دفعة ثانوية عامة 2016

[Mohamed_Hamza]

المشاركة الأصلية كتبت بواسطة 2020ahmed

مفيش دروس شبه مفيش مدرسه

دا المطلوب ، انا في الوقت دا مكنتش بروح دروس خالص، والمدرسة مروحتهاش طبعاً غير يومين في السنة كنت بخلص ورق.
حاول تعتمد على نفسك أكتر من اي حد تاني اليومين دول.

المشاركة الأصلية كتبت بواسطة 2020ahmed

بالنسبه للعربي والانجليزي والفرنسي لسه خصوصا الاخير ضايع لان المدرس قللنا عدد الحصص وطبعا وافقنا لان مفيش غيره

هتسمع كلامي لو قلتلك وقف دروس في التلاتة دول؟
انا مخدتش دروس فيهم خالص و نقصت درجتين بس في العربي معرفش على ايه، وقفلت الانجلش والفرنساوي، يعني انت ممكن تعمل زيي واحسن.
انت بتقول انك مذلول في المواصلات، فلو كل يوم رحت درس واحد هتقعد قول ساعة في المواصلات اقل حاجة و3 ساعات في الدرس، ولما تيجي هتحتاج ترتاح من القرف دا ساعة كمان، (ولو بطارياتك بتخلص بسرعة زيي ممكن تنام كمان وتصحى بالليل يكون اليوم ضاع عشان كدا مكنتش بحب الدروس)، يعني هتضيع في الميت 5 ساعات، WTF، انا مش هتكلم كتير وهخش في الفعل، انت تجيب الكتب دي وتعيش مع نفسك بلا دروس بلا وجع دماغ، اشطا؟
راجع لحد يوم 15/4 من بعد كدا حل امتحانات بس، ودا في كله.
وخد دا جزء من خطتي اللولبية اللي كنت ماشي عليها في عصر الازدهار بتاعي، بس هكتبلك المواد اللي انت قولت عليها بس.
أولا: توزيعة الساعات ع المواد (اللي انت بتشتكي منها) كل يوم:
العربي: 3 ساعات كل يوم.
الانجليزي : ساعتين كل يوم.
الفرنساوي: ساعة كل يوم.
انت كدا مش مدي العربي اكتر من حقه ولا ظالم الانجليزي والفرنساوي، كدا كل مادة واخدة حقها تالت ومتلت، طبقا لحالتك دي.
ثانياً: هتعمل ايه في الساعات دي:
*العربي: لو مخلصتش حاجات ابدأ ذاكرها من دلوقتي من غير ماتراجع على حاجة، ركز ع الدروس اللي ناقصاك بس، هسيبلك اسبوعين تخلص فيهم العربي كله(يوم 15/3 تكون مخلصه).
لسه باقيلك على نص شهر اربعة (معاد حل الامتحانات فقط) شهر واحد، الشهر الباقي دا كل يوم فيه هتذاكر 3 ساعات بردو زي ما اتفقنا، بس مش هتسيب ال3 ساعات دول سايبين على حسب مامزاجك يوديك، لا، مزاجك دا تدوس عليه بالجزمة (ومعلش سيبوني اغلط شوية عشمان فيكوا وكدا يعني استحملوني ) عشان اللي بيمشي بمزاجه بيلبس في الحيط، لازم تنظم وقتك كويس، ال3 ساعات هيتقسموا ويتنظموا كدا (كل يوم):
- يوم كدا: 3 أو 4 قطع نحو (نص ساعة) + مراجعة مدرسة أدب (ساعة) + مراجعة نص بتعليقه (ساعة ونص).
- اليوم اللي بعدا كدا: 3 أو 4 قطع نحو (نص ساعة) + قطعتين بلاغة (نص ساعة) + مراجعة درس قراءة (نص ساعة) + مراجعة 5 فصول قصة (ساعة ونص).
التعبير عشان متأكد انكوا هتقلقوا بسببه ع الفاضي قبل الامتحان، هتيجي في يوم واحد من كل اسبوع (الجمعة مثلاً) وبدل ماتحل نحو، تعمل موضوع تعبير، بالتدريج، هتكتب كمية اكبر في النص ساعة دي ودا المطلوب، عشان المصحح بيقيس بالشبر ولو حد قالك غير كدا غلطان.
تقضي بئا الشهر : يوم كدا واليوم اللي بعده كدا وبعدين يوم كدا واليوم اللي بعده ازاي ؟... كدا لحد ما الشهر دا يخلص ونص اربعة يجي وتبدأ تحل امتحانات بس، دا في كل المواد مش العربي بس.

