لو لم اكن مصريا كان يبقى اشطة اوى...

[احمد رضا]

كويس وصلنا لمرحلة متقدمة من الكلام
ولتكن مش من اتجاهاتي ( للأسف )
---
نيجي لأول نقطه انتي اتكلمتي فيها ألا وهي ( اديني دليل انها راضية )
تمام
في الأفلام زمان كانوا دايما بيقولوا للبنت لما تيجي تتخطب
السكوت علامه الرضا ؟
اللي في ايديهم انهم يغيروا
اتنين
( الإخوان - قيادات الجيش )
وبيأتي بعدهم النصاريين والحوارات الفاشله دي

الإخوان كانوا في المظاهره اللي كنت انا ماشي من جنبيها مالا يقل عن 6 آلاف متظاهر إخواني
ولما النصاريين قالوا ياريت ياجماعه ولو نهتف هتاف واحد بس او اتنين ضد مبارك اللي كان سبب في سبع تربع المشاكل اللي بتحصل وده بسبب التصريح اللي يعتبر اخدوه من كلامه للضرب
ألف متظاهر كانوا بيقولوا قاااااادم .. قااااادم وبيضربوا برجلهم في الأرض يعمونا والله يعمونا بالتراب
مش عارف حسسوني ان اللي جي مش الجيش .. لالالا اللي جي كان سوبر كرانشي باين
وطلع في الآخر المرشد ( مش إسلام صاحبي طبعا :D )
ولما قال للمرشد بتاع الإخوان فيها ايه لو هتفنا ضد مبارك لانه السبب في ده
قالوا لالالا مبنهتفش ضد مبارك
( يعني ساكتين علي الخنزير اهوه عشان ميتسحبوش ويتضربوا علي قفاهم )
آه يابلد تخاف ومتختشيش
ده بالنسبه للإخوان اللي هما يعتبروا الجزء الأكبر من البلد
( السكوت علامه الرضا )
--
الناصريين محترفين في الشعارات صراحه .. لكن العمل ولا حاجة .. حمدين عمال يتصرف غلط وفاكر نفسه انه خلاص بقي عبد الناصر .. حتي لما كنت بقعد معاهم وأشوف طريقه كلامه .. حتي اعداد الناصريين هنا يوم ما يتنططوا يعملوا مظاهره فيها 50 واحد .. لو واحد آيام سوري مجرد بثق عليهم بثقه هيغرقهم ويخليهم يهربوا
لان اعدادهم صغيرة .. لكن الحاجة الكويسة اللي فيهم انهم بيضربوا في حسني لكن بدون تأثير
زي ما تضرب بالطوب في عربيه مضرعه
وبالمناسبة تم اعتقال عدد لا بأس به من طلبة الجامعات اللي كانوا في المظاهره الأخيرة
--
بالنسبة لقيادات الجيش
انا في اعتقادي ان قيادات الجيش قادرة انها تعمل وقفه كفيلة بقطع العلاقات الدبلوماسية مع اسرائيل
وكفيلة انها تقطع الغاز اللي بتمد بيه إسرائيل وكفيله انها تفتح المعبر لأهالي غزة اللي بيموت منهم مئات
ده إحنا يوم ما مات مننا ظابط واحد ملهوش ذنب طلعنا نعيط في التلفزيونات ونلطم .. مابالنا بالعائلات اللي كل أولادهم بيموتوا ورب الأسرة يكون قاعد ف بيته شايل طفل رضيع وحاضن مراته وبناته وولاده ومستني لحظة موته
ووقفه رجال الجيش كفيله انها تعمل حاجات كتير بس طبعا ساكتين
( السكوت علامه الرضا )
--
انتي فكراني لما بقول البلد ساكته ومش بتتكلم بكون بتكلم علي مين ؟
علي شوية المستضعفين ( اللي هما إحنا ) اللي قاعدين يعيطوا في البيوت ويقولوا حسبنا الله ونعم الوكيل في إسرائيل ؟
لاء انا بتكلم علي اللي في ايدهم يعملوا حاجة
عن أظافر البلد دي اللي تقدر تخدش النظام
مش شوية الستات اللي قاعدين في البيوت وعمالين يقواوا ياضنايا يابني
لان دول مش في ايديهم حاجة
--

