حملة مصر الواعية ... اعرف حقك عشان تعرف تاخده

[بندق__2007]

طبعا بعد فترة ما شوفتش فيها بيومى اتكلمت معاه النهاردة عن التوعية الدستورية و شرح بعض مواد الدستور كان النهاردة الكلام فى حاجات مهمة و ده كان الحوار

-السلام عليكم
-و عليكم و السلام و رحمة الله و بركاته
-ازيك يا بيومى
-الحمد لله ايه الغيبة الطويلة دى
-ظروف بقى يا بيومى هنعمل ايه
-خير ان شاء الله
-نكمل كلامنا و لا انت زهقت
-بقى ده كلام .... نكمل طبعا
-احنا كنا وقفنا عند اختصاصات رئيس الجمهورية
-ايوة صح
-هقولك يا سيدى و هقولك على شوية طرائف للدستور عشان تضحك براحتك
-ماشى
-رئيس الدولة او رئيس الجمهورية اول مهامه فى المادة (73) هو حماية الوحدة الوطنية و العدالة الاجتماعية و مراعاة الحدود بين السلطات التنفيذية لضمان تأدية دورها فى العمل الوطنى و بعد كدة فى حالة الخطر الداهم على البلاد له الحق باتخاذ قرارات مصيرية باستشارة رئيس الوزراء و استفتاء الشعب فيها خلال ستين يوم من تاريخ صدورها و ده مضمون المادة (74)
-ممكن توضحلى ايه الخطر الداهم ده ؟
-يعنى مثلا يا بيومى لو حصلت كارثة طبيعية يتخذ الاجراءات اللى يشوفها مناسبة و يجرى استفتاء شعبى عليها و حاجات زى كدة
-جميل كمل
-الرئيس هو القائد الأعلى للقوات المسلحة طبقا للمادة (150) و رئيس السلطة التنفيذية طبقا للمادة (137) و الرئيس الأعلى للشرطة بمقتضى المادة (184) و رئيس مجلس الدفاع الوطنى المختص بالكوارث و تأمين سلامة البلاد وفقا للمادة (182) و يحق له حل مجلس الشعب و الشورى او إقالة الوزارة فيما لا يحق لمن ينوب عنه فى حالة غيابه أو مرضه أن يحل مجلسى الشعب و الشورى او يقيل الوزارة أو طلب تعديل الدستور طبقا للمادة و هو رئيس لجنة تضم رؤساء الهيئات القضائية طبقا للمادة (173)
-جميل اوى يعنى هو الكل فى الكل و رئيس كل حاجة و اى حاجة
-يعنى حاجة زى كدة
-كمل
-فى حالة غيابه يحل محله نائب رئيس الجمهورية أو رئيس مجلس الوزراء طبقا للمادة (82)
-كويس كدة انت مش محتاج تقولى وظائف و اختصاصات الناس التانية هو الرئيس كفاية اوى يمشى البلد فى كل حاجة
-انت شايف كدة
-انا مش شايف غير كدة
-عموما اسيبك بقى مع طرائف الدستور المصرى
-ماشى اهو الواحد يخفف على نفسه
-* المادة 190
تنتهي مدة رئيس الجمهورية الحالي بانقضاء ست سنوات من تاريخ اعلان انتخابه رئيسا للجمهورية العربية المتحدة.
* المادة 80
يحدد القانون مرتب رئيس الجمهورية.ولايسر تعديل المرتب اثناء مدة الرئاسة التي تقرر فيها التعديل.ولا يجوز لرئيس الجمهورية ان يتقاضى اي مرتب او مكافاة اخرى.

* المادة 95
لا يجوز لعضو مجلس الشعب أثناء مدة عضويته أن يشترى أويستأجر شيئاً من أموال الدولة، أو أن يؤجرها أو يبيعها شيئاً من أمواله أوأن يقايضها عليه، أو أن يبرم مع الدولة عقداً بوصفه ملتزماً أو مورداً أومقاولاً.

* المادة 112
لرئيس الجمهورية حق إصدار القوانين أو الاعتراض عليها.

* المادة (172 ) و (173 )
المادة 172
مجلس الدولة هيئة قضائية مستقلة، ويختص بالفصل في المنازعات الإدارية وفى الدعاوى التأديبية، ويحدد القانون اختصاصاته الأخرى.
المادة 173
تقوم كل هيئة قضائية علي شئونها‏، ويشكل مجلس يضم رؤساء الهيئات القضائية يرأسه رئيس الجمهورية‏،‏ يرعى شئونهاالمشتركة،‏ ويبين القانون تشكيله واختصاصاته وقواعد سير العمل فيه‏.
* و المادة (150) و (180)
المادة 150
رئيس الجمهورية هو القائد الأعلى للقوات المسلحة، وهو الذي يعلن الحرب بعد موافقة مجلس الشعب.
المادة 180
الدولة وحدها هى التى تنشئ القوات المسلحة‏،وهى ملك للشعب‏، مهمتها حماية البلاد وسلامة أراضيها وأمنها‏، ولا يجوز لأيةهيئة أو جماعة إنشاء تشكيلات عسكرية أو شبه عسكرية‏.
ويبين القانون شروط الخدمة والترقية في القوات المسلحة.
و فيه شوية كمان تقرى الدستور بقى و تفهمهم
-هههههههههههههههههههههههههههههههه
-مش قولتلك هتضحك للصبح
-حاجة تضحك فعلا
-يلا المرة الجاية كلامنا عن حاجة جديدة
-و انا مستنيك
-ماشى خد بالك من نفسك يا بيومى
-ان شاء الله
-السلام عليكم
-و عليكم السلام و رحمة الله و بركاته