ألـــــــو الخط الساخن

[msh-tlba]

انا في 3 ثانوي ،
‏
النهاردة اخر يوم لينا ،
ادعولنا بئا ربنا يوفقنا في المستوي و نلم اللي طار ف الانجلش و الاحياء ،
‏
انا معجب جدا بفكرتكوا ،،، و الاجمل منها كمان الروح دي اللي عندكوا ، دا انتوا حتي بدأينها بدري اوي ، لسة قبل النتيجة و قبل اي حاجة كدا ،
بس بجد ربنا يوفقكوا ،
‏
احنا الروح دي جت لنا في اخر 8 ايام قبل امتحان الاحياء ،
جينا القسم هنا و عملنا ثورة في القسم و ملئناه اسئلة و مراجعات و ملاحظات ، و بجد الحاجات دي فيدتنا كتير ، و صدقوني حمتني انا شخصيا من درجات كنت هطيرها في الاحياء في جزئيات صغيرة كدا كنت بعديها ،
‏
‏
المهم ، نصيحتي تبدأوها فيزيا ، يمكن تتصدموا في الاول ، بس صدمة الفيزيا كل ما كانت بدري كل ما كان احسن ،
انا اتصدمت فيها في شهر 8 ، مفوقتش من الصدمة غير في شهر 12 ، بس الحمد لله لحقتها ، اينعم تعبت شويتين تلاتة اربعة ، بس الحمد لله تمام .
‏
و ابدأوها بالاجزاء السهلة حسب ترتيب المنهج ، حاولوا متحفظوش ، افهموا اوي ، حلوا مسائل كتير ، اتدربوا ع كل الافكار ، اوعوا تستبعدوا حاجة ،
‏
دي نصيحة مجرب صدقوني ، لو عملتوا كدا يبئا تنسوا حاجة اسمها " بعبع الثانوية العامة "
‏

ع فكرة انا مش طالب متميز اوي ، انا ممكن اكون فوق متوسط ( انا كنت جايب في 2ث 97 % ) ،،، بس بجد بنصحكوا كأخ ليكوا كبير ،

يلا بالتوفيق ،