لكن فيها خير كتير ,فيها همة ,فيها قوة.فيها دين ثم دين ثم دين ما شفتوش مع شعوب تانية بالشكل ده

علي فكرة انا كمان حافظ النشيد .. المصريين اهما حيوية وعزم وهمه
--
انا قولت بلاش استخدام الكلمات المثيرة اللي لا علاقه لها بالواقع ياجماعه
الله يبارك فيكم
انتوا بتفكروني بمسرحية الزعيم لما كان يقولوا البلد محتاجااااااااااااك يا زيييييييييينهم
وعادل إمام ( أحرق الله وجهه ) يقولوا نيييييييييييييييييييييياع ( صرخة حماسه )
الواقع بيقولوا
أولا : مفيش همه طبعا لإن الهمه ممكن تؤدي للتغير وأدي حال العرب والبلد من عشرات السنين ( إن لم تكن المئات ولم يكن التاريخ ملفقا ً )
ثانيا : فين القوة .. وإيه فايده القوة من غير عقل ؟ مهو بتوع الأمن المركزي زي البغال .. بس مشفوط عقلهم لذلك ميقدروش يعملوا حاجة مبرمجين اللي يقدروا يعملوه يلطشوا في المتظاهرين ويقولوا ( هيا الناس دي موارهاشي مصالح .. عليا الطلاج عالم فاضية )
--
دين ثم دين ثم دين ؟
انتي سافرتي برا ؟
شوفتي الدين عامل ازاي برا ؟
شوفتي المسلم الحقيقي في الـ MAS ( Muslim American Society ) شوفتيهم ؟
شوفتي أعمالهم ونشاطاتهم وازاي بيتدارسوا الإسلام وقصص الصحابة ؟
شوفتي التجمعات الشرعية اللي بتتعمل للمسلمين الأمريكان لتدارس وممارسه شئون دينهم ؟
أحب أقولك لا مسلم مهان إلا المسلم العربي لانه لا يستحق اللقب اللي هوا شايله أصلا
--

والله العظيم مافيش ولا كلمة م كلامي ده دلوقتي ليها علاقة بالقلب عشان عندي العقل هو اللي بيحكم الاول عشان ما تقوليش ان مشاعري ماثرة عليا

أولا الدافع اللي حركك عشان تردي عليا هو مش عملية منطقية أجراها عقلك .. هو عملية شعورية اجراها قلبك وقال " إيه ده إزاي يقول علي بلده كدا .. ازاي يقول علي مصر أم الدنيا ( نفسي أعرف مين ابوها ) كدا ؟
وده اللي حركك عملية شعورية وليس عملية منطقية .. لكن لو عملية منطقية كنتي هتبصي للواقع وتوافقيني وبعدين تنادي بالأمل او لنص الكوبايه المليان ( ده لو لسه فيه كوباية أصلا :D )
--

ثانيا مقلش ولا تبقي حلوة ازاي

طبعا انتي مجاوبتيش علي سؤالي خالص .. انتي جاوبني علي سؤالي بسؤال ملهوش علاقه بالسؤال

بمعني
انك بتقوليلي وانت دورك ايه ؟
إن كان ليا دور في البلد دي أصلا فدوري زي اللي قاعدين في البيوت أقول ياضنايا يابني وبس
لاني ولا مستعد اكون كلمانجي زي الناصريين ولا منافق زي الإخوان المسلمين اللي منهم 88 واحد تقريبا في مجلس الشعب
ولا مستعد أسيب مستقبلي وأسس حركه جديدة اسمها الرضاويين وابدا اخوض حرب هتنتهي قبل ما تبتدي ..
:D
--

