اسكتوا مش هنور التليفزيون ؟؟ :lol:

[براءة]

بسم الله الرحمن الرحيم

السلام عليكم ورحمة الله وبركاته ،،

النهارده هحكيلكوا قصة غريبة حصلت معايا من كام ساعة

كنت فى النادى انا و 2 اصحابى

جالنا واحد ملتحى وقالنا .. احنا بنصور برنامج تحبوا تصوروا معانا

انا اتحمست جدا وسألته .. هيا دى قناة ايه ؟؟

قالى دى قناة اسمها أنا لسه مفتحتش ،، ها هتصوروا ؟

بصيت لصحابى ال2 عمالين يقولولى لأأأأ

الراجل بصلي يشوف ايه رد فعلى

انا التزمت الصمتـــــــــ .. قام قالنا طيب دقيقتين وهاجى اشوف قررتوا ايه

بصيت لأصحابى وقلتلهم مين هتصور معاااايا

ال2 قالولى لأ طبعا مينفعش احنا مش جاهزين .. اصل الطرحة مش مكوية والجزمة مش ممسوحة و و و

انا قلتلهم طيب واحدة تقف معايا منظر

ال2 قالولى لالالالالالالالا نتكسف وكده ومينفعش

المهم الراجل جالنا تانى قال ها ؟؟

صحابى قالوله لأ خلاص وانا بصراحه اتكسفت اصور لوحدى والنادى كله عيال نعرفها و كله واقف يتفرج وكده

شوية قمنا غيرنا مكانا قعدنا فى مكان تانى ..

لقينا المصور والمذيع غيروا مكانهم بعدها بفتره هما كمان والراجل الملتحى جالنا يقولنا السلام عليكم تحبوا تصوروا معانا ؟؟(تقريبا كان نسينا)

لقيت معاه بنتوته كده ف سنى قولتلها هتصورى ؟؟

قالتلى اه

قلتلها خدينى معاكى

بس وسبت اصحابى وقمت مشيت معاها واتصاحبنا فى ال5 متر دول

و صحابي قاموا جرى ورايا يتفرجوا

الراجل قال مين هتصور الاول

طبعا احنا ال2 عملنا مش واخدين بالنا

الراجل قالى لصاحبتى طيب اتفضلى حضرتك

قامت وقام المذيع سألها انتى كلية ايه قالتله اولى هندسة و سألها الاسئلة دى ..

1) لو واحدة عانس واتقدملها اى حد تتجوز ولا لأ ؟؟؟

معرفش ليه وانا قاعدة حسيت ان كلمة عانس اول مرة اسمعها

قمت لقيت بنت ف 2 اعدادى قاعدة جنبى قلتلها يعنى ايه عانس

قالتلى يعنى كبرت اوى ومتجوزتش

ساعتها افتكرت عانس دى واستغربت انا ازاى نسيتها

المهم كان رد صاحبتى

// اه طبعا تتجوز اكيد احسنلها ...

سألها المذيع .. تحبى فرح كبير ولا تتجوزى ؟؟

// بصراحة .. انا نفسي فى الفرح الكبير

سألها المذيع .. ترضي تتجوزى واحد يقدر يجيب لشقتك اوضة النوم بس ؟؟

// قالتله لأ اكيد ... انا ممكن استناه بس نتجوز كناس طبيعية ،،

الراجل شكرها وكان واضح ان الموضوع سهل جدا جدااااا

الراجل طلب منى اقوم

قمت ووقفت قدام المذيع

فبيقوللى .. انتى طبعا داخلة 2 هندسة (رفع من معنوياتى ما انا مش طفلة اهو )

قلتله لأ .. انا اولى علوم

لقيت المذيع بيقولى يااااه انا كمان .. انتى قسم ايه بقي

قلتلة شعبة فيزيائية

قالى انا جيولوجيا

ولقيت واحد تانى بيقوللى لالالالا احنا مبنصورش بتوع علوم

قلتله طيب خلاص امشي يعنى ؟؟؟

قاللى لا بهزر كنت هقوله يا سخيف بس مسكت لسانى

وبعدين المذيع فكر دقيقتين وقالى ... انتى حلوان (ما مفيش فى القاهرة ولا عين شمس التقسيمات دى !!)

قلتله اه

قالى انا كمان انا خريج السنة دى

معرفش ليه قمت حادفاله الكلمة دى ف وشه ..

وبتشتغل مذيع !!

قاللى لالالالا انا هشرحلك بس بعد البرنامج استنى انتى بس

انا اتخضيت من الكلام وقمت قلت .. هو ايه ده

قام قالى لالالالالالالا ما احنا معانا مذيعة بردو خريجة علوم حلوان

انا لاحظت كده ان احنا مش بنصور

بجد بدأت افكر تكونش دى الكاميرا الخفية او برنامج زى اشتغالات اللى بييجى على أو تى فى

لقيت المصور وهو راجل كده شكله عاقل قطع عليا تفكيرى و قالى بصي للكاميرا بقي والمذيع بيكلمك

قلتله ازاى بقي حد يكلمنى يمين وابص انا شمال

المهم قام الواد اللى كان معترض ع ان انا من علوم قالى طيب بصيلى وراح وقف جنب الكاميرا خبط لزق

قلتلهم لا خلاص هحاول ابص للكاميرا

وقفت والمذيع بدأ

سألنى .. واحدة عانس تتجوز اى حد ؟؟

قلتله : لأ طبعا ده جواز مش لعبة ،، يعنى لو واحد مناسب ماشي لو مش مرتاحاله اكيد تفضل عانس احسن ،

سألنى تانى . فرح كبير ولا تتجوزى ؟؟

قلتله : هو الفرح الكبير ده من غير جواز يعنى .. ايه السؤال ده ؟؟ (معرفش ازاى اتكلمت كده )

المذيع بلم وقالى : لأ يعنى جواز بفرح بسيط ولا كبير

قلتله : والله فى حاجة اسمها ارتياح وقبول والشخص اللى هـ..( وزرجنت معايا الكلمه دى .. اتكسفت اقول هحبه) فضلت معلقه كتير ع( هــ ) دى وقمت اديت ضهرى بسرعة للكاميرا استخبيت

قام اللى كان ورا الكاميرا هياكلنى والمذيع قاله معلش معلش نعيد .. (يا شماتة اصحابي فيا )

المهم عدنا وجاوبت نفس اجاباتى والسؤال التالت بقي كان

المذيع : ترضي تتجوزى واحد يقدر يجيب لشقتك اوضة النوم بس ؟؟

قلتله انا : اه لو شارينى ومرتحاله ايه المشكلة ؟؟

بس وقمت خلصت وسألت الراجل الملتحى .. ده هييجى امتى قالى بعد 15 اكتوبر

قلتله وانا افضل فاتحة القناة من 15 اكتوبر مستنية

قام ضحك مع انه كان متغاظ منى وقالى لأ وقت كذا كذا

قلتله شكرا وانسحبت واخدت تريقه جامدة جدااااااااااا من اصحابى ع اللى حصل

وبعد كده اخدتهم من ايدينا وروحنا معرفش ليه مكنتش طايقه النادى

انتوا لو كنتوا مكانى

كنتوا هترضوا تصوروا اصلا؟؟

وكنتوا هتجاوبوا بايه؟؟

معلش يا جماعة انا بحب احكيلكوا كل حاجة وعاوزة اخد رأيكوا فى تصرفى كله بجد

ومش عارفة احط الموضوع فين

هسيب الأمر ده للمشرفين بقي

ودمتم بود ....