ليه بحبك يا مصر؟؟

[أحمـدنجـم]

هو بصحيح يا جماعة لو كان الواحد فينا اتولد لقى امه غير امه الموجودة حالياً بالفعل كان حب الموجودة حالياً بالفعل ولا كان حب امه اللي اتولد اتلقاها امه ؟

سؤال مهم جداً .. أقولكم ليه .. لو كنا مثلاً أتولدنا في السعودية .. كنا أكيد هنحب السعودية .. عشان اتولدنا فيها .. وكلام الابتدائي زي ما قال أ/ احمد رضا ..

بس في فرق بين حب الأبناء لأمهم وحب الأم لأولادها ..تعالوا نفكر شوية مع بعض ..

حب الأم لاولادها .. غريزة فطرية واللي بيسموه الأمومة لكن حب الأولاد لأمهم دا مكتسب من معاملتها ليهم .. يعني لو في أم قاسية ودا قليل جداً .. أكيد حب الأولاد ليها مش زي الأم الحنينة ..

يمكن كان فيه عهد من العهود اكتسب فيه المصريين حب البلد دي جداً عشان كانت حنينه ..

والسؤال دلوقتي .. هل مصر حنينه ؟

والسؤال الأهم .. هند إنتي تقصدي ايه بـ (مصر ) ؟
المكان .. ؟ الشعب ..؟ الحكومة؟ المناخ ؟ الأهرامات .. النيل ؟ ايه بالظبط ..

أنا عن نفسي يا جماعة ليا سلسلة زجليه اسمها أنا المصري وسلسلة تانية اسمها لحظات وجع .. معلش اوعو تعتبروه إعلان وتحذفوه ..ههههههه

القصائد دي بحب مصر فيها جداً .. بس بلوم عليها .. بحب المكان .. وأكره الأوان .. بحب النيل وأكره اللي يلوثه (درس قراءة ) هههههههه ، بحب الشعب وأكره سلبيته وإحساسه إنه لو اتكلم هيجوع ويتسجن ويتشحطط ويحصله زي ما حصل في فيلم (عايز حقي) يعني وطنه يتباع ويطلع عمنا عبد المنعم مدبولي الله يرحمه يقولنا (عواد باع أرضه)

الخلاصة يا هند عشان مرغيش كتير زي الصابونة اللي بترغي ع الفاضي .. إني بحب مصر والله بحبها .. بس ساعات من كتر حبي لها وزي ما قالت طنط إليسا (من كتر حبي ليك خلاص قربت أكرهك عشان مش عارفة أكتر م اللي عملته أعمل ايه)

ساعات من كتر حبي بزعل منها وعليها .. بزعل عليها ساعات مننا _الشعب_ ومنهم "الحكومة" وبزعل عليها لما اتلاقي ولادها مش بيفرقوا بين المكان وبين الأوان .. لان ممكن يجوز الله أعلم ناس ييجوا بعدنا في عهد الملك (فلان) أو الرئيس (علان) يحبوها .. يعني يحبوا الأوان والمكان مع بعض ..

عشان كده بنحبها .. وخلاص ..