واذا ما صقفتش هايكون لينا حساب تاني عشان هاعتبر ده وعد بجد

حاضر عنيا الاتنين هبقي اقول أحفادي الكلام ده عشان يصقفوا علي اللي هيعملوه أحفادك
---

ياريت يا احمد والله انك كنت مسلم امريكي لسبب واحد بس شوف كل او يا سيدي معظم اللي بيسلموا من امريكا بيعملوا ايه؟؟؟والله العظيم بينزلوا فورا على مصر عشان اامنلهم من هناك وهايتعلموا فيها الدين صح من ناس يحاولوا يتفهموا وضعهم

لافيني بمصدر المعلومة وبعدين نتدارس الجزء ده ... مع العلم ان الإسلام في المجتمع المسلم الإسلامي يُدرس ويتدارس علي أعلي مستوي ومن ناس كانوا مستشرقين واسلموا بعد نقدهم للقرآن الكريم وإيمانهم بيه
وليس مجرد ورثه للإسلام زي أغلبنا طبعا

---
مش قصدي نقاش ولا كلام غلط ولا اي حاجة لكن اللي مفور دمي بس انك شخصية كويسة اعتقد عندك قدرة على الوصول الى هدفك

أولا ربنا يكرم أصلك ده من ذوقك
لكن أحب أقولك ان الهدف مبيتحققش من خلال مجرد ناس بتتكلم
عبد الناصر لما حب يعمل ثورة عمل ثورة ( في ضوء إمكانياته المتاحه كظابط جيش )
إذن انا عندي إمكانيه إيه كمواطن عادي عشان أقدر انفذ حاجة
لسه بدري
لما أحقق هدفي الإجتماعي الأول .. ويبقي عندي الإمكانيه ساعتها هفكر اعمل حاجة
لكن احنا متعمدين علي شوية كلاب مسكوا مناصب ونسيوا اننا اللي وصلناهم بأصواتنا ( استغفر الله العظيم )
---

انت لما تدعي ربنا يا احمد لازم تتوقع الاجابة بل تتيقن منها كمان طيب فين اليقين ده

" إن تنصروا الله ينصركم "
صدق الله العظيم
" إن الله لا يغير قوما ً حتي يغيروا ما بأنفسهم "
ربنا مبيساعدش مجرد ناس بتدعي ومبتحاولش تعمل حاجة
انا بحاول أعمل حاجة .. بس المشكلة ان حاجتي انا هتاخد وقت طويل
عبال ما أوصل للإمكانيه اللي مبقاش فيها كلمنجي
الله المستعان
--

القيامةويقولي يا هند انا اسناني اتكسرت واتضربت واتعذبت واتبهدلت بس عشان اوصلك انتي الدين ده ووصلتو
انتي بقى عملتي ايه عشان تحافظي على مجهودي ؟؟؟انا عن نفسي مجهزة الرد
انت مجهز ؟؟؟

حلو اسم هند
وياتري ردك ايه يا هند ؟
إن كان علي ردي فدي مسألة بيني وبين الرسول أعتقد ان الرسول هيكون عالم باللي بيحصل
وبمين اللي كان في ايده يغير ومين اللي مكانش في ايده
لذلك فنخليها يوم القيامه ونبقي نشوفها سوا ( إن كان حد فاضي للتاني )
---
عموما ً اعتبريني مقولتش كل الكلام ده
واعتبري مشاركتي مش موجوده
لكن بعد ردك طبعا هيطلع الناصريين والإخوان
الناصريين يتهموني بفساد التفكير
والإخوان بفساد الدين
والعاديين
هيفضلوا يقولوا يااما ربنا ينتقم منك
يااما يقولوا ياضنايا يابني
--
السلام عليكم
ومش هقدر ادخل الموضوع ده تاني للأسف لان الكتابه اخدت مني وقت كتير
كان ممكن استفاد منه في حاجة تانيه
في رعاية الله
وربنا يوفقك في حياتك