منين هتذاكر ايه وازاي؟ #عربي

-المراجعة هتكون عبارة عن قراءة الدرس وحل عليه مع بعض مش قراءة الدرس بس.
-قراية الدرس هتكون من مصدرك اللي انت كنت بتذاكر منه بلاش تشتت نفسك مع كذا مصدر، بس عشان خاطري (الادب والتعليق على النص من كتاب الوزارة عشان خاطري).
-الحل هيكون بالنظر عشان مفيش وقت للكتابة، ومفيش وقت للاسئلة المتكررة فعديها،ومصادر الحل هتكون:
=الادب: من كتاب الامتحان مراجعة.
=النصوص: من كتاب الرسالة، اسئلة الامتحانات السابقة، مش هيخترعوا اسئلة جديدة متتعبش نفسك.
=النحو: الاول هتحل قطع السنين اللي فاتت، ودي هتلاقيها متجاوبة في كتاب الرسالة كلها، الامتحان مراجعة فيه 100 قطعة، وفيه استاذ ع النت اسمه اسامة عز الدين حاللهم كلهم، لو قبلتك حاجة وحاجتين وتلاتة جمعهم، وخش ع النت وشوفهم مرة واحدة، مش تفتح النت عشان اعراب كلمة واحدة يعني، (مش هتيجي ف الامتحان )
=القراءة: من كتاب الرسالة، اسئلة الامتحانات السابقة، مش هيخترعوا اسئلة جديدة متتعبش نفسك.
=البلاغة: هتضطر اقولك كتاب الرسالة بردو، عشان متجاوب وقطع البلاغة بتاعته معقولة شوية عن قطع النحو بتاعته.
=القصة: مش لازم تحل عليها، انا عن نفسي ماحلتش قصة غير في امتحان اخر السنة وكانت بيس اوف كيك، هيا محتاجة قراية بحب بس مش اكتر.
-الحل بيكون س و ج بسرعة، اقرأ السين، قول الجيم بتاعتك، وقارنها بجيم نموذج الاجابة، ومتقلبش ع السين اللي بعدها غير لما تكون متمكن من السين اللي قبلها.

من اول نص اربعة لحد واحد ستة

تنسى دا كله، وتبدأ تحل امتحانات بس، من كتاب المعلم، عشان امتحاناته متجاوبة، ولو معاك الاضواء بردو يبقى خير وبركة. (او لو مش عندك لا دا ولا دا ولا عايز تجيبهم، خش هنا هتلاقي امتحانات السنين اللي فاتت كاملة ومتجاوبة http://www.khayma.com/medhatfoda)

كدا الكتب الجديدة اللي هتحتاجها (لو مكانتش عندك يعني) #عربي

1- الامتحان مراجعة (اجباري)
2- تطبيقات الرسالة (اجباري)
3- المعلم/ مدحت فودا (اجباري تجيب واحد منهم)

.....................

*الانجلش: المادة دي بحبها لله فالله، بردو سايبلك اسبوعين تخلص فيهم المنهج، بص الريدنج دا اهم حاجة في اليونت، الidioms وحروف الجر اللي فيها تحفظها كويس عشان بتيجي choose و find ، الجرامر تحاول تفهمه ياريت ماتحفظش قواعد وخلاص، بعد الاسبوعين يبدأ شهر العسل اللي ممكن تبدأه من النهاردا لو انت مخلص المنهج:
كل يوم هتذاكر فيه ساعتين انجليزي:
-هتراجع 2 units وتحل عليهم + قطعتين ترجمة في يوم
-اليوم اللي بعده: هتراجع يونت واحد وشابتر وتحل عليهم + قطعتين speaker
وهكذا.

منين هتذاكر ايه وازاي؟ #انجلش

-اليونت هتراجعه كالآتي، هتقرأ الكلمات ع السريع من كتاب الشرح (عشان ساعات كتب المراجعة مش بتجيب كلمات مهمة)، وبعدين الريدنج تقرأه بتركيز شديد وتاخد بالك من الidioms مكتوبة ازاي وحروف الجر وكل حاجة، (ياريت متقرأش الlistening عشان مالوش تلاتين لازمة)، والقواعد ع السريع بردو بس افهمها الاول قبل ماتحفظها.
-القصة زي قصة العربي بالظبط، اقرأها بحب كأنك بتقرأ قصة برا المنهج.
-مصادر الحل:
= اليونتس: surprise/the best على حسب انهي متوفرله اجابات، لو الاتنين نازلهم اجابات هات surprise.
=القصة: س و ج من surprise مراجعة وخلص نفسك.

من اول نص اربعة لحد واحد ستة

انسى دا كله، وهات كتاب YASSER'S NOTES نماذج الامتحانات المجابه، وحل كل يوم امتحان ع الاقل اتنين بالكتير، انت وقدرتك.

كدا الكتب الجديدة اللي هتحتاجها (لو مكانتش عندك يعني) #انجلش

1- Surprise/the best (اجباري واحد منهم)
2- Yasser's notes (اجباري، وبالعافية *بكري*)

*الفرنساوي: هات كتاب genial ، وجريدة اخبار التعليم لما تنزل وهما هيتكفلوا بيك، بس كدا.

*الرياضة: ماعرفش الصراحة انا كنت علمي علوم، بس انت ايه الي مصبرك ع المر دا، لو انت شايف نفسك بتستفاد اوي كمل، وخليك صريح مع نفسك لو مش بتستفاد اقعد في البيت، مش عشان الناس رايحة الدرس تروح معاهم.

بس ياسيدي، دا على اساس انك تمام في المواد العلمية زي مابتقول، ودي المواد اللي عاملالك مشكلة فعلاً، هي الخطة اللولبية فيها اختلاف طفيف عن دي، ان انا عامل للانجلش يوم اه ويوم لا وكذلك الفرنساوي، بس انا مظبط دي عليك.

انا بقولك اهو، لو هتعمل اللي قولتلك عليه دا بالحرف، متروحش دروس، وانت الكسبان اخر السنة بردو، غير كدا روح الدروس وهتبقى بتظلم نفسك، وبتضيع وقتك وبتضيع نفسك كمان، انت حر بردو.

نصيحة لوجه الله: اسمع اللي بقولك عليه عشان مش تلبس في الحيط، انا ابويا وامي ذات نفسهم لما اقولهم على اقتراح او اي حاجة ومش يعملوها، عارف ايه اللي بيحصلهم؟ هما مع انهم اكبر مني، بيلبسوا في الحيط.