كدبت و صدقت نفسك ؟ ضاعت حياتك

[ebrahem_el]

ألف شكر على الموضوع الجميل ده
انا للأسف عايش مع اثنين من النوع ده و اللي حالتهم ميؤس منها
الاول : صاحبي او اللي كان صاحبي
هو كل حياته عباره عن اوهام و خيالات , هو انسان متفوق و جايب 406 و دخل كلية طب , مشكلته انه بيكدب و يصدق الكدبة و يعيشها , بس انا لاحظت حاجه في اي واحد كداب , مثلا هيقولي احنا عندنا بيت في مدينة نصر كمان يومين و يكون واحد صاحبنا ماشي معانا يقول دا احنا عندنا بيت في الهرم . مع انه كان قايل قدامي بس انه في مدينة نصر ... ولو قلت ليه ايه يا عم مش هو في مدينة نصر ... بقدرة قادر يغير الموضوع من غير ماحد يحس .
مش انا لوحدي اللي لاحظت الموضوع ده ... انا لقيت تقريبا كل زمايلنا مخنوقين منه ومش طايقينه .. و علشان كنا صحاب في يوم من الايام قلت لازم اتكلم معاه و انصحه
اتمشيت معاه في يوم لوحدنا و لمحت ليه من بعيد عن الموضوع ده ... طلع كل الناس غلطانه وهو الصح و هو الانسان الكويس اللي في البلد دي كلها و مافيش حد زيه ... الصراحه انا سبته يتكلم و خلاص ... المشكله انا مابعرفش احرج اي حد ابدا .
اي كليه في مصر له فيها ابن خاله ... ماتعرفش ولاد خالاته دول كام !
بنت عمه كانت احياء السنه اللي فاتت و السنه دي دخلت هندسة بترول !!! المشكله اني اعرفه كويس و اعرف عائلته كويس اوي
الكبيره و الجديده ... انا اتعرض عليا من الجامعه الالمانيه منحه دراسيه ... في كليه ايه ؟ كليه طب ؟؟؟؟؟؟!!!!!
يـــــــــــــا نـــــــــــــــــــــــــاس هو فيه في الجامعه الالمانيه كلية طب اصلا ؟؟؟
بجد بيصعب عليه و الناس كلها دلوقتي بتقف معاه علشان تدحك عليه ... بجد هو محتاج يروح لدكتور نفسي لانه بقى في حاله صعبه مع انه ابن ناس و اهله ناس مستريحه ماديا اوي ... بس ماتعرفش دا نقص ولا مرض ؟

التاني : صاحب ابويا
بس ده انسان حدوته كبيره و في الغالب انا اتوقع انه نصاب كبير
و اجدد حاجه ليه .. بسأله ابنك عمل ايه في الثانويه العامه ... قالي انو جايب 86
و بالصدفه كنت بعمل حاجه في البلد بتاعتهم و عرفت ان ابنه جايب 66.6 و معاه ملحق كمان


اما بالنسبه ليا انا ... انا ممكن اكدب على نفسي و اعيش الكدبة شويه على نفسي بس بكون عارف اني بكدب على نفسي بس بكون فايق وانا بحلم على نفسي

يعني بحلم اني في يوم من الايام اكون راجل اعمال كبير اوي و عندي عربيه همر !!! دا محور احلامي ... اتطلع لحياة

و الف شكر على الموضوع