مافيش كلام اقوله بجد

[bosy .. mostafa]

بسم الله الرحمن الرحيم
السلام عليكم و رحمة الله و بركاته
على فكره يا جماعه انا تعبانه اوي
و بجد محتاجه اوووووووي انكم تردوا عليا
بالله عليكم اللي يدخل الموضوع ده يرد عليا .. مش الاقي المشاهدات 944 و الردود 0 !
عارفين بجد حاجه تقرف
انا ياجماعه .. خسرت كل الناس اللي في حياتي مره واحده !!
و اوعوا حد يستغرب
هتقولوا لي فيه ايه يا بنتي
بصوا أنا لما جبت مجموع في تانيه ثانوي .. عارفين انا فرحت بالمجموع ده لحاجتين
أول حاجه اني كده مشيت اول خطوه في طريق تحقيق حلمي و بيقولوا "مشوار الألف ميل يبدأ بخطوه" و دي أول خطوه
تاني حاجه .. و هي إني عرفت مين من صحباتي بتحبني بجد .. و مين اللي مصحباني مصلحه
تخيلوا اني اكتشفت انهم كلهم ولا واحده فيهم بتحبني !!
أول واحده و اللي كانت أقرب البنات ليا و اللي كنت بحبها اووووووي على الرغم اني مش كنت بقولها اسراري كلها لإن كل اسراري مع اخويا الكبير و مش مع حد تاني و كنا مع بعض حلوين اوي اوي .. هي اول واحده سابتني و بقت معاملتها معايا جافه جافه و مش بقت تسأل عني ولا بتطيق تكلمني نص كلمه !!
و لما اتصل بيها الاقيها تكلمني بأرف .. و بطريقه غبيه و انا بقول .. خليني اعاملها بأحسن ما عندي .. انا مسلمه و الرسول عليه الصلاة و السلام قال اني اعامل الناس زي ما بحب انهم يعاملوني .. و انا الرسول قدوتي فلازم انفذ كلامه
مع ان صاحبتنا المشتركه ما بيننا و هي مش صديقه اوي هي مجرد زميله في المدرسه كنا بنروّح معاها بعد الضهر جابت اعلى مني و منها و مش فرحت لي انا و فرحت لها هي .. اتصدمت انا طبعاً بس اقول ايه
و لما افتكر كلامها ليا و تقولي احنا تعبنا و كنا مع بعض في كل الدروس .. و كانت ازاي كل شويه تتصل بيا و تقولي انا مش فاهمه الحته الفلانيه انا مش عارفه احل المسأله دي ساعديني و كده
بستغرب و اقول لما هو كده .. كانت مصحباني ليه؟؟؟؟
تاني واحده و هي مش كانت صاحبتي اوي , لإختلافها عني في مزاجي و طبعي و اخلاقي .. هي من النوع اللي بيحب يقعد مع ولاد و تزعق و تحب تمشي كل حاجه بمزاجها و معاملتها وحشه اوي مع اهلها .. و مش بتحبني لإني بقول لها غلط و حرام و بوجهها بس بالتي هي أحسن .. و انا العكس الحمد لله يعني
بتحقد عليا و بتقول لمامتها ان ده مش مجموعي انا اللي بحب ازوّد المجموع و معرفش ايه .. و اني كدابه .. و هي طلعت بتكدب عليا في حاجات كتيييييير اوي عشان تاخد مني فلوس مش أكتر !! و لما اواجهها بكده الاقيها تثور في وشي و تقولي"بس انا مش مصلحه و ربنا يسامحك" و تقوم قافله السكه في وشي .. و بقت كله دقيقه تتصل بيا عشان تتخانق معايا لحد ما طفشت منها و غيرت الخط !! و اتخنقت بجد و اخر كلام بيني و بينها انها كانت سرقت مني فلوس من ورايا .. كنت واخداهم تكريم ليا في صناع الحياه .. فخدتهم مني و ربنا يسامحها .. وانا متأكده لإني كنت في بيتها و مش كان فيه حد معانا ومش طلعت المحفظه و رحت اصلي و سبت شنطتي جنبها .. بس عارفين أنا بجد كنت متوقعه منها كده لإن هي شخصيه مش كويسه اصلاً .. و قلت في نفسي لما عرفت كده"أظني طلعتهم زكاه ولا لوجه الله"
تالت واحده بقى مش فرحت لي خالص .. وقالت لي انتِ جبتيه بالغّش .. و مش عارفه .. و هي عارفه كويس اني مش بكره في حياتي اد الغش و اللي بيغشوا ..

هما بنتين بس اللي فرحوا لي من قلبهم .. وانا كمان فرحت لهم و بيحبووووووني اووووووووووي و انا كمان بحبهم ..

