خود في طيرك...

[hazem_ayman]

هل سمعت عن تجربة الضفدع <<<< الأخ هياكل دماغنا بعلم النفس بتاعه ولا ايه ؟>>>> لا مش هاكل ولا حاجه بس هقولها خفيف خفيف .. العلماء جابو ضفدع ورموه في ميه سخنه .. الضفدع عمل ايه نط من الميه برا مباشرة ليه ؟ لأن الميه سخنه وما استحملش .. رجعوا العلماء حطوه في ميه عادية ففضل مكانه وشغلوا تحته نار الميه فضلت تسخن تسخن لغايه لما وصلت درجه الغليان والضفدع ما اتحركش لدرجه ان الضفدع اتسلخ في مكانه ومات .... حد فهم انا قصدي ايه من المثل ده ؟ اللي مافهمش بقي يكمل معانا الموضوع للأخر ...


خود في طيرك .... كلمه ربما سمعها الكثير وربما يستهجنها البعض وربما يرددها البعض من منطق ركوب الموجه وكله بيقول كده يا معلم .. هذه الكلمه كلمه يراد بها معني وقح وهي دارجه بين قطاع من الشباب واذا اردت المعني الاساسي بوقاحته اضف نقطه فقط لحرف من حروف اخر كلمه وستفاجيء بالمعني اذا كنت جاهلا

المشكله ان هذه الكلمة قيلت في فيلم سنيمائي شاهده الكثير بين شباب وفتيات شيبان وشباب وصبيان ولم يعترض احد ضحك من ضحك واستنكر من استنكر وانا لا ادري الي اين نسير .

وايضا كلمة a7a ثلاث حروف اتقالت ومرت مرور الكرام علينا وهيا في الاصل كلمه قبيحة او ( درج استخدامها ) كمدلول قبيح والكلمة بتتقال علي التلفزيون قدام الاب والام والاولاد بنات وشباب ولا حد هنا
احنا رايحين فين ؟

حد هيقولي يااعم الفيلسوف الكلمة دي في الاساس حرف اعتراض ( حسب الروايه المزعومه يعني ) وخرجت ايام احمد عرابي وكانو بيقولوا ( قحة قحه لا تتنحي ) ........ يا سلام يا جماعة علي المؤرخ الصايع اللي الف الحتة دي
المهم ماعلينا ....هأعتبر ان كلامك صح وان معناها كان مش وحش بس انت نسيت حاجه
في قاعدة بتقول .. المعروف عرفا كالمشروط شرطا والمعروف ان الكلمة دي درج استخدامها كلفظ قبيح .. هتقولي مش فاهم اوكي اوضح لك :

كلمة مأتم ... طبعا الكل عارفها يعني ايه ( الكل في صوت واحد يعني عزا او ميتم ياعم الإور ) طيب تتفاجيء بقي لو قلت لك ان كلمة مأتم في الاساس تعني تجمع الناس في ( حزن او فرح ) ...ركز معايا في الحته اللي جايه دي ( ولكن جري ) استخدامها علي الحزن فغلبت ؟؟؟ أظن واضحة دي .. تقدر تقول لواحد بيعزمك علي فرحه ..( انا هأحضر في مأتمك ) أظن هيكسر راسك ضرب ولا ايه ؟

وكلمه حقيرة ... لو قلت لواحد ( قهوتك حقيره ) ممكن يضربك صح .. لكن معناها في الحاله دي قهوتك قليله لكن جري استخدامها علي لفظ الحقاره والدنائه فغلبت ..

مثل كلمه ميناء اصلها اللغوي ( موناي ) ولكنها اقرب للكسر منها للضم فقلبت ميناء تخيل لو قلت لواحد عليها موناي مش هيضحك عليك ؟

هو ده العرف اللي بيخلي الشيء يتغير من وجهه لوجهه واظن وصلت الكلمه ومفهومها ..
اننا بقي نلاقي الكلمه دي منتشره والوضع زي ما بيقولوا ( ايزي ) صعب علي راي صحفي بيقولك ممكن تلاقي بنتك داخله عليك في يوم تقولك ( a7a يابابا عايزة اروح عند صاحبتي )



يعني مش سيما بس لا دا سيما وجرايد .... وعلي رأي المثل الشهير ( غطوني وصوتوا )

اضافة الي مصطلحات قذرة اخري في الافلام منها علي سبيل المثال

في فيلم ظرف طارق احمد حلمي بيقول للراجل ابو وش احمر ده ( حمـــرة ) ويرد عليه يقوله هي ايه اللي حمره بالظبط .... واظن معظم الشباب فاهمين القصد من ورا الكلمه دي وبعض البنات اصلها واضحه للأعمي واللي عنده الثلاثي كمان ... كلمة شاب بايظ طلعها .. الشباب مسكوا فيها .. تقوم تحطها في فيلم !

وفي فيلم خالتي فرنسا

المسماه بعبلة كامل بتقول للبنت .. خلي املك في ربنا كبير لا العمشه بتبور ولا ام ( تسكت لحظات وتكمل ) ولا ام طرطور ...! واللي مش عارف المثل ده ده مثل شعبـــــــــي بجح ( ايوه بجح ) لان الكلمه اللي مكان طرطور دي المفروض انها ( جزء من مكان حساس في جسد الأنثي البالغه ) ومش فاهم ليه نحط حاجه زي دي ؟

وحاجات كتير مش هوجع دماغكو بيها <<< الناس بتسمع الافلام تضحك وده بيسمعها عشان يخنق نفسه ويخنقنا ولا ايه >> معلش انا عارف اني طولت عليكم

نرجع بقي لحكاية الضفدع اياه .... <<<< اه صحيح ايه حكايته >>>>>

الحكاية وما فيها اننا لو دخلنا علي الناس مره وحده حاجه مش متعودين عليها اكيد هيرفضوها بشكل مباشر زي الضفدع اما نط من الميه السخنه اول ما حطوه فيها في تجربه ( كسر الواقع المحيط ) ... وبالتالي مش هينفع انك تعمل كده مره وحده لازم ايه ياريس وحده وحده .. مره كلمه في فيلم .. مره تعليق في مسرحية ... مره هنا مرة هنا لغايه لما نوصل لمرحله الاعتياد النفسي وساعتها بقي مفيش حاجه هتكون عيب يا معلم ( وعم عشم مات يوم التلات والمعاملة خد وهــــــــــات ) صح ولا ايه ؟ بيــس

وصلت فكره الضفدع ؟ ......... ووصلت فكره الموضوع ........ حد بقي يقول لي احنا رايحين فين ؟