نفسي .. في ليلة العيد

[الأستاذة ام فيصل]

المشاركة الأصلية كتبت بواسطة أحمـدنجـم

نفسي وببساطة

في ليلة اعيد يكون القلب مرتاح

يكون الكل مرتاح
نصحى الصبح من نومنا نلاقي صباح
نفتح الشباك بالراحة تبص العين ادامها تلاقي
برااااااااااااااااح
يلاقي الشاب أدامه طريق مفتوح
ومن حقه يعيش مطمن
من حقه يغذي الجسم من حقه يغذي الروح
كدا مكتوب في دستوره
يصيبه الحظ وف دوره
يلاقي الحلم صبح العيد مهوش مدبوح
تموت فوت بقى بكرة
تموت الكوسة والرشوة
وعبده روتين يفارقنا بقى ويروح
نفسي في ليلة العيد
أضحي بالجشع والظلم
وأدبح غربتي ف بلدي واسلخ جَلدي من جِلدي
وحلمي يكون أخيراً علم
نفسي ف حرب تحيي السلم
فلسطيني يحس بعيد
عراقي يلاقي فجر جديد
ووطني العربي يتعرب وشمله يلم
نفسي دعوتي في عرفة
هدية قلبي للحكام
وأدعي يا ربي ارحمهم كما رحموا
اكرمهم كما كرموا
وادعيلهم بمد العمر والبركة كمان اعوام
نكون للجنة مفاتيحهم
وزي ما أعطوا نمنحهم
وفا وطاعة وزي ما خدموا
نصبح كلنا خدام
وتعلى بسعيهم أمة
ونبقى كلنا لمة
وهنلبي في يوم لما
ينادوا علينا نبقى زحام
نفسي في ليلة العيد
نخبط باب أخونا الجار
ونديله وندعيله
نشاركه ف حزنه وف فرحه
نباركله
ونتقبل م الجيران اعذار
نفسي نحس بالحاجة
وعين نعرفها محتاجة
ونعطي شق من تمرة
ينجينا أكيد من نار
نفسي نكون بقى أخوة
نعود من تاني للنخوة
وننسى الحقد والتجريح
يغيب م الدنيا اسم التار
في ليلة العيد
أنا بدعي لكل الناس
أنا بدعي هنا في قلبي
وفا إخلاص
بدعي يا ربي جملنا بإيمان إحساس
وتبقى التقوى تاج قلبي
ووطني يكونلي تاج ع الراس
وطني يكونلي تاج ع الراس
في ليلة العيد

استاذتنا العزيز
انا سعيدة جدا لاني اول من يرد على اللي نفسك ونفسنا بيه
تمنيات ودعاء جميل كلنا نتمناه وهي تعبير على روحك الجميلة ومشاعرك الانسانية النبيله
مش بعيد على ربنا ان يحقق لنا هذه الاحلام التي اصبحت خيال يداعب نفوسنا ويضعف عزيمتنا
انا مش اقول مبدع لانها قليلة بحقك بارك الله فيك وربنا يحقق لك امانيك
وكل عام انت وعائلتك الكريمه بالف خير
تقبل تحياتي وتقديري