مشهد رقم (1)
في احد الشوارع الصغيرة او نقول (حواري)
حيث بالكاد تاخذ سيارتان واحدة ذهاباً واخرى اياباً
واحد بيلف بالعربية في تقاطع وقام بتعطيل الصفين
فيمتلئ صف القادمين من اخر الشارع ويفرغ صف الذاهبين منه
اللى جاي من بعيد - والمفروض انه عارف انه الشارع اتجاهين- يلاقي صف كامل
يروح داخل فيه واللى وراه واللى وراه وهوب .... مفيش مكان للمعاكس يعدي
صاحبنا اللى بيلف حل المشكلة وقدر يلف وطلع من التقاطع
دلوقتي عندنا ناس عايزة تدخل شارع مقفول واللى في الشارع المقفول عايزين يعدوا وملهمش دعوة
ومعاك نص ساعة على ما واحد يطلع ونصاية كمان على ما يظبط الدنيا
واستغفر بقى على كمية الشتايم اللى قلتها سواء بصوت عالي او في سرك
--------------
مشهد رقم (2)
اي اشارة محترمة بيبقى في تحتها كدا خط اصفر للمشاة المفروض بيعدوا عليه
اثناء فترة الانتظار
بس عندنا هو بيستخدم للعربية مش للمشاة
حيث لازم انك تعديل لحد ما تجيب حرف الشارع وزيادة
وبالطبع مش حتكون شايف الاشارة
تستنى اللى وراك اول ما تلاقيه بيتحرك تعرف انه الاشارة فتحت !
---------------
الموقفين اللى فاتوا بشوفهم كل يوم
وكل يوم تشمل ما قبل الثورة وما بعد الثورة
وكل يوم بسأل نفسي مين اللى اتغير ؟
قلت السواقين متخلفين او الشوارع هي اللى غلط او العربيات بتمشي لوحدها !
نشوف طبقة تانية
---------------
مشهد رقم (3)
الموظفين والعمال في اي مكان
بدل ما كانوا بييجوا متأخر نص ساعة وبيتعاقب عليها
دلوقتي بقى مبيجيش اصلاً وبيرفض يتعاقب عليها
ولو فتحت بقك حيرد عليك بالثورة ويعملك اعتصام
ويحسسك انك حتسافر على طرة بعد شوية
----------------
قلت سيبك من الطبقة الكبيرة دلوقتي
تعالى نبص عالشباب او حتى عالاطفال
----------------
مشهد رقم (4)
لجان الامتحان من الابتدائية حتى الثانوية العامة
حالات مكثفة من الغش الجماعي !
والمدرسون من يشجعونها !
وانا متابع من اول اخويا اللى في ثانوية عامة
لحد بنت خالتي اللى في تانية ابتدائي
واللى بيتحكيلي كل يوم من قصص الغش العامة
ههههههههههههههههه الموقف ده عجبنى اوى بيحصل معايا وبجد بزهق اوى المراقبة بتكون مصرة تفتح ورقتى وتقولى عايزة حاجة ياستى لا ابعدى بجد بتعب لما الاقى المراقبين الى بيغششوا ربنا يهديهم
----------------
المواقف كثيرة ولكنها ليست حاضرة ببالي
سألت نفسي الثورة عملت ايه ؟
الثورة عملت تغيير
اه فعلاً عملنا تغيير كتير
بلاش نتكلم عن الثورة 
غيرنا مبارك وغيرنا المحافظين وغيرنا الدستور او بوظناه مفرقتش
واهو شغالين بنغير في الوزرا كل شوية وبنغير هدومنا بردو والحمد لله
طب واحنا مش حاسين ليه بالتغيير ده ؟
لإنه للأسف دي ثقافة شعب وثقافة الشعب لا يمكن تتغير من فوق
الحاجات دي بتتزرع من الصغر
انا لو اتعلمت اني احترم مواعيدي واوصل في الوقت
عمري ما حتعب ولا حتعب حد معايا في اي مصلحة او في اي شغل
ثقافة شعب اي ثقافة جيل كامل
مش حتقدر تغير في واحد عنده 50 سنة ولا 60 سنة
عشان كدا مش عايزك تبص للتغيير دلوقتي
بالثورة ... اغلقنا ثقب النزيف المستمر ولانزال نقوم بتطهيره
بعد تنظيف الجرح يمكننا تركه يعمل حتى يلتئم
وقبل ان يلتئم ... لن يكون منظر الجرح مبهجاً او جميلاً
والجرح بتاعنا محتاج فترة بتاع 30 سنة اي فترة تغيير جيل باكمله
وهذه هي الفترة اللازمة لتنشئة جيل جديد بثقافة جديدة
يمكننا اعدادها الان لاعداد ذلك الجيل مستقبلاً
ونحن - الشباب - من عليه مسؤولية اعداد وتهيئة مصر
لهذه المهمة
حتى نستطيع ان نغير هذه الثقافة الرثة للأبد وندعي اننا لا نتبعها 
نصيحتي لكم
لا تتعجلوا التغيير ولا تنتظروه
لإنكم لن تروه ولكنكم من سيصنعه
BaNZeR
13-07-2011, 03:06 PM
العرض المتطور
