لطلبة هندســة القاهرة ... بخصوص الإعــدادي .. شوية استفسارات ع الماشي ... ^_^

[a7mad3ali]

انا مكنتش عايز ارد بعد باشمهندس حاتم بصراحة لانه اتكلم فأوفي

بس انا هقول علي شوية حاجات بصفتي هندسة القاهرة وعديت باعدادي الشيخ زايد وكان نفسي حد يقولي اي حاجة

اول حاجة بالنسبة للمواصلات
فيه اشتراك باصات تبع الكلية وديه بتبقي غالية علي الفاضي بس بتريح بصراحة من المواصلات

وفيه مواصلات من رمسيس او التحرير ميكروباصات بتنزلك قدام الكلية بالظبط
بس المشكلة وانت مروح بتبقي بهدلة شوية

بالنسبة للادوات سمير وعلي احسن حاجة بس انا عن نفسي مجبتش منهم فمش هتفرق يعني بس هم الافضل

ومتجيبش من نفسك استني الدكاترة هيملوك الحاجات وتنزل تجيبها ان شاء الله وخلي بالك هيفضل يقولك
قلم 0.5 مم 2h وقلم 0.7 hb وكلام كتير كده بس مش هتفرق كتير يعني h او 2h او b وكده يعني

واول اسبوع مبيبقاش فيه سكاشن بيبقي محاضرات بس عشان السكاشن هتحل علي المحاضرات فمش هينفع يدوها قبل المحاضرات

بالنسبة للدكاترة والمعيدين هم فعلا اكتر من رائعين ومعاملتهم رائعة

ممكن تلاقي دكتورين مثلا هم اللي رخمين شوية ومع ذلك بتكتشف في الاخر انهم طيبين جدا بس هي ديه شخصيتهم

والمعيدين نفس الحكاية

ان شاء الله لو كان فيه حد رخم مش هيبقي اكتر من اتنين ولا حاجة من مجموع 10 او اكتر

وبعدين ممكن تحضر لحد غيره فعادي يعني الا اذا كان بياخد الغياب

بالنسبة للمذاكرة نصيحة في اعدادي بالذات اشتغل من الملازم بالاضافة للمحاضرات والسكاشن

الكتب مش مهمة الا اذا كنت عايز ترتب علي الدفعة

والملازم لو ذاكرتها كويس بالورقة والقلم وحط ميت خط تحت الورقة والقلم جانب المحاضرات والسكاشن هتجيب امتياز ان شاء الله

لازم تكتب المحاضرات والسكاشن بنفسك ومتقولش هصورها او اقراها لو عايز تجيب تقدير

بس كده وربنا يوفقك

والسنتر اللي هتجيب منه ملازم هو بره الكلية هتمشي يمين اول متخرج من باب الكلية شوية وبعديها شمال

وربنا يوفقكوا