تعيش وتآخد غيرها

[أحمـدنجـم]

لو تدققي النظر يا همس في ايد المالكي هتلاقي عليها ختم البيت الأبيض الراجل معذور يا أخوانا .. مسير ومش مخير .. لو محطش كفه عشان يخمس على بوش من حساده وعزاله وكياده .. هيلاقي ألف كف نزلت على قفاه .. أصل المحروس المالكي دا من الناس اللي قلعوا عين الحسود عشان مطولش سي بوش اسم الله عليه .. أما بالنسبة لمنتظر الزيدي .. وحكاية لو أنا مكانه هعمل كده ولا لأ .. بصراحة مقدرش أقول آه ومقدرش أقول لأ بس أكيد لو اتعمل في مصر اللي اتعمل في العراق - بعد الشر والشر بره وبعيد - أكيد لو انا مطرحه هعمل كده .. اوعوا حد بقى يقولي هي مش العراق أرض عربية وانت بتفرق بين مصر والعراق وانت معندكش عروبة ولا انتماء .. عاوزين نكون حياديين الراجل بوش دا يا جماعة بيحب مصر وكان حاططها دايماً في عنيه و حاططها في الحسبان والله صدقوني .. بس ملحقش يا عين امه يختمها .. قصدي يخدمها .. زي ما خدم العراق ..

والله والله .. أنا لو مكان الزيدي ودا من قلبي والله سيبكوا من التهكم اللي فات دا والله يا أخوانا .. لكنت دورت على اقدم جزمة - لا مؤاخذة معدتش الجزمة كلمة وحشة طبعاً - وكنت ضربتها على خدوده الحمرا بتاع الحرية والديموقراطية دا .. بوش اللعين .. -لا مؤاخذة إني قلت اسمه - بس عاوز أقولكم حاجة .. هو المضروب بالجزمة دا هو بس اللي يستحق الضرب .. مفيش غيره يعني ؟؟ والله كل سلبي كل حرامي كل متخاذل كل بايع كل خاين كل مستسلم كل غبي كل نايم يستاهل ألف جزمة تنزل على دماغه .. وسلملي على باتا ..