العلم .. احنا فين منه وهو فييييين مننا !!

[براءة]

الجامعات العربية خارج التصنيف العالمى لافضل 1000 جامعة
اما عن افضل 3 الاف جامعة
فجاءت الدول العربية برصيد 6 جامعات (اللهم لا حسد)
الامارات ومصر وفلسطين والسعودية والكويت
الجدير بالذكر
الجامعة المصرية الوحيدة كانت ال auc
الجامعة الامريكية فى القاهرة
بصراحة معرفش جامعة القاهرة اللى كانت من كام سنة رقم 401 تصنيفيا راحت فين
يعنى حتى الجامعة المصرية الوحيدة تعليم امريكى ،، مش مصري ..
مش هتطرق للاسباب اوى لكن
السبب الاساسي اكيد ان البحث العلمى ملوش ف مصر اولوية
لا جهات مسئولة او حتى ادارية ولا طلاب مهتمين
وان ظهر النابغة .. فمصر بتتخلص منه !!
ايوه بتقوم عاملاله خدمة العمر وتسفره بره وساعتها بس هيعرف انه كسب نفسه وعيلته ومستقبله
ونادرا ما هيرجعلها
ولو كان نابغة اوى يبقي الموضوع هيخرج من ايده
لان الدول اللى احتضنته اكيد مش هتفرط فيه ..
عاوزة افهم
ليه مفيش اهتمام بالبحث العلمى فى الوطن العربي
معتقدش علشان موارد مالية
اقلها دول الخليج مثلا او الدول اللى عندها معادن وبترول ونفط
غباء
الجامعات الاولى العشرين كانت لدول الولايات المتحدة وبريطانيا واليابان
وطبعا لا يخفى علينا الان دور الدول دى فى العالم .. دول ماسكة العالم من عدة نواحى
الحاجة اللى تزعل اوى وتقهر بجد
ان اسرائيل جاءت فى ترتيب اول 100 دولة برصيد 7 جامعات من اصل 15 موجودة اصلا فى الاراضي المحتلة
دولة لم يكتمل ع وجودها قرن
وبجد حزينة انى بتكلم عليها ك "دولة" !!
الدول العربية .. دول اصابها التخلف والجهل
مقدرش اتضايق لما حد يقول علينا كده
كبيرنا لما حد بيتكلم بنقوله
*ده احنا اللى اخترعنا الصفر واحنا واحنا اللى عملنا وسوينا زمااااااااااااااان
_زمان ؟
_طيب ودلوقتى..
*دلوقتى كل حاجة اتبنت ع انجازاتهم زمان
_انجازاتهم ... طيب وفين انجازاتك .. مفيش مش كده ؟ متخلف !!
قبل ما الوم اى حد
هتكلم علينا اولا كأفراد
بعد ما الهيافة والعبط والسفه ملت ادمغتنا مبقاش عندنا دماغ يتفكر بيها صح
بتتعلم ليه ؟؟ علشان الشغل
يااااااااااااااه هدف بجد يستحق انك تعيشله؟
هدف اخرق
بجد بجد تفاهة
هو المستقبل فلوس ؟؟ اخر حاجة المفروض نفكر فيها
ده رزق .. مقدرلك من قبل ما تتولد
انا عايش علشان رسالة
انا مكلف من ربنا
مش علشان اتعلم 15 سنة ولا حاجة واخرج لم اضف جديد
تفكير غلط ف غلط
بجد انا حاسة اننا فى مهزلة
هبدأ اخجل من كونى عربية حمقاء
نفسي بجد اشوف كل يوم مسلمين جداد ع الساحة
نفسي اشوف جامعات اسلامية تعتلى التصنيف العالمى
نفسي الدول الاسلامية تكون دور علم
نفسي نفكر صح شوية
جائزة نوبل نفسي اسمع ان اغلب علمائها من المسلمين
نفسي نرتقى بتفكيرنا
المؤسسات القيادية هيا مجموعة افراد تفكيرها مادى غبي .. ميختلفوش عننا
بيل جيتس انسحب بشركة مايكروسوفت
ليه ميطلعش مننا منافسين احسن منه؟
الولدين اللى عملوا محرك البحث جوجل احسن مننا ف حاجة؟
حتى العلماء من العرب لو فضلوا ف بلادهم فهم مهملين
بجد انا نفسي نحب العلم .. نحطه قدام عنينا هدف مفيش غيره
انت مسلم ولو اعترف بيك العالم كشخص محترم
انت كده هتخدم اسلامك
انا عن نفسي
طول عمرى بقول لاهلى ولاصحابى انا مش هموت زى ما اتولدت
نادرا ما حد بيستوعب الكلمة بمعناها اللى ف دماغى
ايوه انا اسعى للشهرة
الشهرة كمسلمة باذن الله هتغير كتير وهتأثر فى غيرها وهتكون قدوة
بجد لما ضاعت منى هندسة حزنت جدا جدا جدا
بس اكتشفت ان تفكيرى كان دنيوى الى حد ما
انا كل اللى عاوزاه اطلع للعالم بحاجة
يمكن ربنا كاتبلى ان كلية علوم تجيلى للسبب ده
ومع حزنى الشديد لانى فقدت كلية قمة
بس لما فكرت عرفت انى مكنتش هدّى فيها , لقب مهندسة كان هيرضي غرورى جدا جدا
الحمد لله ع كل حال
عذرا تفكيرى مش منظم لانى مش كاتبه كموضوع عاوزة اسمع له برافو وشكرا
لا انا بفضفض لعل وعسي
حد يحس معايا باللى انا بفكر فيه
وبجد
هموت واشوف علماء الاسلام لهم مكانة متميزة فى العالم
وادعولى ابقي واحدة منهم
واحاول اجاوب ع السؤال المطروح واللى محدش يعرفله اجابه

العلم والعرب .. الى اين ؟؟