يا جماعه انا معظم المواد ضايعه منى والامتحان فاضل عليه اسبوعين فى حل؟؟

[dr.jasy]

السلام عليكم انا مش عارفه بيحصل ايه او مابندخل ثانوى وبنخيب ليه انا من اوائل الاعداديه وشاطره جدا بس فعلا انا بقيت كسوله اوى ومش بذاكر اول باول بس الحمد لله بتعدى
انا بس مش عايزاك تفقد الامل وتتراخى لان لسه معاك وقت زى ماقولت انك شاطر
باذن الله مفيش حاجه صعبه
لازم طبعا الاسبوعين دول تهدى نفسك خالص وتصفى ذهنك جدااااا
وبلاش ضغوط ابدأمن النهارده نام بدرى عشان تصحى الصبح الساعه 8
وتبدا بالماده الاولى انا بصراحه مقسماهم
(العربى واللغه التانيه والانجلش )
مش بضغط على نفسى اوى فيهم لانى مفتحتهمش من اول الترم بس الحمد لله خلصت التلاته فى 3
ايام يعنى كل ماده يوم خلصت بالتمارين وحليت الامتحانات كمان
وده بفضل ربنا طبعا
شوفت الموضوع سهل مش صعب
نجى بقى للمواد التقيله
عندك احياء كمياء رياضه
الاحياء عايزه حفظ وفهم يعنى تكون مركز وفاهم انت بتحفظ ايه نصيحه لو مكنتش بتحضر فيها دروس وعندك خلفيه ولو حتى بسيطه متذاكرهاش لواحدك حاول تظبط ميعاد مع مدرس يلخص لك المنهج او حتى حد كبير يقعد معاك مش شرط يكون خبير
مجرد بس يفتح نفسك
وتبتدى تذاكر وضرورى اوى يكون من كتاب خارجى وتحل التمارين اللى ورا كل درس وتركز كويس جدا جدا جدا
على المفكره الصغيره
الكمياء
براحه مش عارفه اقول ايه بس اكتر حاجه تركز عليها المسائل مش شرط تفهم الدرس وتجيبه من اوله على الاقل يبقى معاك كتاب الامتحان وتحل التمرين وتراجع الاجابات من كتاب الاجابات وتعرف دى جات ازاى ودى اتعملت ازاى وتركز فى الخطوات وتحفظ شكل المسائل والتعريفات بتاعه كل باب كذلك برده تحفظها من المفكره
وتعمل كده مع الابواب كلها
الرياضه بقى
لو مكنتش مع مدرس هتدور على اى اسطوانه تسمع منها الشرح
ولو ملقيتش خلاص يبقى هتعمل زى الكميا
تفتح على التمارين على طول
ويكون معاك كتاب الاجابات وتشوف بيحلها ازاى
وتكرر اكتر من مساله هتلاقى العمليه بقت سهله وانت بتكون مبسوط وانت قاعد بتذاكر
بس
ده من نابع خيبتى قصدى تجربتى الشخصيه طبعا هى حاجه مش كويسه انى اضغط المنهج كده بس هعمل ايه بقى ربنا يهدينى
باذن الله هحاول اغير من نفسى لان السنه الجايه مفيهاش هزار
وانت لازم تنفع نفسك
محدش هينفعك
كفايه كده بقى انا رغايه بس انا بصراحه حاسه بيك متورط زىى بالضبط
ربنا يوفقك