عفوا .. سقط .. العنوان .. سهواً

[علاء عيسى]

عفواً
سقط
العنوان
سهوا"
.........................................
من ديوان عفواً سقط العنوان سهواً "
ثقافة الشرقية 2001
" علاء عيسى عضو اتحاد كتاب مصر"
............................
مدونتى
"http://alaaeisa.maktoobblog.com/"



عفواً (1 )

جراج " فى وسط البلد
مكتوب عليه ممنوع ..؟
دا ملك لابن الذى ..
ولهيئة المشروع
سألت مين البيه ..
واسم الذى حارسه
قالوا لى بطل هبل
سك لنا ع الموضوع
دا يا ما غيرك سأل
لاكنه مات من الجوع




سقط (2 )"

البيضة " ويا " الفرخة "
على طول سوا فى نقار
والمشكلة كلها
مين ابتدا المشوار
الفرخة قالت :
هس
يا بيضة بايضاكى
والبيضة قالت :
بس
يا فرخة فاقساكى
على طول كده يا ناس
ع الحال ده ليل ونهار
والمشكلة كلها
مين ابتدا المشوار .. ؟
روحنا لواحد شيخ
يحكم لنا بينهم
قلنا يا عم الشيخ
فرق لنا بينهم
الشيخ فى كلمة ونص
مين غير ما حتى يبص
قال :
البيوت أسرار
لاتنين سوا ف النار
الفرخة تبقى الغدا
والبيض لزوم العشا
وان فاض يبقى فطار
واهو كله خير فى الدار


العنوان ( 3 )


" القمح " ويا " الدرا "
دول زرعتين فى الريف
متغيرين فى الشكل
بين " سنبله " و " طراطيف "
طول عمرهم فى خصام
زى " الشتا " و " الصيف "
واخرت المسألة
يتجمعوا فى رغيف !



سهواً ( 4 )


وكان واحد من اياهم ..!
اخد واحدة من اياهم ..!
على حتة من اياهم ..!
وبالصدفة انا وصاحبى
على السكة لمحناهم
وفجأة جه " غفير " عدا
وقام واخدنا وياهم ..!!