حلوا يا حلوا مسلسل جديد يا حلو !!

[Mr. Ali 1]

حكاية مش جديدة يا فرح . كل سنة بتحصل الحكاية دي حتي قبل ما انتي تتولدي
أصل انتي مش عافة أصل الحكاية دي ايه ولا هي منتشرة في نسبة المشاهدة الكبيرة جداً ليه .
زمااااااااااااااان لما كنا في سنكم , كان التليفزيون المصري فقط هو اللي شغال ( قناتين فقط ) وكل قناة بتذيع مسلسل عربي واحد في اليوم ( القناة الأولي مسلسل جديد بايخ جداً , والقناة التانية مسلسل معاد وأكيد بردوا بايخ جداً )
فكان شهر رمضان بالنسبة للشعب المصري حاجة مختلفة في كل شيء . سواء مظاهر هذا الشهر المبارك ( فوانيس رمضان مع الأطفال - الفوانيس اللي بالشمعة - أو الفوانيس المعلقة امام كل بيت والزينة التي كنا نصنعها بأيدينا , والكنافة والقطايف والبلح والياميش , ودول مكنش الواحد يشوفهم غير في رمضان فقط ) وبالنهار مكنش فيه مسلسلات في التليفزيون خالص ( فقط برامج منوعة وفوازير عمو فؤاد ) لكن بعد الافطار , تبدأ المعمعة الكبري ( في الوقت دا كانت كبري ) فوازير نيلي ( أو سمير غانم أو شيريهان ) وبعد كدا مسلسلات علي القناتين ( كلها جديدة لانج ) وتفضل المسلسلات دي شغالة لحد قرأن الفجر . والناس كانت مرتبطة بالمسلسلات دي كتير جداً .
تخيلي انتي بقي لما الناس فجأة تلاقي عندها أكتر من 15 قناة فضائية وكل قناة فيهم بتذيع 5 مسلسلات أو أكتر وكلهم جديدة لانج ( صحيح كلهم تقريباً بلا هدف مفيد ومعمولين علشان الاعلانات فقط , لكن الناس اتعودت وخلاص )
اما البرامج , فكان زمان البرامج المشهورة هي برنامج الجائزة الكبري ( لطارق حبيب ) وكان برنامج هادف وناجح جداً , وكذلك برنامج حمار سريع جداً جداً ( قصدي حوار صريح جداً جداً ) وبردوا كان برنامج ناجح جداً . ولما الناس ارتبطت بهذه البرامج الناجحة , العدوي بتنتشر بسرعة البرق . فأصبحت كل قناة لها برامج ( مش مهم خالص تكون هادفة , المهم انها تجيب اعلانات وبس )
بقولك ايه يا فرح . انا كتبت أكتر من موضوعك نفسه
كفاية كدا . بلاش تتفرجي علي المسلسلات ولا البرامج وريحي دماغك وخلاص . ( اتفرجي علي المسلسلات السورية التاريخية أو السورية الدينية فقط )