يا جماعه .. هو أنا عشان طيبه و بسامح أبقى هبله ولا ايه الحكايه؟؟
يعني الأولى اللي حكيت عنها دي .. غلطت في حقي كتير و مره قالت لي في وشي"انتِ اصلاً حقوده و غلاّويه حبتين .. و مغروره و متكبره و مش تفتكري انك perfect اوي ولا حاجه انتِ اصلاً ولا حاجه و مالكيش قيمه !" .. سامحتها لإن مش من عوايدي إني اشيل في حد .. و لما جيت اعاتبها لما قالت لي كده انكرت انها قالت حاجه زي كده اصلاً .. و عاتبتني انا عشان زعلت منها !! .. انا لو واحده مش عندي إحساس اصلاً مش كنت زعلت منها
بس انا سامحتها عشان بحبها في الله .. بس واضح ان الحب في الله ده بقى عمله قديمه محدش بيتعامل بيها
دلوقتي فيه "حب مصلحه" و ده اللي ماشي اليومين دول
و فرحت لكل البنات اللي جايبين اعلى مني بـ 2% او كده .. و انا اللي حقدت عليا .. يمكن عشان كانت معايا في كل الدروس . الله اعلم
هي اصلاً كانت على طول بتشتكي من والدها وتقولي قاعد يحبطني و بتاع .. طيب انا ذنبي ايييييه

و التانيه دي ما بتتصلش بيا غير لما تبقى عايزه حاجه .. و تكلمني برقه و ذووووووق و يا حبيبتي و مش عارفه ايه بعدين تقولي "والله العظيم لاتوافقي عاللي هقوله ده" وتحلفني و بعدين تطلب مني بقى كارت شحن .. فلوس .. اي مصيبه
بس دايماً مصيبه ماديه يعني !!!
و لما اقضيها لها الاقي رناتها اختفت ولما اتصل بيها تقولي مش فاضيه مش في البيت
و كتيييير اوي كدبت عليا وقالت لي انا عند اخواتي و بتكون في البيت عشان مش اكلمها و كنت بعرف كده من والدتها
و كدبت عليا في حاجات كتير .. وبرضو كنت بعرف من والدتها .. لولا والدتها دي كان زماني لابسه طرطور يعني !!
و الكدب عندها مرض و الغريب ان ليها واحده صاحبتها فاسده اكتر منها .. كل لما تروح عندها .. الاقيها راجعه و متنرفزه عليا اووووووووووووي و مش طايقه لي كلمه .. و اللي ارجحه في الحاله دي ان صاحبتها بتقولها عني كلام وحش انها تسيبني و كده و كمان مش بتبقى متنرفز عليا لوحدي .. لأ على كل اللي تلاقيه في وشها
و كمان بتروح تقول لوالدتها اني زيها و بمشي مع ولاد و كده .. و الحمد لله ان والدتها عارفاني كويس و عارفه اخلاقي .. مش صدقتها
بس ربنا يسامحها قاعده تقولي هنتقم و مش هنتقم و هبل كده .. بس ربنا يشفيها يعني
و واثقه اوي اني راح ارجع لها .. بس انا مستحيل ارجع لأي حد كداب .. اللي يكدب عندي ده .. زي الخاين بالظبط .. و هرجع لها استفيد ايه .. دي شبهه عليا و على سمعتى !!

عارفين .. كتير اوي لما بقعد لوحدي .. بعيط و بقول
غلطانه امي يوم على الطيب ربتني .. دايماً كانت تقولي "يابوسي .. سامحي كل اللي يغلط فيكِ .. الناس بتغلط و هي مش قاصده .. و سامحي النهارده ربنا يعفو عنك بكره"
هي فاكره ان ناسي زي ناسها .. طيبين يعني .. بس هي مش عرفت إنها كده خلتني مسكينه بين الناس و هبله .. معلش .. من غير قصدها ظلمتني
مش عرفت اني النهارده ممكن اكون بقعد اضحك مع حد .. و الحد ده يطعني في ضهري تاني يوم .. او ممكن يومها كمان هو لسه هيستنى تاني يوم !!
مش عرفت اني هبقى شاذه عن المجتمع لإني طيبه و بسامح و بسأل عن غيري

يا جماعه نفسي اعرف بس
هو انا عشان اعيش في الدنيا لازم ابقى خاينه و كدابه و غشاشه !!! ولا ايه النظام يعني؟
انا للأسف بحس اني عبيطه لإني على نياتي و بسامح و طيبه اوي .. وللأسف اكتشفت مؤخراً ان الطيبه دي ضعف شخصيه و غبي كمان

يا جماعه انا بجد تعبانه اوي اوي .. وحاسه انه خلااااااص من كتر حزني ده .. الحزن بقى جزء مني .. اي صدمه تلقيتها دلوقتي مش بقت تأثر فيا خالص و كأن أصابني "لا مبالاه" من كل حاجه ..
همّتي في شغلي .. راحت في الهوا .. و تحمسي لإني اشتغل و ادخل الكليه اللي بحلم بيها في سنه تالته بقى .. راح كل ده في الهوا و كأنه كان سراب و لم يكن ..
بقى ييجي لي حالات غريبه من كتر الحزن ده .. اولاً بقى تركيزي ضعيف اوي و لازم اي حد بيكلمني يعيد عليا الكلام مرتين او اكتر عشان يوصل لي "زي الترجمه في الجزيره كده" و برضو بقيت ابرد في عز الحر .. واشرب ميه كتيييييييييير اوووووي بكميات غريبه لجد ما في البيت بقوا بيشتكوا مني
على فكره كمان انا بقيت خوافه زياده عن اللزوم .. حتى بخاف من الناس اللي عايشين معايا في البيت .. بخاف من الناس و انا ماشيه في الشارع .. بخاف من خيالي..
تفتكروا اني اتجننت ولا ايه

انا اسفه للإطاله
بس من غلبي
و الكلام ده كله نقطه في بحر