حاسبات و معلومات و لاّ علوم

[Eng. Alios]

من رأيي الشخصي
حاسبات و معلومات = علوم حاسب

الاتنين تقريباً زي بعض
في الشغل

لكن خلينا نتكلم في الواقع
رياضة مرحلة تانية فيها ناس ياما كويسين
و المفروض انهم كانوا يدخلوا هندسة
لكن منهم لله الوزارة قفلت الهندسة على مرحلة اولى
و كذلك بقى الفنون الجميلة عمارة و معهد الطاقة في اسوان و بعض كليات الحاسبات و المعلومات و التخطيط العمراني
كل دول قفلوا
فـ ح يتبقى ايه لبتوع رياضة مرحلة تانية ؟

الناس هنا كل همهم اللقب
انا مهندس
لقبك مهندس على عيني و على راسي
لكن بتشتغل ؟
لقبك دكتور على عيني و على راسي
لكن بتشتغل ؟

و الله فيه ناس بتبقى خريجة دبلومات
و بتكسب اكتر من مهندسين و دكاترة
و بتجيلهم فرص عمل
ده علشان بيدوخوا و يدوروا هنا و هناك
و ربنا بيكرمهم لانه عارف انهم تعبوا و اتظلموا

ما حدش يزعل لو جات له علوم او حاسبات او اداب
المهم يتميز
و يكون نفسه بدري بدري
يشتغل انشالله من اولى كلية اي حاجة
علشان يلاقي اكل عيشه
لان البلد دي اكل عيشها قليل
و اكل عيشها دوخته صعبة جداً

و ماحدش يفرح قوي لو لقى نفسه دخل هندسة
زي ما ناس السنة دي بتقول الحمد لله ان هندسة لمت الناس النضيفة
مش اللي جايبين 92 و 91
نقول لهم : بكرا نتفرج و نشوف

الكلية مهما كانت - اصعب من الثانوية العامة
و مش اي حد يعدي منها بالساهل
الا بقى لو قعد على كتابه من اول يوم في السنة
و الـ 24 ساعة

كتير من بتوع هندسة و طب و صيدلة مش لاقيين شغل
و كتير كتير كتير
بل و كمان بيزودوا عدد سنوات دراستهم في الكلية
علشان بيسقطوا
ما هو خلاص ما دام الواحد دخل كلية
يبقى مفكر نفسه ارتاح

المهم
علمي رياضة مقداموش غير حاسبات و معلومات
و انا جايب 379
و ناس يااااما قالت لي ح تلحق حاسبات
بس انا مش ضامن
و مش متأكد

احسن حاجة نخليها على الله
و نرضى بالواقع
و ربنا خيره كتير
و بيجي الخير ده و لو بعد حين
مش كده ؟