الموضوع الشامل للكورسات والبرامج التدريبية لكلية التجارة

[vampire1188]

- مرحلة المبتدئين جامعياً -

خلصت الثانوية العامة بتاعتك .. دخلت الكلية

بطيـــخ مش عارف اي حاجة في اي حاجة وابيض يا ورد
بتبص للناس اللى اكبر منك في الكلية بتحس انك قد ايه جاهل

كل دا عااااااادي .. شعور طبيعى بيراود اى شخص داخل الكلية جديد
ومش عيب انك تكون جاهل في مرحلة زي اللى انت فيها دي
لكن العيب انك تعدي المرحلة دي وتخش فى مرحلة تانية وتبقى لسه جاهل

مرحلة المبتدئين جامعياً دى بتبدأ من اول ما رجليك بتخطى عتبة باب الجامعة وبتنتهى مع نهاية سنة اولي كلية

ودا مش تعريفي انا .. دا المتعارف عليه في جميع جامعات العالم
ومعلومة ليكو وللزمن برده .. اكاديميا الطلبة بتتقسم لرتب بناءا على السنة الدراسية الملتحق بيها الطالب

طالب السنة الاولى بيبقى اسمه freshman
طالب السنة التانية بيبقى اسمه sophomore
طالب السنة التالته بيبقى اسمه junior
واخيرا طالب السنة الرابعة بيبقى اسمه senior

وبالتالى تركيزنا فى البوست دا هايبقى منصب فقط على الناس الـ freshman

طب دلوقتى انت عايز تبتدي طريقك هاتبتدي ازااااى ؟؟

بص ياسيدي .. تخيل انك واقف في ميدان كبير والميدان دا متفرع منه 6 طرق وكل طريق منهم طوله 200 كيلو

(يعنى زي المسافة بين القاهرة واسكندرية تقريبا)

بالسينس كدا .. هل هاتقدر تمشي في طريق طوله 20 كيلو وانت مش معاك مايه ولا اكل ولا هدوم ؟

أكيد لاء طبعا .. ودا معناه انك قبل ما تخش في الطريق اللى انت عايزه من الـ 6 طرق دول انت محتاج تحضر نفسك كويس عشان تبتدي الرحلة .. صح ؟؟

- الميدان اللى انت واقف فيه دلوقتى دا هوا نقطة الصفر الى هاتبتدأ منها كل حاجة
- الـ 6 طرق دول بيمثلو 6 انواع من التخصصات اللى انت تقدر تتخصص فيها من خلال الكورسات (وهانعرفهم بعدين)
- المايه بتمثل الانجليش او اى لغة تانية غير العربى
- الاكل بيمثل الكمبيوتر
- الهدوم بتمثل السوفت سكيلز بتاعتك (وهانعرف يعنى ايه سوفت سكيلز في وقتها)

لو انت ظبطت مايتك واكلك وهدومك يبقى انت كدا جاهز انك تختار طريق من الـ 6 طرق عشان تمشي فيه وتوصل لآخره بنجاح

اذن نستنتج من دا ان احنا دلوقتى هانركز على المايه والاكل والهدوم

ازااااااااى ؟؟؟
هانعرف ازاى ان شاء الله فى البوست القادم

يتبـــع ،،،

[vampire1188]

خلونا نبعد ولو لدقيقة كدا عن تفسير المايه والاكل والهدوم ونبص للموضوع بشكل مختلف

احنا قعدنا 6 سنين في ابتدائى و 3 سنين في اعدادي و 3 سنين في ثانوي بندرس

يعنى لو جمعتهم على بعض هاتلاقي نفسك مر عليك 12 سنة بتتعلم
ماسألتش نفسك في يوم من الايام انا بتعلم ليه ؟؟!

هل عشان انا مجبر على كدا ؟
هل عشان ابقى زي ابن خالتى الدكتور ولا ابن عمتى المهندس ؟
هل عشان لما ابقى متعلم الناس هاتحترمنى ؟
هل عشان ابقى متأهل كفاية لانى اشتغل شغل كويس واقبض كويس واتجوز ؟

لو كانت اجابتك واحده من الاسئلة اللى فوق دي فايؤسفنى القول بان تفكيرك في النقطة دي محدود

ليــــه ؟؟

لان الانسان بطبيعته بيبقى تواق لانه يوصل للحاجة اللى هوا عايزها .. وبمجرد مابيوصل بيمل ومابيعجبوش الوضع وبيبقى عايز حاجة احسن واكبر

وبما ان دي طبيعة بشرية حقيقية موجودة فى كل انسان وربنا خلقها فى كل واحد فينا ليه احنا بقى مانستغلهاش الاستغلال الصح ؟

