زملائى و أحبائى لا تغضبوا منى -انظروا ثم احكموا - الوزير على حق

[شهريااار]

المشاركة الأصلية كتبت بواسطة ميدو ناجى

صدقوني مثل هؤلاء المدرسين والإدارة يستحقون أكثر من ذلك ألف مرة . ومن يدافع عنهم فهو منهم ومثلهم . يا أهل التربية إذا كان ناظر أو مدير المدرسة لديه عذر أو ظروف طارئة فلابد أن معه وكيل أو مساعد ، وإن كان مدرس التربية البدنية غير موجود فلابد أن يكون هناك زميل آخر له ممكن أن يقوم بعمله أو يحل محله في الحصة ( ألا توجد حصص إحتياط ) ؟؟ وبعدين هو الوزير محتاج يتعمل له شو علشان يظهر ويتشهر في الميديا ؟ والله ياجماعة أنا أعرف مدرسة إعداديةبنون في االإسكندرية وتجريبية ولغات كمان إدارتها نسائية ويبدأ بعض المدرسون في الإنصراف أو التزويغ أو الهروب أو الخروج من المدرسة بعد توقيعهم بنصف ساعة وطبعاً كلكم عارفين هما بيروحوا فين بدري كده ...ز والا ماتعرفوش ؟؟ أقول لكم .....كل واحد بيروح يخلص دروسه الخصوصية في فترة الصباح وفي أوقات العمل الرسمية ولطلاب المدرسة نفسها الذين لا يذهبون إلى المدرسة !!!!عمركم شوفتو بلطجة أكتر من كده ؟ وأزيدكم من الشعر بيت بل أبيات .... خد عندك ياسيدي :
1- في عيد الأم يقوم فريق المنتفعون بجمع الأموال ( عنوة - يعني غصب وإقتدار - على رأي اللنبي ) يجمعون الأموال من المدريسن لشراء هدية للست المديرة والتي تحددها المديرة بنفسها ( السنة دي كانت عاوزة خلاط ) وجابوا لها خلاط .
2- المديرة ابنها بيتجوز ــ إجمعوا لها تبرعات ــ
3- المديرة ابنها خلف ولد ــ إجمعوا لها تبرعات ــ علشان هدية البيبي ومستلزمات السبوع .
4- الإخصائي الإجتماعي كل يوم خارج من المدرسة علشان عنده دورة أو عنده مقابلة مع مدير الإدارة أو رايح يجيب الديب من ديله أو رايح يجيب فواتير مضروبة علشان الهبش والسرقة لأنه مكلف من قبل الإدارة بأعمال الصيانه ودهان سور المدرسة الخارجي( على فكرة تكاليف الدهان أكثر من ألفين جنيه ) وطبعاً ده بعلم الإدارة ومباركتها .
ياإخواني والله التركة ثقيييييييييييييلة جداً جداً ومحتاجة 20 من عينة الوزير ( وعلى فكرة أنا لا أعرفه ولست قريباً له )
إذا كان حد من حضراتكم ذهب إعارة لدولة عربية أكيد كان يعرف إن ما فيش حاجة إسمها دروس خصوصية لطلاب مدرسته وعارف طبعاً ان انهاء خدمته بيكون فوري مع خصم نصف مكافأته !!!! لكن هنا الأخ المدرس بياخد الفصل كله عنده في البيت وياريت بعد المدرسة لكن في نفس توقيت المدرسة !!! بذمتكم منتظرين إيه من مدرسين بهذه الأخلاق والمبادئ الفاسدة ؟؟؟هاتقولو علشان المرتب غير كافي .. مش كده ..يا إخواني اللي مش عاجبه المرتب يقدم استقالته ويبعد عن التعليم ..أو ياسيدي يدَرس بس بعد الظهر وبلاش من فصوله يعني في وقته الخاص وليس في وقت المدرسة والدراسة .
5- رجاء حار للجميع وأرجو أن تهاودوني وتجربوا انتم بأنفسكم : إقرأو كتابات بعض المدرسين وردودهم وملاحظاتهم ولاحظو كم الأخطاء الإملائية فيما يكتبون !!! وأحكموا انتم بأنفسكم هل ينتظر من مثل هؤلاء أي فائدة للطلاب؟ أو التعليم ؟!
وسلمولي على كل واحد يزعل من كلامي

أولا مفيش زعل ولا حاجة لإن الاختلاف فى الراى لا يفسد للود قضية بس الزعل لو ممكن يكون فهو من تهكمك على أخطاء زملاءك الإملائية فى كتابة موضوعاتهم وردودهم لأن دة ببساطة وارد جداً لإن الكلام مابينا وبين بعضينا عبارة عن دردشة لا تحتمل المقعر من الكلام بدليل أننى وجدت العديد من الأخطاء الإملائية فى ردك وهى كما يلى

إجمعوا لها تبرعات المفروض اجمعوا بدون همزة لأنها أمر ثلاثى يعنى همزة وصل وليس قطع

الإخصائي المفروض الأخصائى

الصيانه المفروض الصيانة تاء مش هاء

ما فيش حاجة إسمها دروس خصوصية المفروض اسمها بدون همزة لأنها همزة وصل وليس قطع


خلاصة الكلام حضرتك عملت زى الوزير اللى معجب بيه اوى انشغلت بالقشور والسلبيات وتجاهلت الإيجابيات ووقعت فى فخ التعميم الخاطئ وحاولت تعمم حالة المدرسة التجريبية لغات اللى حاكيت لنا عنها على كل المدارس فى مصر وعلى كل مدرسين مصر
ودة غلط كبير فى طريقة التحليل

أرجو أن تعيد التفكير مرة أخرى فيما قلت وتدعى معانا إنه يفرج الغمة عن زملاءنا لأنهم فى كرب بدل ما تتمنى لهم ألف ضعف للى همه فيه

وربنا يهدى