تجمع طلبة تجارة انتساب "جامعة القاهرة" 2009 - 2010

[invent_yas2020]

المشاركة الأصلية كتبت بواسطة mina_totti65

انا سئلت فامبير على شوية حاجات كده على الخاص ان شاء الله تفيدكم بخصوص الامتحانات ورقم الجلوس وكده

الاسئله اللى فوق دى انا اللى كنت بسال واللى تحت ده الرد بتاعه


قتباس: ايه هو الid اللى احنا هنشوف بيه النتيجه ده هو رقم الجلوس يعنى ولا ايه مبدأياً اي طالب في الكلية عندنا بيبقاله رقمين

- رقم جلوس ودا اللي انتا هاتخش بيه الامتحان

- رقم تعريفي id ودا اللي هاتتلاقيه مكتوب على الكارنيه عندك

بس ماتحاولش تدور على رقمك على النت لانك مش هاتتلاقيه ..

الداتا بيز الحالية اللي موجودة ع الموقع لس مانزلتش الاي ديهات

بتاعة المستجدين اللي لسه داخلين الكلية السنة دي

اقتباس:
تانى حاجه هل هنروح ناخد رقم الجلوس فى ورقه من الكليه زى ثانوى كده ولا احنا عرفنا خلاص وهندخل بالكارنيه المكان بتاعنا
لا مافيش ورق هاتاخده ولا الكلام دا خالص

انتا دلوقتى عرفت خلاص رقم جلوسك وعرفت مكانك ..

روح على طول على القاعة والمكان اللي انتا شوفته في رقم الجلوس

وللتأكد ابقي اسأل اي مراقب في القاعة عن اسمك

هل هوا موجود في كشوفات القاعة اللي انتا دخلتها دي ولا لأ

عموما انا هاقولك ع اللي هايحصل يوم الامتحان عشان ماتبقاش قلقان يعني

انا والله مش فاكر انتا انتساب او انتظام .. بس متهيألي انتا انتساب

عموما انتا هاتروح الصبح عادي جدا .. امتحانك هايبدأ الساعة 9 الصبح

مبنى الامتحانات هايفتح الابواب الساعة 9 الا ربع عشان الناس تخش وتطلع القاعات

ممنوع دخول اي ملازم وورق مراجعات والكلام دا ..

يعني وانتا داخل المبنى من تحت ارمي الملزمة عشان هايقفشوك

ولو معاك شنطة المفروض انك ماتخشش بيها وتحطها في الامانات

بس نصيحة منى ليك .. بجح معاهم وخش بيها ومايهمكش ..

عشان انا ببجح وبخش بيها عادي .

لإنهم بيبقوا عايزين ياخدوا الجنيه بتاع الامانات مش اكتر .. بيستنفعوا منك يعني

بعد كدا هاتطلع القاعة بتاعتك .. هاتدور على مكانك وهاتقعد فيه زي البرنس


الساعة 9 الا خمسة كدا هاتسمع زعيق واحد او واحده ..

ودا غالبا هايبقي المعيد اللي مسئول عن القاعة

وهايقعد بقي يديك البوقين بتوع كل مرة .. مافيش غش مافيش بص جنبك ..

لو بصيت هاخد ورقتك .. والكلام دا سليم على فكرة وماتقولش انه حركات فكسانه

زمن الثانوية العامة راح ..

لو بصيت وعملت حركة كدا ولا كدا في اول الامتحان والمعيد لمحك هايذل ايمانك وهاياخد منك الورقة بس هايديهالك بعد نص ساعة او ساعة الا ربع .. لكن لو كان الكلام دا بعد مرور نص الوقت هايسحب الورقة منك ومش هايدياهلك تاني وهايقولك قوم امشي

المهم .. شوية وهاتتلاقي ورق الاجابة متوزع

ورقة الاجابة هاتتلاقيها مكتوب عليها اسمك ورقم جلوسك ومكان مقعدك وكل حاجة مكتوبة .. كل اللي هاتعمله انك تمضي على السليبس دا وتقطعه وتحطه على جنب لغاية ما المراقب يعدي عليك في نص الامتحان ياخده منك ..

وماتنساش الكارنيه او اي اثبات شخصية .. سواءا كان كارنيه جامعة او بطاقة شخصية او رخصة سواقة .. المهم انها تكون حاجة طالعه من الحكومة .. لكن كارنيهات النوادى والاحزاب والكلام دا غير معترف بيه

بعد ماهاتاخد ورقة الاجابة هاتدي الكارنيه او اي اثبات الشخصية بتاعك للمراقب دا

شوية وهاتلاقي ورق الاسئلة متوزع عليك .. الامتحان طبعا مدته ساعتين بالتمام والكمال لا بيزيدوا ولا بينقصوا

نصايح عامة بقى منى ليك :

1- اول يوم روح بدري شوية عشان قاعات الامتحانات غالبا هاتفتح بدري ممكن على 9 الا تلت كدا عشان بس اول يوم .. فانتا روح بدري عشان ماتبقاش تايه كدا

2- ماتنساش الكارنيه او البطاقة بتاعتك عشان مش هاتمتحن الا بيهم .. ولو نسيتهم هاتخش في موال تاني بقى وهايدوخوك وهاتقعد تمضي على اقرارات وحاجة شلل يعني

3- وانتا في الامتحان بص للامتحان عموما كدا بنظرة عامة .. وعلم على الاسئلة اللي انتا ضامنها .. وابدأ حل وعيش .. والهدف من دا انك تضمن النجاح الاول وبعد كدا ابدأ بص للتقدير

4- ماتعملش فيها فلحوس وتسأل اللي قدامك عن السؤال اللي انتا مش عارفه .. لا اما تخلص الامتحان كله ويتبقي اسأله انتا مش عارفها حاول تفتكرها .. لو ماعرفتش تعامل بقى .. بس المهم انك تبقي في المضمون بحيث انك لو اتقفشت تبقي انتا حالل على الاقل حل ينجحك ويعديك وماتبقاش مذلول للمعيد

5- بعد ماتخلص الامتحان على خير ماتنساش تاخد الكارنيه بتاعك وانتا ماشي عشان مايضيعش .. هوا في جميع الحالات مش هايضيع اصلا .. بس برده الحرص واجب

6- وانتا نازل من بيتك اوعي تنسي الآلة احسن تروح في داهية .. عشان حصلت معايا في امتحان المحاسبة السنة اللي فاتت وروحت اجرتها بخمسه جنيه وكانت آلة زي الزفت اصلا

اظن انا كدا قولتلك على كل حاجة تقريباً

عشان بس يبقي عندك خلفية عن اللي هايحصل عشان ماتبقاش مستغرب من اي حاجة

ولو في اي استفسار انا موجود سواءا ع الميل او المنتدي .. ربنا معاك يا ريس

اوللا كل نه وانتا طيب يا مينا ويارب تون دايما بخير والف شكر ليك وشرا ايضا بالتاكيد للبوب فمبير