ليه بتحط سقف لطموحك ؟ ليه بتقول انا مش هاقدر ؟
مع انك في قرارة نفسك من جوا واثق تماما انك لو شديت على نفسك وتعبت شوية هاتعمل النتيجة اللى ترضيك

ارجع بذاكرتك لورا وافتكر انت كام مرة تعبت فيها وذاكرت وجيبت درجات عالية ؟
ارجع بذاكرتك لورا وافتكر انت كام مرة تعبت في نشاط معين وخدت شهادة تقدير ؟
ارجع بذاكرتك لورا وافتكر كام مرة اتعلمت حاجة وتعبت فيها والناس صقفتلك وقالتلك برافو وكنت مبسوط ؟

اذا العملية واضحة اهي .. شوية تعب مع شوية تركيز مع شوية اجتهاد والنتيجة بتكون شئ كويس يرضينى ويرضي طموحى

وكنتيجة للكلام اللى فات دا لازم مانحطش حدود لطموحنا
خلي طموحك مفتوح وبلا نهاية
بس في سبيل دا لازم تبقى منظم في افكارك وترتيبك للطموح دا
بمعنى ان العملية ماتبقاش ملخبطة
ودي مشكلة كبيرة للاسف بيقع فيها اغلبية الطلبة والخريجين
وانا نفسي كنت بقع فيها لغاية ما عيدت ترتيب اوراقي من جديد

اللخبطة دي بقى بتيجي ازاى ؟؟

الواحد بيخش الكلية جديد .. اول حاجة بيسأل عليها انا لما اتخرج هاشتغل ايه ؟
صيغة السؤال ذات نفسه غلط ومستفزة
الصيغة الصح انك تقول ايه الامكانيات اللى المفروض تتوافر فيا عشان اشتغل في وظيفة معينة انا عايزها

وهيا دي احد المشاكل اللى بتواجه الاف الخريجين سنوياً
بيتخرج وهوا اصلا ماعندوش اى مهارات ولا اي حاجة ويقولك انا مش لاقى شغل او لاقيت شغل بس مش عاجبنى

طب وهوا انت ايه امكانياتك اصلا ؟!

كلنا نفسنا نشتغل في مايكروسوفت واوراكل وحازم حسن .. الخ الخ
بس هل انت قادر على انك تشتغل فى شركات زي دي ؟

المشكلة الحقيقية هنا بتبقى فيك انت مش في الشركات
الشركة عايزة شخص يكون متوافر فيه واحد اتنين تلاته
وانت قدمت واترفضت .. ليه ؟ لانك ماعندكش لا واحد ولا اتنين ولا تلاته

اذا دائما المشكلة بتبقى فيك انت مش فى الشركة

الوضع بالظبط زيه زي لعبة برو ايفليوشن اللى كلنا عارفينها

كل سنة بتنزل نسخة احدث من اللى قبلها .. طب افرض انك جيبت نسخة السنة دي وماشتغلتش على جهازك عشان امكانيات جهازك ضعيفة .. بالله عليك المشكلة هنا فين ؟
هل في الشركة اللى عملت اللعبة عشان نزلت لعبة مابتشغلش الا على اجهزة امكانياتها عالية ؟ ولا عشان انت جهازك امكانياته ضعيفة ؟

وعشان كدا زي ما قولت مافيش داعي لانك تلخبط نفسك او تحتار وتبقى مشتت .. العملية ابسط مما تتخيل بس محتاجة تعب

التاجر لما بيبقى عايز يبيع منتج معين بيحاول يقنع المشتري بكافة الوسائل انه يشترى المنتج دا
ولو المنتج حلو العميل بيشتري .. ولو المنتج مضروب العميل بيرفضه .. صح ؟؟

وكذلك انت نفس النظام .. انت ذات نفسك عبارة عن سلعة ولازم تكون سلعة كويسة مش مضروبة وتكون بكواليتي عالية عشان لما تيجي تسوق لنفسك عند الشركات من خلال السي في والانترفيوهات تبقى ساعتها الشركات تقبلك

وعشان كدا احنا دلوقتى هانبدأ نعرف ازاى تحضر نفسك خلال الاربع سنين بتوع الكلية بحيث ان باذن الله لما تتخرج تبقى سلعة كويسة ولما تيجي تقدم لشركات ساعتها الشركات ممكن تقبلك

وعشان تبقى سلعة كويسة ومنتج نضيف وتبقى قادر تمشي في رحلة الـ 200 كيلو اللى قولنا عليهم في البوست اللى فات
لازم يبقى معاك مايتك واكلك وهدومك

يتبع ،،،