللي هاخد بايديكم بعد كل الظروف اللي خدتوا بايديا فيها .. أنا هنا راجل .. أنا هنا راجل كنت قد التحدي .. لا ، كنت أقوى منه ...
..
خلاص يا جماعة .. خلاص مينفعش تقف دلوقتي ... خلاص هانت والله ... خلاص خط النهاية بيندهلك .. لو وقعت قوم دلوقتي .. قوم دلوقتي وهتلحق .. هتلحق تفرح .. هتلحق تفرحهم ... عشان لو شفتهم بيعيطوا ساعتها هتتمنى الأرض تبلعك ...