دفعة ثانوية عامة 2016

[Mohamed_Hamza]

المشاركة الأصلية كتبت بواسطة ahmedtarea

شهر 5 ي دوك انت اشتغلت فيه ازاي في كل المواد (خصوصا العربي والانجليزي )
وكنت مخصص كام يوم قبل العربي وذاكرت الدين امته ؟؟؟
معلش تعبينك جامد والله ؟،؟؟؟؟؟

قولت اعمل فيها زي ما عملت ف3 اعدادي عشان بحب السنة دي اوي..
كنت بجيب الفهرس بتاع كل المواد اللي عندي عشان اشوف عندي كام فصل وكام درس واسماءهم ايه وكدا واكتب توزيعة المنهج كله في ورقة..
وبعدين اشوف معايا كام يوم باقي..
واقسم الفصول والابواب اللي في المنهج كله على عدد الايام الباقية يعني مثلا الفيزياء 8 فصول ومعايا 25 يوم مثلا، يبقى اعملها يومين في الاسبوع كل يوم منهم اراجع فصل فيزيا واحل عليه.. وهكذا في باقي المواد.
واقول اني هذاكر في اليوم الواحد كام مادة (3 مثلا)
يوم عربي وفرنساوي وفيزيا
ويوم عربي وجيو وكيميا
ويوم عربي واحياء وانجليزي
كان كل يوم فيه عربي عشان كبير ودرجاته كتير..

ولما يجي الدور ع المادة مش براجع باب وبس، لا لازم احل ع الباب اللي راجعته فنفس اليوم (كتير)، واحل امتحانين تلاتة في المادة دي كمان..
ماعدا العربي ليه معاملة خاصة كان يومه حاجة من اتنين:
-يا اما اراجع 3 فصول قصة + درس ادب + حل 5 قطع نحو + امتحان
-يا اما اراجع نص + درس او اتنين قراءة + حل قطعة بلاغة + امتحان
وطبعا العربي مستمر كل يوم فكنت ابدل ف يوم كنت امشي بالنظام الاولاني دا واليوم اللي بعده امشي بالتاني.. على طول.

والانجليزي بردو لما يجي عليه الدور براجع 3 units وشابتر واحل عليهم واحل امتحانين

لو نفرض ان النهاردا يوم ال (عربي وجيو وكيميا)
يبقى النهاردا
اراجع باب جيو واحل عليه واحل امتحانين ثانوية
واراجع فصل كيميا واحل عليه واحل امتحانين ثانوية
والعربي اراجع 3 فصول قصة + درس ادب + حل 5 قطع نحو + امتحان

اليوم بئا اللي بعده مثلا هيكون (عربي واحياء وانجليزي) هيمشي كدا:
-اراجع فصل احياء واحل عليه واحل امتحانين ثانوية
-اراجع 3 units وشابتر واحل عليهم واحل امتحانين
-والعربي اراجع نص + درس قراءة + حل قطعة بلاغة + امتحان (بدلت اهو)

واحدد بردو لما يجي الدور على اي مادة فيهم هعمل فيها ايه بالظبط، مش اقول اراجع باب وخلاص..
يعني احدد فصل ايه بالظبط ودرس القراءة والشابتر رقم كام و كله بيبقى متحدد.
اكتب بئا اليوم واللي هعمله (الجمعة 5/6 هعمل كذا كذا... السبت 5/7 هعمل....الخ)
وكنت بحدد مواعيد بردو عشان مافتحش فمادة واسيب الباقي.
وكنت بفصل بين مراجعة الباب والحل عليه وحل الامتحانات في المادة الواحدة مش اخليهم ورا بعض عشان مازهقش بردو...
يعني مثلا لو بدأت بمراجعة باب كيميا ماحلش عليه ورا المراجعة على طول لا، ممكن احل امتحان عربي واراجع باب جيو وبعدين ارجع لحل باب الكيميا اللي ذاكرته في اول اليوم دا.... وهكذا.

وبردو فيه حاجة من غبائي كنت بعملها، كنت مشتت نفسي بكذا كتاب، واكتشفت متأخر اني لازم احل من واحد بس، والباقي ارميه، والحمد لله لحقت اعمل كدا.. بس كان اهم شرط في الكتاب دا انه يكون متجاوب سواء ع النت او معاه ملحق اجابات.. كنت بحل منه كتير.

افضل ماشي كدا، واكون على يوم 20/5 مثلا مخلص المنهج كله وحالل عدد لا بأس بيه من الامتحانات بالنظام اللي قولتلك عليه دا، والعشر ايام الباقيين على نهاية خمسة دول اقرأ فيهم المنهج كله مجرد قراية عشان يكون حاضر فدماغي اثناء الامتحانات، واحل امتحانات كل يوم على كل المواد، مثلا 14 امتحان في اليوم (كل مادة امتحانين) وفيه مواد كنت ممكن احل 3 او 4 امتحانات عليها زي الانجليزي كدا عشان كنت بحبه.
انت هتكون اتدربت على حل الامتحانات وال14 امتحان دول هتحلهم بسرعة وهيتبقى معاك وقت تقرأ فيه المنهج قراية بس زي ما قولتلك.
طبعا كنت سايب الدروس عشان الحق اعمل دا كله، كنت سايبها من اول السنة اصلا، بلا دروس بلا وجع دماغ..
الدين حفظت الاحاديث في النص ساعة اللي قبل الامتحان وكنت قاري قصص الصحابة اللي في الاخر دي وباقي الامتحان طلعت فيه علي جمعة اللي جوايا
والعربي افتكر عملتله 6 ايام مراجعة(بالنسبالكوا ابدأوا من 30/5) وكانوا متنظمين بردو هما كمان..
التنظيم دا بص.. بيخليك برنس فنفسك كدا