نقابة المعلمين الجديدة

[هدى مجدى]

أين النقابة النائمة؟
أين روابط المعلمين القديمة و الجديدة؟
اين حافز الإثابة الـ75% للمعلمين
و الا لازم نعمل إضراب زى الإداريين؟؟؟؟؟!!!!!!!

على فكرة أنا شايفة اننا و أنا أولكم غلط و بدأنا نتكلم ضد بعض
الإدارى فى نفس المركب معانا
احنا فى المدارس مش بنقبض زى أقل إدارى فى الإدارات و الدواوين
ده صحيح
و المفروض المدرس هو عصب التعليم كله
و المظلوم بحق هو الإدارى اللى فى المدرسة
و لكن كلنا مظلومين بالمقارنة مع 10% من الكبار اللى فى الوزارة اللى بيلهفوا 80% من موازنة الأجور فى الوزارة كلها
و احنا هنا بنتخانق على الفتات بتاعهم اللى بيرموه لنا اللى هو 20% اللى باقية من موازنة الأجور
و برضه لو بصينا لوزارات و أماكن تانية فى نفس الدولة بتاعتنا هنلاقى ان احنا مفرطين فى حقوقنا جدا بالمقارنة مع البترول و البنوك و الاتصالات و وزارة العدل و الضرايب و غيرها
يا ريت نبص لوضعنا صح و نطالب بحقوقنا بمساواتنا بباقى موظفين الدولة و بالعاملين بالوزارة اللى شافطين 80% من موازنة الأجور فى وزارتنا فى كروشهم من الحرامية الكبار
بلاش نبص لبعض احنا الصغيرين و يا ريت نتعلم نطالب بحقوقنا صح و أولها مساواتنا بباقى الوزارات و المصالح "إياها" اللى معمولة للكوسة و الوسايط
و أول حق نركز عليه و نقاتل و نضرب و نعتصم من أجله هو الـ75% الحافز اللى بياكلوه علينا
رغم إنى شايفة إن الإدارى اللى مش بيشتغل جوه المدرسة مش من حقه لا الكنترولات و لا أى عمل خاص بالامتحانات لأنه عمل المدرس و بالتالى مش من حق الإدارى اللى من بره المدرسة صرف مكافأة الامتحانات الـ200 يوم لأنه ببساطة ملوش فيها لأنه لا بيراقب و لا بيصحح و لا يعرف يصحح مكان المدرسين لو المدرسين عملوا إضراب عن التصحيح
تحياتى